ល្បែងសងសឹកផ្នែកការទូតរវាងរុស្ស៊ីនិងអាមេរិក
ចុះផ្សាយនៅថ្ងៃ៖
ស្តាប់ - ០៥:៣២
សហរដ្ឋអាមេរិកតំរូវអោយរុស្ស៊ីបិទស្ថានកុងស៊ុលរបស់ខ្លួននៅSan Francisco និងកន្លែងឧបសម្ព័ន្ធការទូតពីរទៀត នៅវ៉ាស៊ីនតោន និងញូវយក អោយចប់សព្វគ្រប់ នៅថ្ងៃសៅរ៍ស្អែកនេះ។ អាមេរិកប្រាប់ថា ទណ្ឌកម្មនេះ គឺដើម្បីអោយស្មើភាពគ្នា ទៅនឹងការដែលលោកវ្លាឌីមៀ ពូទីន បានបញ្ជាអោយអាមេរិកកាត់បន្ថយបុគ្គលិកការទូតអាមេរិក ក្នុងទឹកដីរុស្ស៊ី។ តាមការកំណត់ ថ្ងៃសុក្រ១កញ្ញានេះ បុគ្គលិកការទូតខាងរុស្ស៊ីរឺក៏ខាងអាមេរិក ៧៥៥នាក់ ត្រូវឈប់បម្រើការនៅកុងស៊ុលរៀងៗខ្លួនទៀត។ រដ្ឋមន្ត្រីការបរទេសរុស្ស៊ី លោកស៊ែរហ្កី ឡាវ្រូវ បានសំដែងការសោកស្តាយ ចំពោះស្ថានការណ៍តានតឹងដែលបង្កឡើងដោយការសងសឹកទៅវិញទៅមកនេះ។
រដ្ឋមន្ត្រីការបរទេសរុស្ស៊ី លោកឡាវ្រូវ លើកឡើងថា គឺខាងភាគីអាមេរិកជាអ្នកផ្តើមរឿងមុន
បញ្ហាសងសឹកប្រទាក់ក្រឡាគ្នាតាំងពីអាណត្តិដឹកនាំរបស់លោកអូបាម៉ាមក គឺដោយសារអាមេរិកសង្ស័យថា រុស្ស៊ីលូកដៃចូលក្នុងការបោះឆ្នោតអាមេរិក ឆ្នាំ២០១៦។ ខាងរុស្ស៊ីលើកឡើងថា គឺអាមេរិកជាអ្នកផ្តើមរករឿងរុស្ស៊ីមុន។ បើគិតពីការបិទស្ថានកុងស៊ុលរុស្ស៊ីក្នុងទឹកដីអាមេរិក ពេលនេះ គឺដោយសារអាមេរិកសងសឹករុស្ស៊ី ដែលកាលពីចុងខែកក្កដា បានចាត់វិធានការបន្ថយបុគ្គលិកការទូតអាមេរិកដែលធ្វើការក្នុងទឹកដីរុស្ស៊ី អោយមកនៅត្រឹម៤៥៥នាក់។ រុស្ស៊ីថា កាត់ចេញ ៧៥៥នាក់ ដើម្បីអោយថយមកនៅ៤៥៥នាក់ គឺអោយស្មើនឹងបុគ្គលិកការទូតរុស្ស៊ី ធ្វើការក្នុងទឹកដីសហរដ្ឋអាមេរិកដែរ។
កន្លងមក អាមេរិកបានតបនឹងវិធានការរុស្ស៊ីបន្ថយការទូតអាមេរិកនេះរួចម្តងហើយ គឺថ្ងៃ២១សីហាកន្លងទៅ អាមេរិកបានផ្អាកការចេញទិដ្ឋាការអោយពលរដ្ឋរុស្ស៊ីមួយរយៈ។ ឥឡូវនេះ អាមេរិកសម្រេចបន្ថែមទណ្ឌកម្មបិទកុងស៊ុលរុស្ស៊ីនៅសាន់ហ្វ្រាន់ស៊ិសស្កូ និងបេសកកម្មមួយចំនួនរបស់រុស្ស៊ី ថែមទៀត។ អាមេរិកថា ដើម្បីអោយស្មើភាពគ្នា។ អញ្ចឹងបើអាមេរិកថាដើម្បីអោយស្មើភាពគ្នា មានន័យថា អាមេរិកចង់ចាញ់ចង់ឈ្នះជាមួយរុស្ស៊ីខ្លាំងណាស់ ទើបមិនអោយទណ្ឌកម្មរុស្ស៊ីលើសទណ្ឌកម្មអាមេរិកសូម្បីតែមួយចំណិត។ ទោះយ៉ាងនេះក្តី អាមេរិកប្រាប់ថា បុគ្គលិកការទូតដែលត្រូវឈប់ធ្វើការនៅស្ថានកុងស៊ុលរុស្ស៊ី អាចធ្វើការផ្នែកផ្សេងៗទៀត ក្នុងទឹកដីអាមេរិកបាន ពោលគឺអាមេរិកមិនធ្វើដល់ថ្នាក់បណ្តេញពួកគេពីទឹកដីអាមេរិកទេ។ រីឯខាងការចេញទិដ្ឋាការអោយពលរដ្ឋរុស្ស៊ី ក៏នឹងចាប់ផ្តើមដំណើរការឡើងវិញក្នុងពេលខាងមុខដែរ។ ប៉ុន្តែ ក៏មិនកំណត់ថា ត្រូវផ្តល់ទិដ្ឋាការក្នុងតួលេខច្រើនដូចមុនដែរ។
ស្ថានកុងស៊ុលរុស្ស៊ីនៅសាន់ហ្វ្រាន់ស៊ិសស្កូ បានបរិហារវិធានការអាមេរិកថា គ្មានលក្ខណៈមិត្តភាពទាល់តែសោះ។ ស្ថានកុងស៊ុលរុស្ស៊ីនៅសាន់ហ្វ្រាន់ស៊ិសស្កូ លើកឡើងពីបំណងល្អរបស់រុស្ស៊ី ដែលបានចេញទិដ្ឋាការអោយអ្នកទេសចរអាមេរិករហូតជាង១ម៉ឺន៦ពាន់ ក្នុងឆ្នាំ២០១៦កន្លងទៅ។
ប៉ុន្តែ បើនិយាយថា អាមេរិកសងសឹកព្រោះរុស្ស៊ីបានចាត់វិធានការបន្ថយបុគ្គលិកការទូតអាមេរិកក្នុងទឹកដីរុស្ស៊ីនោះ សូមរំលឹកបកទៅវិញថា លោកពូទីនតំរូវអោយដូច្នេះ ក៏ដើម្បីសងសឹកទៅនឹងសភាអាមេរិកដែលបានអនុម័តទណ្ឌកម្មប្រឆាំងរុស្ស៊ី កាលពីខែសីហាមុននេះដែរ។ ជាទណ្ឌកម្មសងសឹករុស្ស៊ី ព្រោះអាមេរិកចោទថា រុស្ស៊ីលូកដៃចូលក្នុងការបោះឆ្នោតប្រធានាធិបតីអាមេរិក ឆ្នាំ២០១៦។ សូម្បីតែលោកដូណាល់ ត្រាំ ដែលមានទំនោរទៅរុស្ស៊ី ក៏បានចុះហត្ថលេខាអោយប្រើទណ្ឌកម្មសភាដែរ ព្រោះលោកគ្មានជំរើស ព្រោះក្រុមការងារលោកក៏ជាប់សង្ស័យថា អាចជាប់ពាក់ព័ន្ធរុស្ស៊ីដែរ។
ទំនាក់ទំនងរុស្ស៊ី-អាមេរិកដុនដាបតាំងពីអាណត្តិលោកអូបាម៉ា។ ចុងខែធ្នូ ឆ្នាំ២០១៦ រដ្ឋបាលលោកអូបាម៉ាបានបណ្តេញមន្ត្រីទូតរុស្ស៊ី៣៥នាក់ និងគ្រួសារពួកគេផងដែរ អោយចេញពីអាមេរិក។ ទណ្ឌកម្មនេះ គឺដោយសារតែការសង្ស័យថា រុស្ស៊ីលូកដៃក្នុងការបោះឆ្នោតអាមេរិកដូចគ្នា។ កាលនោះ អាមេរិកក៏បានរឹបអូសអគាររបស់ស្ថានទូតរុស្ស៊ី ២ខ្នងផងដែរ ធ្វើអោយរុស្ស៊ីខឹងសម្បារមិនតិចទេ។ លោកត្រាំឡើងកាន់អំណាចធ្វើអោយគេសង្ឃឹមថា ទំនាក់ទំនងរុស្ស៊ី-អាមេរិកអាចប្រសើរឡើងវិញ ប៉ុន្តែ ដោយសារក្រុមការងារលោកអាចជាប់ពាក់ព័ន្ធនឹងរុស្ស៊ី បក្សកាន់អំណាចមិនសូវស្តាប់សំដីលោកត្រាំ ដែលបានការពាររុស្ស៊ីកន្លងមកទេ។
ទំនាក់ទំនងប្រទេសទាំង២កាន់តែដុនដាប។ នេះមិននិយាយពីសំណុំរឿងផ្សេងទៀត ដូចជាការដែលអាមេរិកចេញទណ្ឌកម្មបែបឯកតោភាគី ប្រឆាំងក្រុមហ៊ុនរឺក៏អ្នកវិនិយោគរុស្ស៊ី ដែលរងការចោទប្រកាន់ថា រកស៊ីជាមួយក្រុមហ៊ុនកូរ៉េខាងជើង រុស្ស៊ីក៏ខឹងអាមេរិកដែរ។ អាមេរិកតំរូវអោយបិទស្ថានកុងស៊ុលរុស្ស៊ីនៅសាន់ហ្វ្រាន់ស៊ិសស្កូ អោយរួចរាល់នៅថ្ងៃសៅរ៍ស្អែកនេះ។ តែអាមេរិកក៏ដូចជាខ្លាចរុស្ស៊ីសងសឹកតបមកវិញទៀតដែរ ព្រោះអាមេរិកលើកឡើងថា សង្ឃឹមថា រុស្ស៊ីមិនសងសឹកតបវិញទេ។ បើគិតឡើងវិញ គ្រាន់តែសង្ស័យថា រុស្ស៊ីលូកដៃចូលការបោះឆ្នោតអាមេរិក អាមេរិកដាក់ទណ្ឌកម្មបន្តបន្ទាប់មកហើយ។ តែរុស្ស៊ីវិញ ដូចជាដាក់តបទៅអាមេរិក បានតែម្តងនេះទេ គឺការបន្ថយបុគ្គលិកការទូតរុស្ស៊ី ក្នុងទឹកដីអាមេរិកនេះហើយ។
រដ្ឋមន្ត្រីការបរទេសរុស្ស៊ី និងអាមេរិក បង្ហាញជំហរស្តារទំនាក់ទំនងទ្វេភាគី អោយ ប្រសើរឡើងវិញ
កាលពីថ្ងៃព្រហស្បតិ៍ រដ្ឋមន្ត្រីការបរទេសអាមេរិក លោករិច ធីលឡឺសុន បានទូរសព្ទទៅរដ្ឋមន្ត្រីការបរទេសរុស្ស៊ី លោកស៊ែរហ្កី ឡាវ្រូវ សបង្ហាញថា អាមេរិកបន្ទន់ឥរិយាបថបន្តិចមកវិញ។ ភាគីទាំង២ បានបង្ហាញជំហរដូចគ្នា គឺចង់កាត់បន្ថយភាពតានតឹងជាមួយគ្នា ចង់អោយទំនាក់ទំនងទ្វេភាគីប្រសើរឡើងវិញ។ លោករដ្ឋមន្ត្រីការបរទេសរុស្ស៊ី ស៊ែរហ្កី ឡាវ្រូវ បានបង្ហាញការសោកស្តាយចំពោះស្ថានការណ៍តានតឹងបង្កឡើងដោយការសងសឹកគ្នានេះ។ តែរុស្ស៊ីនៅតែថា គឺអាមេរិកជាអ្នកផ្តើមរឿងមុន។ រុស្ស៊ីប្រាប់ថា នឹងពិនិត្យវិធានការសងសឹករបស់អាមេរិកនេះ ដោយប្រុងប្រយ័ត្នបំផុត ហើយនឹងបង្ហាញជាសាធារណៈនូវប្រតិកម្មរុស្ស៊ី តបវិធានការអាមេរិក។
ក្នុងខែកញ្ញានេះ រដ្ឋមន្ត្រីការបរទេសអាមេរិក និងរុស្ស៊ីនឹងជួបគ្នា ប្រហែលជាអាចជួបគ្នាក្នុងអង្គប្រជុំ អង្គការសហប្រជាជាតិ នៅក្រុងញូវយក។ រឿងសងសឹកគ្នាមិនចេះចប់ដូចកូនក្មេងបែបនេះ ខាងណាត្រូវ ខាងណាខុសក៏ដោយចុះ ដំណោះស្រាយ គឺគ្មានអ្វី ក្រៅពីឈប់បន្តទណ្ឌកម្មវាយប្រហារគ្នាទេ។ មិនដូច្នោះទេ រឿងមិនងាយបញ្ចប់ទេ ស្ថានការណ៍អាចកាន់តែដុនដាប ដោយសារអាមេរិកនិងរុស្ស៊ីជាអតីតសត្រូវគ្នាស្រាប់ផង ហើយអាចផ្តល់ផលវិបាកដល់ការដោះស្រាយសំណុំរឿងអន្តរជាតិផ្សេងៗទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ