របាយការណ៍អង្គការឃ្លាំមើលសិទ្ធិមនុស្ស បង្ហាញពីការរើសអើងផ្លូវភេទ នៅប្រទេសចិន
នៅក្នុងថ្ងៃច័ន្ទនេះ របាយការណ៍ថ្មីមួយរបស់អង្គការឃ្លាំមើលសិទ្ធិមនុស្ស Human Rights Watch បានធ្វើការរិះគន់យ៉ាងខ្លាំងលើសហគ្រាសនិងក្រុមហ៊ុនចិន ដូចជាក្រុមហ៊ុនAlibabaជាដើម លើការរើសអើងផ្លូវភេទក្នុងពេលជ្រើសរើសបុគ្គលិក។ របាយការណ៍នេះ ក៏បង្ហាញពីភាពកាន់តែអាក្រក់ទៅនៃលក្ខខណ្ឌការងាររបស់ស្រ្តីនៅប្រទេសចិន។
ចុះផ្សាយនៅថ្ងៃ៖
ស្តាប់ - ០១:៤៣
អង្គការឃ្លាំមើលសិទ្ធិមនុស្ស Human Rights Watch បានធ្វើការវិភាគទៅលើសេចក្តីប្រកាសជ្រើសរើសបុគ្គលិកជាង៣,៦ពាន់របស់ក្រុមហ៊ុននិងសហគ្រាសនានាក្នុងប្រទេសចិន ពីចន្លោះឆ្នាំ២០១៣ និង២០១៨។ ក្រោយការវិភាគ អង្គការនេះបានចេញនូវរបាយការណ៍មួយដែលមានចំណងជើងថា « មានតែបុរសប៉ុណ្ណោះដែលត្រូវដាក់ពាក្យៈ ការរើសអើងផ្លូវភេទ ក្នុងសេចក្តីប្រកាសជ្រើសរើសបុគ្គលិក នៅប្រទេសចិន » (Only Men Need Apply: Gender Discrimination in Job Advertisements in China)។
របាយការណ៍នេះ បានរៀបចំយ៉ាងលម្អិតអំពីការប្រមាថរបស់ក្រុមហ៊ុនឯកជននិងស្ថាប័នសាធារណៈចិន ដែលក្នុងនោះមានដូចជាការជ្រើសរើសតែបុរសអោយចូលធ្វើការ និងតម្រូវអោយស្ត្រីដាក់ពាក្យចូលធ្វើការមានរូបរាងនិងសម្រស់ទាក់ទាញ។
របាយការណ៍នេះក៏បានលើកឡើងថា ការរើសអើងនៅក្នុងការជ្រើសរើសបុគ្គលិកអោយចូលបម្រើការងារ ជាហេតុផលមួយដែលធ្វើអោយចំនួនកម្លាំងពលកម្មស្ត្រីធ្លាក់ចុះ ហើយគម្លាតប្រាក់ខែរវាងស្រ្តីនិងបុរសមានការកើនឡើងកាន់តែខ្លាំង។
ក្រុមហ៊ុនបច្ចេកវិទ្យានិងក្រុមហ៊ុនលក់ផលិតផលតាមអ៊ីនធ័រនែតធំៗរបស់ចិន ដែលរួមមានក្រុមហ៊ុន Alibaba ផងនោះ ត្រូវបានរិះគន់នៅក្នុងរបាយការណ៍វិភាគនោះថា បានប្រកាសជាចំហក្នុងការជ្រើសរើសបុគ្គលិកដោយផ្តល់អាទិភាពទៅបុរស។
ក្រុមហ៊ុន Alibaba ក៏ត្រូវបានគេចោទប្រកាន់ថា បានប្រើទាក់ទាញរបស់បុគ្គលិកស្រី ដោយហៅពួកគេថាជា ស្រីស្អាតAli និងជាទេពអប្សរ ក្នុងយុទ្ធនាការជ្រើសរើសបុគ្គលិកនៅលើបណ្ដាញចែកចាយសង្គម ។
ចំពោះរឿងនេះ ក្រុមហ៊ុន Alibaba បានលើកឡើងថា ខ្លួននឹងធ្វើការពិនិត្យឡើងវិញយ៉ាងតឹងរឹងលើការប្រកាសជ្រើសរើសបុគ្គលិក ដើម្បីធានាថាពួកគេគោរពតាមគោលនយោបាយសមភាពផ្លូវភេទរបស់ក្រុមហ៊ុន។
គួរបញ្ជាក់ដែរថា ប្រទេសចិន មានច្បាប់ហាមឃាត់ការរើសអើងផ្លូវភេទនេះ តែការអនុវត្តជាក់ស្ដែងអោយបានត្រឹមត្រូវតាមច្បាប់ពុំទាន់មាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ