លោកម៉ាក្រុងយកការប្រយុទ្ធប្រឆាំងភេរវកម្ម ជាអាទិភាពក្នុងនយោបាយការទូតបារាំង
ថ្ងៃអង្គារនេះ ប្រធានាធិបតីបារាំង អេម៉ានុយអែល ម៉ាក្រុង បានសម្រេចផ្តោតនយោបាយការទូតបារាំង ទៅលើយុទ្ធនាការប្រយុទ្ធប្រឆាំងភេរវកម្ម។ លោកម៉ាក្រុងគូសបញ្ជាក់ថា គឺជាការប្រឆាំងនឹងភេរវកម្មអ៊ីស្លាមជ្រុលនិយម។ ថ្ងៃអង្គារនេះដែរ ប្រធានាធិបតីបារាំងបានចាត់ទុករបបដឺកនាំរបស់លោកម៉ាឌូរ៉ូនៅវ៉េណេស៊ុយអេឡា ថាជារបបផ្តាច់ការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
ថ្ងៃអង្គារនេះ ប្រធានាធិបតីបារាំងអេម៉ានុយអែល ម៉ាក្រុង បានថ្លែងសន្ទរកថា ទៅកាន់ឯកអគ្គរដ្ឋទូតបារាំង១៧០នាក់ ដើម្បីបង្ហាញពីនយោបាយការទូតបារាំង ក្នុងអាណត្តិដឹកនាំរបស់លោក។ លោកម៉ាក្រុង បានគូសបញ្ជាក់ឡើងវិញពីអាទិភាពនៃការប្រយុទ្ធប្រឆាំងភេរវកម្មអ៊ីស្លាមជ្រុលនិយម ក្នុងនយោបាយការទូតបារាំង។
ពាក្យថាអ៊ីស្លាមនេះ អាចបង្កភាពតានតឹងដល់ប្រជាជនអ្នកកាន់សាសនាអ៊ីស្លាមនៅបារាំង និងអឺរ៉ុប។ តែលោកម៉ាក្រុងលើកឡើងក្នុងន័យថា គេមិនអាចកាត់ផ្តាច់អំពើភេរវកម្ម អោយដាច់ចេញពីភាពជ្រុលនិយមទេ។ ប្រធានាធិបតីបារាំងបានគូសបញ្ជាក់ថា រឹតតែមិនត្រូវភ័យខ្លាចពីអ៊ីស្លាម ហើយក៏មិនត្រូវផ្តោតការសង្ស័យទូទៅ ទៅលើប្រជាជនអ៊ីស្លាមរាប់លាននាក់ ដែលកំពុងរស់នៅអឺរ៉ុបដែរ។
២ឆ្នាំមកនេះ បារាំងបានរងការវាយប្រហារភេរវកម្មជាច្រើន។ ទាហានបារាំងកំពុងបំពេញបេសកកម្មប្រឆាំងក្រុមជីហាត នៅតំបន់សាហារ៉ា នៅលីប៊ី អ៊ីរ៉ាក់ និងស៊ីរី។ ទាក់ទងភេរវកម្ម ពេលនេះ ប្រទេសតំបន់ឈូងសមុទ្រពែរស៍កំពុងចោទកាតា ថាបានផ្តល់ប្រាក់ឧបត្ថម្ភក្រុមភេរវជន។ ប្រធានាធិបតីបារាំងចង់អោយមានតម្លាភាពផ្នែកហិរញ្ញវត្ថុ ក្នុងរឿងនេះ។ ថ្ងៃអង្គារនេះដែរ លោកម៉ាក្រុងលើកឡើងដែរថា បារាំងប្រកាន់ខ្ជាប់ការអនុវត្តកិច្ចព្រមព្រៀងនុយក្លេអ៊ែរដែលអ៊ីរ៉ង់សម្រេចបានជាមួយប្រទេសមហាអំណាចកាលពីឆ្នាំ២០១៥។
កំឡុងដើមឆ្នាំ២០១៨ លោកម៉ាក្រុងនឹងបំពេញទស្សនកិច្ចនៅតំបន់ដើមបូព៌ា។ បារាំងបន្តប្រឹងប្រែងជាមួយអង្គការសហប្រជាជាតិគាំទ្រអោយមានការបង្កើតរដ្ឋ២ គឺប៉ាឡេស្ទីននិងអ៊ីស្រាអែល ដែលមានរដ្ឋធានីហ្ស៊េរុយសាឡិមតែមួយ ហើយប្រជាជនទាំង២រស់នៅក្នុងសន្តិភាពជាមួយគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ