រុស្ស៊ី ត្រូវបានចោទប្រកាន់ថានៅពីក្រោយការបាញ់ទំលាក់យន្តហោះ MH១៧
កាលពីថ្ងៃសុក្រ ទី២២ ឧសភា ហូឡង់ អូស្រ្តាលី សហភាពអឺរ៉ុប និង អង្គការ Nato បានធ្វើការទាមទារអោយរុស្ស៊ីទទួលខុសត្រូវចំពោះករណីយន្តហោះម៉ាឡេស៊ី MH ១៧ ត្រូវបាញ់ទំលាក់តាំងពីឆ្នាំ២០១៤។ ការចោទប្រកាន់ទៅលើរុស្ស៊ីនេះ ត្រូវបានធ្វើឡើងបន្ទាប់ពីក្រុមស៊ើបអង្កេតអន្ដរជាតិ បានផ្តល់សេចក្តីសន្និដ្ឋានថា មីស៊ីលដែលបានបាញ់ទំលាក់យន្តហោះ MH ១៧ គឺបាញ់ចេញដោយកងយោធាការពារអាកាសរបស់រុស្ស៊ី។ តែរដ្ឋាភិបាលរុស្ស៊ី ធ្វើការបដិសេធចំពោះការចោទប្រកាន់នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ប្រទេសហូឡង់ និង អូស្ត្រាលី បានធ្វើការចោទប្រកាន់ទៅលើរុស្ស៊ី កាលពីថ្ងៃសុក្រម្សិលមិញថា ក្រុងម៉ូស្គូជាអ្នកស្ថិតនៅពីក្រោយការបាញ់ទំលាក់ជើងហោះហើរ MH17 របស់ម៉ាឡេស៊ី ដែលបានសម្លាប់ជីវិតអ្នកធ្វើដំណើរជិត៣០០នាក់ កាលពីថ្ងៃទី១៧ ខែកក្កដា ក្នុងឆ្នាំ២០១៤។ ការចោទប្រកាន់ទៅលើរុស្ស៊ីនេះ គឺធ្វើឡើងមួយថ្ងៃបន្ទាប់ពីក្រុមស៊ើបអង្កេតអន្តរជាតិដែលដឹកនាំដោយហូឡង់ បានចេញសេចក្ដីសន្និដ្ឋានមួយថា មីស៊ីលដែលបានបាញ់ទំលាក់យន្តហោះរបស់ម៉ាឡេស៊ី មានប្រភពមកពីមូលដ្ឋានកងយោធាការពារអាកាសមួយកន្លែងរបស់រុស្ស៊ី ។ តែក្រុមស៊ើបអង្កេតអន្តរជាតិនេះ ពុំបានបញ្ជាក់អោយដឹងច្បាស់ថា តើបុគ្គលរូបណាអោយប្រាកដនៅក្នុងកងយោធារុស្ស៊ី ដែលបានបញ្ជាអោយបាញ់មីស៊ីលនោះ។
ហូឡង់កំពុងរៀបចំដាក់ពាក្យបណ្ដឹងទៅកាន់តុលាការអន្តរជាតិ ដើម្បីអោយរុស្ស៊ីទទួលខុសត្រូវចំពោះករណីបាញ់ទំលាក់យន្តហោះនេះ នេះបើយោងតាមការអោយដឹងរបស់រដ្ឋមន្រ្តីក្រសួងការបរទេសហូឡង់កាលពីថ្ងៃសុក្រ។
នៅក្នុងថ្ងៃសុក្រដដែរនោះ សហភាពអឺរ៉ុបដែលមានប្រទេសជាសមាជិកចំនួន២៨ និងអង្គការ Nato ដែលដឹកនាំដោយអាមេរិក បានចេញសេចក្តីថ្លែងការណ៍ស្ដីពីករណីធ្លាក់យន្តហោះម៉ាឡេស៊ីនេះ។ ទាំងសហភាពអឺរ៉ុប ទាំងអង្គការ Nato បានអំពាវនាវអោយរុស្ស៊ីទទូលយកនូវទំនួលខុសត្រូវរបស់ខ្លួន ក្នុងករណីបាញ់ទំលាក់យន្តហោះរបស់ម៉ាឡេស៊ី ព្រមទាំងចូលរួមសហការអោយបានពេញលេញក្នុងការស្វែងរកយុត្តិធម៌ក្នុងរឿងនេះ។
តែរដ្ឋាភិបាលរុស្ស៊ី បានច្រានចោលនូវការចោទប្រកាន់ខាងលើភ្លាមៗ ដោយបានអះអាងថា ពុំធ្លាប់មានអាវុធមីស៊ីលដូចដែលក្រុមអ្នកស៊ើបអង្កេតបានសន្និដ្ឋាន ធ្លាប់ឆ្លងកាត់ព្រំដែនរុស្ស៊ីនោះទេ។ រដ្ឋមន្រ្តីក្រសួងការបរទេសរុស្ស៊ី បានលើកឡើងទៀតថា ហូឡង់មិនបានផ្តល់នូវភស្ដុតាងណាមួយ ដែលគាំទ្រទៅលើលទ្ធផលនៃការរកឃើញថា រុស្ស៊ីជាអ្នកនៅពីក្រោយរឿងនេះនោះទេ ហើយហូឡង់កំពុងប្រើប្រាស់សោធនាវកម្មមួយនេះ ដើម្បីសម្រេចនូវគោលដៅនយោបាយរបស់ខ្លួន។
ប្រធានាធិបតីរុស្ស៊ី ទាមទារអោយមានវត្តមានអ្នកសង្កេតរុស្ស៊ី ចូលរួមជាមួយក្រុមអ្នកស៊ើបសង្កេតអន្ដរជាតិ ក្នុងប្រតិបត្តិការស្វែងរកការពិត នៅក្នុងរឿងបាញ់ទំលាក់យន្តហោះ MH17 របស់ម៉ាឡេស៊ីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ