សភាធម្មនុញ្ញដែលស្និទ្ធនឹងលោកម៉ាឌូរ៉ូសម្រេចដកហូតអភ័យឯកសិទ្ធិលោកហ្កាយដូ
នៅថ្ងៃអង្គារម្សិលមិញនេះ សភាធម្មនុញ្ញវ៉េណេស៊ុយអេឡាដែលស្មោះស័្មគ្រនឹងលោកប្រធានាធិបតីម៉ាឌូរ៉ូ បានសម្រេចដកហូតអភ័យឯកសិទ្ធិរបស់មេបក្សប្រឆាំងគឺលោកហ័ន ហ្កាយដូ។ ទន្ទឹមគ្នានេះ សភាធម្មនុញ្ញក៏បានបើកផ្លូវឱ្យតុលាការជាន់ខ្ពស់ កាត់ទោសលោកហ្កាយដូផងដែរ ពីបទធ្វើឲ្យប្រទេសជាតិធ្លាក់ផុងចូលក្នុងវិបត្តិធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ប្រធានសភាធម្មនុញ្ញវ៉េណេស៊ុយអេឡាលោកឌីយូសដាដូ កាប៊េយូ (Diosdado Cabello) បានប្រកាសឲ្យដឹងថា ក្រុមសមាជិកសភាដែលស្មោះស្ម័គ្រនឹងលោកនីកូឡា ម៉ាឌូរ៉ូ បានមូលមិតិគ្នាជាឯកច្ឆន្ទ សម្រេចអនុញ្ញាតឲ្យតុលាការកំពូលកាត់ទោសលោកហ្កាយដូ ពាក់ព័ន្ធនឹងបទចោទចំនួនពីរ។
បទចោទប្រកាន់ទី១ គឺពាក់ព័ន្ធនឹងករណីដែលលោកហ្កាយដូ ធ្វើឲ្យប្រទេសលិចលង់ក្នុងវិបត្តិ ដោយសារការប្រកាសតាំងខ្លួនជាប្រធានាធិបតីស្តីទីរបស់លោកកាលពីចុងខែមករាកន្លងទៅ។ រីឯ បទចោទទី២ វិញ គឺជាប់ទាក់ទងនឹងការប្រឆាំងទៅនឹងបម្រាមរបស់រដ្ឋាភិបាល ក្នុងការណ៍ដែលលោកហ្កាយដូ ធ្វើដំណើរចេញក្រៅប្រទេសមានជាអាទិ៍ប្រេស៊ីល កូឡុំប៊ី និងប៉ារ៉ាហ្កាយ កាលពីចុងខែកុម្ភៈនិងដើមខែមីនា កន្លងទៅថ្មីៗនេះ។
គួរជ្រាបថា ក្រោយត្រូវតុលាការធម្មនុញ្ញវ៉េណេស៊ុយអេឡា សម្រេចដកហូតយកអភ័យឯកសិទ្ធិ លោកហ្កាយដូ បានឲ្យដឹងថាលោកកំពុងបារម្ភខ្លាចត្រូវចាប់ខ្លួន ដោយអាជ្ញាធរវ៉េណេស៊ុយអេឡា ដែលសុទ្ធតែជាក្រុមដែលស្និទ្ធ និងដើរតាមលោកម៉ាឌូរ៉ូ។
គួរកត់សម្គាល់ទៀតថា ចំណាត់ការដកហូតអភ័យឯកសិទ្ធិរបស់លោកហ្កាយដូ ដែលជាប្រធានសភា ធ្វើឡើងគឺបន្ទាប់ពីរដ្ឋាភិបាលរបស់លោកម៉ាឌូរ៉ូ ប្រកាសដកមុខតំណែងតួនាទី និងដាក់បម្រាមលើលោកហ្កាយដូមិនឲ្យធ្វើនយោបាយរយៈពេល ១៥ ឆ្នាំកាលពីថ្ងៃទី ២៨ មីនា សប្តាហ៍មុន។ ជាការប្រកាស ដែលលោកហ្កាយដូ ចាត់ទុកថាមិនអាចយកជាការបាន ព្រមទាំងមិនស្របទៅតាមនីតិវិធីរបស់ប្រទេស។
រហូតមកដល់ពេលនេះ ក្រុមប្រទេសដែលគាំទ្រលោកហ្កាយដូ ចំនួនជាង ៥០ ប្រទេស រួមមានទាំងសហរដ្ឋអាមេរិកផង នៅមិនទាន់បានបញ្ចេញជាប្រតិកម្មអ្វីនោះទេ។ ក៏ប៉ុន្តែ នៅគ្រាកន្លងមក អាមេរិករបស់លោកត្រាំ ធ្លាប់បានប្រាប់ទៅលោកម៉ាឌូរ៉ូរួចហើយថា កុំឲ្យចាប់ខ្លួនលោកហ្កាយដូ ឲ្យសោះ។
ទោះជាយ៉ាងណាក៏ដោយ នាពេលនេះគេនៅមិនទាន់ដឹងប្រាកដនៅឡើយទេ ថាតើរបបដឹកនាំរបស់លោកម៉ាឌូរ៉ូ នឹងចាប់ខ្លួនលោកហ្កាយដូឬយ៉ាងណា។ ក៏ប៉ុន្តែ ក្នុងករណីដែលលោកត្រូវចាប់ខ្លួនពិតមែននោះ លោកអាចប្រឈមមុខនឹងការជាប់ពន្ធនាគារ ដោយសារលោកធ្លាប់ចាកចេញពីប្រទេសវ៉េណេស៊ុយអេឡា បំពានបម្រាមរបស់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ