លោកចន ឃែរី៖ការផ្លាស់ប្តូរនៅភូមាជាសារទៅកាន់ប្រជាជននៅទូទាំងពិភពលោក
នៅអាទិត្យ ទី២២ ឧសភានេះ លោកប្រមុខការទូតអាមេរិកចន ឃែរីបានឆ្លៀតចូលបំពេញទស្សនកិច្ចក្នុងប្រទេសភូមា មុននឹងបន្តដំណើរទៅកាន់ប្រទេសវៀតណាម។ វៀតណាមដែលលោកឃែរីត្រូវរួមដំណើរទស្សនកិច្ចជាមួយលោកអូបាម៉ា។ នៅក្នុងប្រទេសភូមា លោកឃែរីបានចូលជួបសន្ទនាជាមួយលោកស្រីអ៊ុង សានស៊ូជី ប្រធានគណបក្សសម្ព័ន្ធជាតិដើម្បីលទ្ធិប្រជាធិបតេយ្យដែលកំពុងកាន់អំណាច។ លោកឃែរីបានសាទរការផ្លាស់ប្តូរនៅភូមាពីអំណាចយោធាទៅកាន់អំណាចស៊ីវិល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ជំនួបរវាងលោកចន ឃែរី និងលោកស្រីអ៊ុង សានស៊ូជីថ្ងៃនេះមិនមែនជាជំនួបជាមួយប្រមុខបក្សប្រឆាំងដែលកំពុងជាប់ឃុំក្នុងគេហដ្ឋានដូចដែលលោកចន ឃែរីធ្លាប់បានធ្វើនាពេលកន្លងមកទេ តែជាជំនួបជាមួយថ្នាក់ដឹកនាំជាន់ខ្ពស់ភូមាម្នាក់ដែលមានតួនាទីជារដ្ឋមន្រ្តីក្រសួងការបរទេស និងជាទីប្រឹក្សារដ្ឋដែលមានឋានៈស្នើនាយករដ្ឋមន្រ្តី។ ម្យ៉ាងទៀត ជំនួបទ្វេភាគីកម្រិតនេះក៏ជាជំនួបលើកទី១ តាំងពីរដ្ឋាភិបាលថ្មីដឹកនាំដោយគណបក្សសម្ព័ន្ធជាតិដើម្បីលទ្ធិប្រជាធិបតេយ្យចូលកាន់អំណាចនាដំណាច់ខែមីនា។
ថ្លែងនៅក្នុងជំនួបជាមួយលោកស្រីអ៊ុង សានស៊ូជី លោកចន ឃែរីបានថ្លែងសាទរពេញមាត់ពីការផ្លាស់ប្តូរនៅភូមាឆ្ពោះទៅកាន់លទ្ធិប្រជាធិបតេយ្យ បន្ទាប់ពីប្រទេសក្រីក្រនៅអាស៊ីមួយនេះបានឆ្លងកាត់របបផ្តាច់ការយោធាអស់ជាច្រើនទសវត្ស។ លោកចន ឃែរីបានថ្លែងយ៉ាងដូច្នេះថា ព្រឹត្តការណ៍ជាប្រវត្តិសាស្រ្តនៅភូមា គឺជាព្រឹត្តិការណ៍ប្រវត្តិសាស្រ្តសម្រាប់បុព្វហេតុប្រជាធិបតេយ្យនៅក្នុងពិភពលោក។ នៅក្នុងន័យនេះ លោកឃែរីមិនញញើតនឹងចាត់ចាត់ទុកលោកស្រីជ័យលាភីរង្វាន់ណូបែលសន្តិភាពថា ជាអ្នកដែលបានធ្វើចម្រើនបុព្វហេតុប្រជាធិបតេយ្យនៅទូទាំងពិភពលោក។
វត្តមានរបស់លោកចន ឃែរីក្នុងទឹកដីភូមាពេលនេះបានធ្វើឡើង បន្ទាប់ពីអាមេរិកទើបបានបន្ថយទ័ណ្ឌកម្មថ្មីៗទៀតដល់ភូមា។ សូមជម្រាបជូនថា អាមេរិកបានលើកទ័ណ្ឌកម្មជាច្រើនចេញពីភូមាតាំងពីឆ្នាំ ២០១១ តែបន្តរក្សាទុកបញ្ជីខ្មៅឈ្មោះឥស្សរជននយោបាយភូមាមួយចំនួនដែលជាប់ចោទពីបទបំផ្លិចបំផ្លាញប្រជាធិបតេយ្យរបស់ប្រទេស។ ជាការពិត វត្តមានរបស់លោកចន ឃែរីនៅភូមាជាសក្ខីកម្មមួយដែលអាមេរិកចង់បញ្ជាក់ពីការលើកទឹកចិត្ត និងការគាំទ្រចំពោះការផ្លាស់ប្តូរក្នុងផ្លូវវិជ្ជមាននៅភូមា។ តែមានកិច្ចការប្រឈមជាច្រើនដែលរដ្ឋាភិបាលថ្មីនៅភូមាត្រូវបំពេញ រួមមាន ការកសាងហេដ្ឋារចនាសម្ព័ន្ធឡើងវិញ បំបាត់ភាពក្រីក្រ និងដោះស្រាយជម្លោះជាមួយក្រុមជនជាតិភាគតិច។ល។ និង។ល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ