តើចិនអាចប្រើលុយបំណុលជាអាវុធក្នុងសង្រ្គាមពាណិជ្ជកម្មជាមួយអាមេរិក?
ចុះផ្សាយនៅថ្ងៃ៖
ស្តាប់ - ០៤:៤៦
នៅក្នុងបរិបទនៃសង្រ្គាមពាណិជ្ជកម្ម រវាងសហរដ្ឋអាមេរិក និងចិន គេតែងតែចោទជាសំណួរថា តើអ្នកណាមានប្រៀបជាងអ្នកណា ហើយភាគីនីមួយៗមានចំណុចខ្លាំងអ្វី ដែលអាចយកមកធ្វើជាអាវុធ ដើម្បីយកប្រៀបលើគូប្រជែង? រហូតមកទល់នឹងពេលបច្ចុប្បន្ននេះ អាវុធដែលភាគីទាំងពីរលើកយកមកគំរាមគ្នាទៅវិញទៅមក គឺការដំឡើងពន្ធនាំចូល។ ក៏ប៉ុន្តែ ចិននៅមានអាវុធដ៏សំខាន់មួយទៀតដែលអាចធ្វើឲ្យអាមេរិកញញើត គឺបំណុលដ៏ច្រើនសន្ធឹកសន្ធាប់ដែលអាមេរិកជំពាក់ចិន។ តើចិនអាចប្រើលុយបំណុលនេះជាអាវុធដោយវិធីណា ហើយអាចមានប្រសិទ្ធភាពដែរឬទេ?
គ្រប់គ្នាសុទ្ធតែដឹងថា នៅក្នុងពេលបច្ចុប្បន្ននេះ ចិនគឺជាម្ចាស់បំណុលដ៏ធំបំផុតរបស់សហរដ្ឋអាមេរិក។ ក្នុងចំណោមប្រទេសដែលមានមូលបត្របំណុលរដ្ឋអាមេរិកនៅក្នុងដៃ ចិនគឺជាប្រទេសដែលមានច្រើនជាងគេ គឺមានជាទឹកប្រាក់រហូតដល់ទៅជាង១ពាន់ពាន់លានដុល្លារ (១ ១៧០ ០០០ ០០០ ០០០ ដុល្លារអាមេរិក)។
នៅក្នុងសង្រ្គាមពាណិជ្ជកម្មជាមួយអាមេរិក ចិនអាចមានជម្រើសមួយ គឺបញ្ចេញមូលបត្របំណុលរបស់អាមេរិកទាំងអស់នេះមកលក់នៅលើទីផ្សារ ដែលអាចនឹងបង្កនូវផលប៉ះពាល់ដ៏ធ្ងន់ធ្ងរបំផុតដល់សេដ្ឋកិច្ច និងហិរញ្ញវត្ថុរបស់អាមេរិក។
គេមិនត្រូវភ្លេចទេថា មូលបត្របំណុល ក៏ដូចជា ភាគហ៊ុន (មូលបត្រកម្មសិទ្ធិ) ឬក៏ទំនិញផ្សេងទៀតដែរ គឺគោរពទៅតាមច្បាប់នៃទីផ្សារសេរី។ ដូច្នេះ ប្រសិនបើចិនបញ្ចេញមូលបត្របំណុលរបស់អាមេរិកដ៏ច្រើនសន្ធឹកសន្ធាប់នេះមកលក់នៅលើទីផ្សារ តម្លៃមូលបត្រនេះនឹងត្រូវធ្លាក់ចុះ ហើយនៅពេលដែលមូលបត្របំណុលនេះលែងសូវមានតម្លៃ អ្នកវិនិយោគផ្សេងទៀតដែលមានមូលបត្របំណុលអាមេរិកនៅក្នុងដៃ ដូចជា ជប៉ុន ឬប្រទេសផ្សេងទៀត ឬក៏អ្នកវិនិយោគឯកជនផ្សេងទៀត ក៏ប្រាកដជានឹងនាំគ្នាប្រញាប់ប្រញាល់បញ្ចេញមូលបត្របំណុលដែលខ្លួនមានមកលក់នៅលើទីផ្សារដែរ ដើម្បីកុំឲ្យខាតបង់កាន់តែធ្ងន់ធ្ងរ។ នៅពេលនោះ វានឹងធ្វើឲ្យមូលបត្របំណុលរបស់អាមេរិកកាន់តែធ្លាក់ថ្លៃកាន់តែខ្លាំងថែមទៀត ហើយសម្រាប់មូលបត្របំណុល កាលណាតម្លៃធ្លាក់ចុះ គឺមានន័យថា អត្រាការប្រាក់នឹងត្រូវកើនឡើង។
អត្រាការប្រាក់កើនឡើងអាចនឹងបង្កនូវផលវិបាកធំៗចំនួនពីរ។
ទីមួយ រដ្ឋាភិបាលអាមេរិកនឹងត្រូវបង់ការប្រាក់ខ្ពស់ ដើម្បីខ្ចីបំណុលពីគេ ហើយនេះគឺជាបញ្ហាចោទដ៏ធំសម្រាប់អាមេរិក ដែលជាប្រទេសមានឧនភាពថវិកាយ៉ាងច្រើនសន្ធឹកសន្ធាប់ ជារៀងរាល់ឆ្នាំ ហើយបរិមាណបំណុលសាធារណៈក៏មានកម្រិតខ្ពស់ រហូតត្រូវប្រឈមមុខនឹងវិបត្តិបំណុលជាច្រើនលើករួចមកហើយ នាពេលកន្លងមក។
ទីពីរ គឺផលប៉ះពាល់ទៅលើឥណទានក្នុងវិស័យឯកជន។ អត្រាការប្រាក់កើនឡើង វានឹងធ្វើឲ្យក្រុមហ៊ុន និងអ្នកវិនិយោគមានការពិបាកក្នុងការស្វែងរកឥណទានជាងមុន ហើយត្រូវបង់ការប្រាក់ខ្ពស់ជាងមុន ដែលជាឧបសគ្គដ៏ធំមួយ នៅក្នុងវិស័យវិនិយោគឯកជន។ ក្នុងពេលជាមួយគ្នា វាក៏អាចធ្វើឲ្យការចំណាយរបស់ប្រជាជនទូទៅ នៅក្នុងទីផ្សារក្នុងស្រុកត្រូវធ្លាក់ចុះ។ ទាំងអស់នេះសុទ្ធតែជាកត្តាចម្បងៗ ដែលអាចធ្វើឲ្យកំណើនសេដ្ឋកិច្ចអាមេរិកត្រូវធ្លាក់ចុះ។
ក៏ប៉ុន្តែ ការបញ្ចេញមូលបត្របំណុលអាមេរិកមកលក់នៅក្នុងទីផ្សារនេះ ក៏នឹងបង្កផលប៉ះពាល់យ៉ាងច្រើនផងដែរដល់ចិនខ្លួនឯង ហើយផលប៉ះពាល់នេះអាចមាននៅត្រង់ចំណុចសំខាន់ៗពីរ។
ទីមួយ ផលប៉ះពាល់ខាងផ្នែកហិរញ្ញវត្ថុ។ ប្រសិនបើចិនបញ្ចេញមូលបត្របំណុលអាមេរិកទាំងអស់ដែលខ្លួនមានមកលក់នៅលើទីផ្សារ ហើយធ្វើឲ្យតម្លៃមូលបត្រនេះធ្លាក់ចុះខ្លាំង គឺមានន័យថា ចិនត្រូវលក់មូលបត្រអស់ទាំងនេះ ក្នុងតម្លៃទាបជាងកាលពីពេលដែលខ្លួនទិញ ពោលគឺលក់ខាត ហើយកាលណាតម្លៃមូលបត្របំណុលអាមេរិកធ្លាក់ចុះកាន់តែទាប ចិនក៏ត្រូវខាតលុយកាន់តែច្រើន។
ទីពីរ ផលប៉ះពាល់ខាងសេដ្ឋកិច្ច ជាពិសេស គឺវិស័យនាំចេញ។ នៅពេលដែលចិនបញ្ចេញមូលបត្របំណុលអាមេរិកមកលក់នៅលើទីផ្សារ គឺមានន័យថា ចិនកាត់បន្ថយការវិនិយោគជាដុល្លារ ហើយត្រូវយកដុល្លារដែលបានពីការលក់មូលបត្រនេះទៅដូរជារូបិយវត្ថុផ្សេង ដែលជាហេតុធ្វើឲ្យតម្លៃលុយដុល្លារអាមេរិកត្រូវធ្លាក់ចុះ។ នៅពេលដែលលុយដុល្លារធ្លាក់ថ្លៃ វានឹងធ្វើឲ្យផលិតផលរបស់អាមេរិកនៅលើទីផ្សារអន្តរជាតិមានភាពប្រកួតប្រជែងខ្ពស់ ហើយទំនិញរបស់ចិននឹងត្រូវពិបាករកទីផ្សារនាំចេញ។ នេះគឺជាបញ្ហាចោទដ៏ធំមួយ សម្រាប់ចិន ដែលសេដ្ឋកិច្ចនៅពឹងផ្អែកខ្លាំងលើការនាំចេញ។
ដូច្នេះ និយាយជារួមមកវិញ ការបញ្ចេញមូលបត្របំណុលអាមេរិកមកលក់នៅលើទីផ្សារ វាអាចនឹងបង្កនូវផលប៉ះពាល់ធ្ងន់ធ្ងរទៅដល់ហិរញ្ញវត្ថុ និងសេដ្ឋកិច្ចរបស់អាមេរិក ក៏ប៉ុន្តែ ក្នុងពេលជាមួយគ្នា ចិនខ្លួនឯងក៏ត្រូវរងនូវផលប៉ះពាល់មិនតិចនោះដែរ។ ដូច្នេះ ការយកមូលបត្របំណុលអាមេរិកមកធ្វើជាអាវុធ ក្នុងសង្រ្គាមពាណិជ្ជកម្មជាមួយអាមេរិក វាគួរតែជាជម្រើសចុងក្រោយមួយរបស់ចិន ហើយវាក៏អាស្រ័យផងដែរថា តើមេដឹកនាំចិនគិតថាខ្លួនមានលទ្ធភាព ហើយសុខចិត្តទ្រាំទ្រការខាតបង់បានត្រឹមកម្រិតណា?
ទាំងអស់នេះនៅមិនទាន់គិតផងដល់ចំណុចសំខាន់មួយទៀត ដែលអាចនឹងធ្វើឲ្យអាវុធរបស់ចិនមិនសូវមានឥទ្ធិពល គឺភាពទាក់ទាញនៃមូលបត្របំណុលរដ្ឋអាមេរិកនៅលើទីផ្សារអន្តរជាតិ។ រហូតមកទល់នឹងពេលបច្ចុប្បន្ននេះ អ្នកវិនិយោគជាទូទៅតែងតែនាំគ្នាសំឡឹងឃើញមូលបត្របំណុលរដ្ឋអាមេរិកថាជាវិនិយោគដែលមានសុវត្ថិភាពបំផុត ដែលគួរជាទីទុកចិត្ត។ ដូច្នេះ វាគឺជារឿងដែលអាចទៅរួចដែលថា នៅពេលដែលចិនបញ្ចេញមូលបត្រអស់ទាំងនេះមកលក់នៅលើទីផ្សារ អ្នកវិនិយោគផ្សេងទៀតនឹងនាំគ្នាប្រមូលទិញមូលបត្រនេះ ដែលធ្វើឲ្យតម្លៃមូលបត្របំណុលនេះមិនសូវធ្លាក់ចុះខ្លាំង ហើយជាលទ្ធផល ផលប៉ះពាល់ទៅលើអាមេរិកក៏មិនសូវមានខ្លាំងដូចអ្វីដែលចិនរំពឹងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ