លោកចន ឃែរី៖ម៉ូឡា មែនស៊ូបានគំរាមកំហែងជាអចិន្រ្តៃយ៍ដល់ទ័ពអាមេរិកនៅអាហ្វហ្កានីស្ថាន
នៅក្នុងប្រទេសអាហ្វហ្កានីស្ថាន ព័ត៌មានស្តីពីការស្លាប់មេតាលីបង់ម៉ូឡា មែនស៊ូត្រូវបានបញ្ជាក់ជាផ្លូវការពីរដ្ឋាភិបាលក្រុងកាប៊ូលនាថ្ងៃអាទិត្យ ទី២២ឧសភា។ ម៉ូឡា មែនស៊ូបានបាត់បង់ជីវិតនៅក្រោមប្រតិបត្តិការផ្លូវអាកាសរបស់យន្តហោះដ្រូនអាមេរិកកាលពីថ្ងៃសៅរ៍ ទី២១ ឧសភា។ ចាប់កំណើតក្នុងទសវត្សឆ្នាំ ៦០ ម៉ូឡា មែនស៊ូបានចូលជំនួសកន្លែងម៉ូឡា អូម៉ារដែលបានស្លាប់ក្នុងខែកក្កដា ឆ្នាំ ២០១៥។ ការស្លាប់ម៉ូឡា មែនស៊ូបានធ្វើឲ្យអាមេរិកធូរចិត្តច្រើន ព្រោះលោកប្រមុខការទូតអាមេរិកចន ឃែរីបានថ្លែងនាឱកាសដំណើរទស្សនកិច្ចនៅភូមានាថ្ងៃអាទិត្យ ទី២២ ឧសភាថា ម៉ូឡា មែនស៊ូបានបង្កការគំរាមជាអចិន្ត្រែយ៍ដល់ទ័ពអាមេរិកក្នុងទឹកដីអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
« មេតាលីបង់ម៉ូឡា មែនស៊ូបានបង្កការគំរាមកំហែងជាអចិន្រ្តៃយ៍ដល់កម្លំាងទ័ពអាមេរិកប្រចាំការក្នុងប្រទេសអាហ្វហ្កានីស្ថាន ដល់ប្រជាជនស៊ីវិលអាហ្វហ្កានីស្ថាន និងដល់កម្លាំងសន្តិសុខរបស់ប្រទេសអាហ្វហ្កានីស្ថាន។ យើងត្រូវតែបិទបញ្ចប់អំពើហិង្សា និងសេចក្តីឈឺចាប់គ្មានព្រំដែនដែលប្រជាជនអាហ្វហ្កានីស្ថានបានជួបប្រទះអស់ជាច្រើនឆ្នាំ។
គឺម៉ូឡា មែនស៊ូរូបនេះឯងដែលបានយកជើងរាទឹកនៅគ្រប់កិច្ចចរចាសន្តិភាព និងជាឧបសគ្គនៅក្នុងដំណើរស្វែងរកការបង្រួបបង្រួមជាតិរវាងគូបដិបក្ខនៅក្នុងប្រទេសអាហ្វហ្កានីស្ថាន។ ប្រតិបត្តិការយោធាឈានដល់ការសម្លាប់ម៉ូឡា មែនស៊ូ គឺជាសារច្បាស់ក្រឡែតមួយបញ្ជូនទៅសហគមន៍អន្តរជាតិ។
សារដែលបញ្ជាក់ថា យើងនឹងបន្តគាំទ្រប្រទេសដៃគូអាហ្វហ្កានីស្ថានរបស់យើងដែលបានបំពេញការងារយ៉ាងលំបាកលំបិនក្នុងការស្ថាបនាប្រទេសមួយឲ្យមានសន្តិភាព ស្ថិរភាព ការរួបរួម និងភាពសំបូររុងរឿង។ វាល្មមដល់ពេលដែលប្រជាជនអាហ្វហ្កានីស្ថានបិទបញ្ចប់សង្រ្គាមហែកហួរគ្នា និងចាប់ផ្តើមកសាងអនាគតរួមគ្នា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ