អ្នកកាសែតប្រឆាំងរដ្ឋាភិបាលហ្វីលីពីនត្រូវបានដោះលែងឲ្យនៅក្រៅឃុំបណ្តោះអាសន្ន
នៅថ្ងៃព្រហស្បតិ៍ ទី១៤ កុម្ភៈ អ្នកកាសែតហ្វីលីពីនម្នាក់ដែលនិយមសរសេររឿងរិះគន់ពីរបៀបដឹកនាំប្រទេសរបស់លោកឌុយទែរតេត្រូវបានអនុញ្ញាតឲ្យនៅក្រៅឃុំជាបណ្តោះអាសន្ន បន្ទាប់ពីជាប់ឃុំឃាំងរយៈពេលមួយយប់រួចមក។ ការចាប់ខ្លួនអ្នកកាសែតនេះបានធ្វើឲ្យសហគមន៍អន្តរជាតិផ្ទុះប្រតិកម្មប្រឆាំង និងថានេះជាយុទ្ធសាស្ត្របង្ក្រាប របស់រដ្ឋាភិបាលហ្វីលីពីនទៅលើក្រុមអ្នកកាសែតដែលមាននិន្នាការប្រឆាំងនឹងលោកប្រធានាធិបតីឌុយទែរតេ។
ចុះផ្សាយនៅថ្ងៃ៖ កែប្រែថ្ងៃទី៖
ក្រោយជាប់ឃុំឃាំងរយៈពេលមួយយប់ ពោលនៅយប់ថ្ងៃពុធ ទី១៣ កុម្ភៈ អ្នកកាសែតប្រឆាំងគឺអ្នកស្រីម៉ារីយ៉ា រ៉េសា (Maria Ressa) ត្រូវបានអាជ្ញាធរហ្វីលីពីន សម្រេចដោះលែងឲ្យនៅក្រៅឃុំបណ្តោះអាសន្ន ក្រោយបង់ប្រាក់ធានាចំនួន ១ ៩០០ ដុល្លារសហរដ្ឋអាមេរិករួចមក។
ការឃុំខ្លួនអ្នកស្រីបានធ្វើឲ្យគេគិតថា វាគឺជាការគំរាមកំហែងនិងដាក់សំពាធរបស់ក្រុមអ្នកមានអំណាចហ្វីលីពីន ទៅលើអ្នកស្រី ព្រមទាំងវេបសាយព័ត៌មានរបស់អ្នកស្រីផងដែរ។
មួយវិញទៀត ការចាប់ខ្លួនអ្នកកាសែតប្រឆាំងនៅពេលនេះ បានធ្វើឲ្យសហគមន៍អន្តរជាតិ បញ្ចេញប្រតិកម្មរិះគន់ជាខ្លាំង។ ជាក់ស្តែង តំណាងគណៈកម្មការការពារអ្នកការសែត ដែលមានទីតាំងនៅសហរដ្ឋអាមេរិកនិយាយថា ចំណាត់ការរបស់រដ្ឋាភិបាលហ្វីលីពីន គឺមិនអាចទទួលយកបានទាល់តែសោះឡើយ ហើយបានទាមទារឲ្យ អាជ្ញាធរដោះលែងអ្នកស្រី រ៉េសា ឲ្យមានសេរីភាពពេញលេញ និងបញ្ឈប់នូវរាល់ការធ្វើទុក្ខបុកម្នេញទៅលើក្រុមអ្នកកាសែតប្រឆាំង។
ទាក់ទងរឿងនេះដែរ អតីតមន្ត្រីរដ្ឋាភិបាលអាមេរិកម្នាក់ បានសរសេរនៅលើបណ្តាញសង្គម Twitter ថា ការចាប់ខ្លួនអ្នកការសែតប្រឆាំងអ្នកស្រី រ៉េសា ពីសំណាក់រដ្ឋាភិបាលហ្វីលីពីនគឺជារឿងដែលមិនអាចទទួលយកបានឡើយ ហើយគ្រប់ប្រទេសកាន់លទ្ធិប្រជាធិបតេយ្យទាំងអស់គួរមានចំណាត់ការឆ្លើយតបទៅនឹងទង្វើបែបនេះ។
សូមរំឭកថា មានវ័យ៥៥ ឆ្នាំ អ្នកស្រី រ៉េសា គឺជាអ្នកកាសែតចាស់វស្សាម្នាក់។ នៅគ្រាកន្លងមក អ្នកស្រីតែងតែសរសេរព័ត៌មានរិះគន់រដ្ឋាភិបាលហ្វីលីពីន។ ជាពិសេសរឿងដែលគេឧស្សាហ៍ឃើញអ្នកស្រីចុះផ្សាយគឺពាក់ព័ន្ធនឹងគោលនយោបាយកណ្តាប់ដៃដែករបស់លោកប្រធានាធិបតី ឌុយទែរតេ ក្នុងការបង្ក្រាបការជួញដូរគ្រឿងញៀន។ ជាការបង្ក្រាបដែលបានសម្លាប់មនុស្សរាប់ពាន់នាក់ និងទទួលបានការរិះគន់យ៉ាងខ្លាំងពីសំណាក់ក្រុមអ្នកការពារសិទ្ធិមនុស្ស។
ក្រោយត្រូវដោះលែង អ្នកស្រី រ៉េសា បានប្រាប់ទៅកាន់អ្នកសារព័ត៌មានថា ការចាប់ខ្លួនអ្នកស្រីគឺជាសញ្ញាដែលរដ្ឋាភិបាលប្រាប់យ៉ាងច្បាស់ (…) ឲ្យលោកស្រីបិទមាត់ ឈប់ទិតៀនលោកឌុយទែរតេទៀត បើមិនដូច្នោះទេអ្នកស្រីនឹងមានគ្រោះថ្នាក់ជាមិនខាន។
តែទោះជាយ៉ាងណាក្តី អ្នកស្រីអះអាងថាអ្នកស្រីមិនចាញ់សំឡុតរបស់រដ្ឋាភិបាលឡើយ ហើយនៅតែបន្តបេសកកម្មរបស់អ្នកស្រីក្នុងការបង្ហាញការពិតក្នុងសង្គមហ្វីលីពីនតាមរយៈអាជីពជាអ្នកកាសែតបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ