អតីតប្រធានក្រុមឃោសនាបោះឆ្នោតរបស់លោកត្រាំត្រូវកាត់ទោសដាក់ពន្ធនាគារ ៤៧ខែ
នៅថ្ងៃព្រហស្បតិ៍ ម្សិលមិញនេះ លោក Paul Manafort អតីតប្រធានក្រុមឃោសនាបោះឆ្នោត ឲ្យលោកប្រធានាធិបតីអាមេរិកដូណាល់ ត្រាំ ត្រូវបានតុលាការកាត់ទោសឲ្យជាប់ពន្ធនាគាររយៈពេលជិត ៤ ឆ្នាំ ពាក់ព័ន្ធនឹងករណីគេចពន្ធ និងកេងបន្លំលុយធនាគារ។ ក្រៅពីនេះ លោក Manafort ក៏ត្រូវប្រឈមនឹងការកាត់ទោសពីតុលាការអាមេរិក លើករណីផ្សេងទៀតផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ការកាត់ទោស លោក Manafort ដែលធ្លាប់ជាមនុស្សស្និទ្ធម្នាក់របស់លោកដូណាល់ ត្រាំ គឺជាការរឿងក្តីដ៏ធំមួយ ដែលកើតចេញអំពីការស៊ើបអង្កេតរបស់លោក Mueller ជារដ្ឋអាជ្ញាពិសេស ដែលធ្វើការតាមដានពាក់ព័ន្ធនឹងការជ្រៀតជ្រែក របស់ប្រទេសរុស្ស៊ី ក្នុងការបោះឆ្នោតនៅសហរដ្ឋអាមេរិកនាឆ្នាំ ២០១៦។
លោក Manafort ត្រូវបានតុលាការអាមេរិក ទម្លាក់បទចោទប្រកាន់ចំនួន ៥ កាលពីខែសីហា ឆ្នាំ ២០១៨។ បទចោទទាំងនោះ ទាក់ទងទៅនឹង ករណីដាក់ឯកសារបញ្ជាក់ពន្ធលើប្រាក់ចំណូលមិនត្រឹមត្រូវ ការកេងបន្លំលុយធនាគារ និងការខកខានមិនបានរាយការណ៍ពីគណនីធនាគារនៅបរទេស។
រដ្ឋអាជ្ញាអាមេរិកបានចោទប្រកាន់ លោក Manafort ថាបានប្រើប្រាស់គណនីធនាគារនៅក្រៅប្រទេសមួយចំនួន ដើម្បីលាក់លៀមពី ទឹកប្រាក់ ចំនួនប្រមាណជា ៥៥ លានដុល្លារ ដែលលោករកបាន ពីការងារជាអ្នកផ្តល់ប្រឹក្សា ទៅឲ្យអ្នកនយោបាយអ៊ុយក្រែន។ ទាក់ទងរឿងនេះដែរ បើតាមចៅក្រម តុលាការបានបញ្ជាឲ្យលោក Manafort បង់ប្រាក់សំណងចំនួនរាប់លានដុល្លារ និងពិន័យជាប្រាក់ចំនួន ៥ ម៉ឺនដុល្លារ។
ស្ថិតក្នុងវ័យ ៦៩ ឆ្នាំ និងអង្គុយលើរទេះរុញ ពេលចូលសវនាការ ដោយសារតែរងគ្រោះពីជម្ងឺលើសឈាម លោក Manafort នឹងត្រូវប្រឈមនឹងការកាត់ទោសមួយទៀត នៅសប្តាហ៍ក្រោយ ក្នុងទីក្រុងវ៉ាស៊ីនតោន។ មួយវិញទៀត បើតាមទីភ្នាក់ងារសារព័ត៌មានបារាំង AFP លោក Manafort អាចត្រូវកាត់ទោសឲ្យជាប់ពន្ធនាគារយ៉ាងតិចចំនួន ១០ ឆ្នាំចំពោះសវនាការខាងលើនេះ ការណ៍ដែលលោកធ្លាប់ធ្វើការចំនួន ១០ ឆ្នាំឲ្យរុស្ស៊ី នៅក្នុងប្រទេសអ៊ុយក្រែន និងមិនមានជាប់ពាក់ព័ន្ធអ្វី ទៅនឹងសំណុំរឿងដែលរុស្ស៊ីលូកដៃក្នុងការបោះឆ្នោតនៅអាមេរិកឡើយ។
គួររំឭកជូនថា លោក Paul Manafort គឺជាអតីតសហការីដ៏ជំនិតម្នាក់ ក្នុងចំណោមអតីតសហការី និងមនុស្សជំនិតរបស់លោកត្រាំផ្សេងទៀត ដែលត្រូវបានចោទប្រកាន់ដោយលោក Mueller។ លោក Mueller គឺជារដ្ឋអាជ្ញាពិសេសអាមេរិក ដែលទទួលបន្ទុកផ្នែកស៊ើបអង្កេត ពាក់ព័ន្ធទៅនឹងការចូលជ្រៀតជ្រែករបស់រុស្ស៊ី នៅក្នុងការបោះឆ្នោតប្រធានាធិបតីអាមេរិកកាលពីឆ្នាំ ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ