យន្តហោះចម្បាំងតៃវ៉ាន់ ឃ្លាំមើលសមយុទ្ធយន្ដហោះទំលាក់គ្រាប់បែកចិន នៅក្បែរកោះតៃវ៉ាន់
កោះតៃវ៉ាន់បានបញ្ជូនយន្តហោះចម្បាំងរបស់ខ្លួន ទៅតាមដានសកម្មភាពសមយុទ្ធរបស់យន្តហោះទំលាក់គ្រាប់បែករបស់ចិន ដែលកំពុងហោះហើរនៅតាមច្រកសមុទ្រព័ទ្ធកោះតៃវ៉ាន់ កាលពីថ្ងៃសុក្រ ទី២៥ ខែឧសភា។ សកម្មភាពសមយុទ្ធយោធាមួយនេះ ត្រូវបានធ្វើឡើងតែប៉ុន្មានម៉ោងក្រោយពេលដែលកោះតៃវ៉ាន់ប្ដេជ្ញាថា មិនចុះញ៉មដោយសារបាត់បង់ចំណងការទូតជាមួយប្រទេសប៊ូគីណា ហ្វាសូរ ស្របពេលដែលឥទ្ធិពលរបស់ចិនកំពុងកើនឡើង។
ចុះផ្សាយនៅថ្ងៃ៖
ស្តាប់ - ០២:០៦
រដ្ឋមន្ត្រីក្រសួងការពារជាតិតៃវ៉ាន់ បានអោយដឹងនៅថ្ងៃសុក្រនេះថា តៃវ៉ាន់បានបញ្ជូនយន្តហោះចម្បាំងរបស់ខ្លួន ទៅឃ្លាំមើលនិងយាមការពារនៅដែនសមុទ្រតៃវ៉ាន់ ដែលចិនកំពុងធ្វើសកម្មភាពសមយុទ្ធយោធា។ សមយុទ្ធរបស់ចិននោះរួមមាន យន្តហោះទំលាក់គ្រាប់បែក H-៦ ចំនួន២គ្រឿង ដែលធ្វើការហោះហើរនៅតាមច្រកសមុទ្រភាគខាងត្បូងនិងភាគឥសាននៃកោះតៃវ៉ាន់។
រដ្ឋមន្ត្រីក្រសួងការពារជាតិតៃវ៉ាន់រូបនេះបានបន្ថែមទៀតថា តៃវ៉ាន់អាចគ្រប់គ្រងស្ថានការណ៍បានទាំងស្រុង ហើយតៃវ៉ាន់បានរៀបចំត្រៀមរួចជាស្រេចនូវវិធានការពារដើម្បីធានាសន្ដិសុខជាតិ។
ការធ្វើសមយុទ្ធយោធារបស់ចិននៅក្បែរដែនកោះតៃវ៉ាន់លើកនេះ គឺធ្វើឡើងតែមួយថ្ងៃក្រោយពេលដែលប្រទេសប៊ូគីណា ហ្វាសូរ បានប្រកាសផ្ដាច់ទំនាក់ទំនងការទូតជាមួយកោះតៃវ៉ាន់។
សូមបញ្ជាក់ថា ចាប់តាំងពីប្រធានាធិបតីតៃវ៉ាន់បច្ចុប្បន្ន លោកស្រី Tsai Ing-Wen ឡើងកាន់តំណែងក្នុងឆ្នាំ២០១៦មក កោះតៃវ៉ាន់បានរបូតសម្ព័ន្ធមិត្តចំនួន៣រួចមកហើយ មុនពេលប៊ូគីណា ហ្វាសូរ ប្រកាសផ្ដាច់ខ្លួនពីកោះតៃវ៉ាន់ កាលពីថ្ងៃព្រហស្បត្តិ៍ ទី២៥ ខែឧសភា។ ប្រទេសទាំង៣នោះរួមមាន សាធារណរដ្ឋដូមីនិក សៅតូម៉េ និង ប៉ាណាម៉ា ហើយប្រទេសទាំង៣នេះ សុទ្ធតែបានងាកទៅចងសម្ព័ន្ធមិត្តជាមួយប្រទេសចិន។ ការផ្ដាច់ខ្លួនរបស់ប៊ូគីណា ហ្វាសូរ ពីកោះតៃវ៉ាន់លើកនេះ គឺធ្វើឡើងដោយស្ថិតក្រោមសម្ពាធរបស់ប្រទេសចិន នេះបើយោងតាមការអោយដឹងរបស់អ្នកវិភាគ។
ទោះជាបច្ចុប្បន្ននេះ ប៊ូគីណា ហ្វាសូរ មិនទាន់បានប្រកាសភ្ជាប់ទំនងទំនងការទូតជាមួយចិនក៏ដោយ ក៏ចិនបានប្រកាសស្វាគមន៏ជំហ៊ានរបស់ប្រទេសមួយនេះ ដែលដើរចេញពីកោះតៃវ៉ាន់។ កន្លងមក ចិនមានការមិនពេញចិត្តចំពោះចំណងទំនាក់ទំនងការទូតរវាងកោះតៃវ៉ាន់និងប្រទេសដទៃ ដែលទទួលស្គាល់តៃវ៉ាន់ជាប្រទេសឯករាជ្យ មិនមែនជាផ្នែកមួយនៃប្រទេសចិន។ ពេលថ្មីៗនេះ ចិនក៏ខឹងសម្បារចំពោះចំណងមិត្តភាពក៏កក់ក្ដៅរវាងតៃវ៉ាន់និងអាមេរិក បើទោះបីជាប្រទេសទាំងពីរនេះ ពុំមានចំណងការទូតជាផ្លូវការយ៉ាងណាក្តី។
ចំណែកតៃវ៉ាន់ បានព្រមានចិនកាលពីថ្ងៃព្រហស្បតិ៍ថា តៃវ៉ាន់នឹងមិនអត់អោនចំពោះឥរិយាបថ ឬទង្វើណាដែលធ្វើអោយប៉ះពាល់ដល់អធិបតេយ្យភាពរបស់តៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ