សមាជិកសភាហ្វីលីពីនម្នាក់ ត្រូវបានបាញ់សម្លាប់
សមាជិកសភាហ្វីលីពីនម្នាក់ ត្រូវបានបាញ់សម្លាប់ ដោយខ្មាន់កាំភ្លើង នៅកន្លែងប្រារព្ធពិធីបុណ្យអូណែលមួយ ក្នុងទីក្រុងដារ៉ាហ្គា កាលពីថ្ងៃសៅរ៍ ទី២២ ខែធ្នូ ឆ្នាំ ២០១៨ ។ នេះ បើតាមការលើកឡើងរបស់ប៉ូលិសហ្វីលីពីន ដោយបានបញ្ជាក់បន្ថែមថា មួយរយៈចុងក្រោយនេះ អំពើហិង្សាផ្នែកនយោបាយ បានក្លាយទៅជា បញ្ហាដ៏ក្តៅគគុក និងល្បីល្បាញខ្លាំងបំផុតនៅក្នុងប្រទេសហ្វីពីលីន។
ចុះផ្សាយនៅថ្ងៃ៖ កែប្រែថ្ងៃទី៖
រហូតមកដល់ពេលនេះ មូលហេតុនៅពីក្រោយការបាញ់សម្លាប់ តំណាងរាស្ត្រហ្វីលីពីនលោក Rodel Batocabe នៅមិនទាន់គេរកឃើញនៅឡើយទេ។ ក៏ប៉ុន្តែ អាជ្ញាធរហ្វីលីពីន បានប្រាប់ឲ្យដឹងថា ពួកគេកំពុងស៊ើបអង្កេតថា តើករណីឃាតកម្មនេះ មានពាក់ព័ន្ធនឹងហេតុផលនយោបាយឬក៏អត់។
ទាក់ទិនរឿងនេះដែរ ប៉ូលិសហ្វីលីពីនម្នាក់ បានប្រាប់ទីភ្នាកងារព័ត៌មានបារាំង AFP ថា លោក Batocabe ត្រូវបានគេបាញ់សម្លាប់ នៅខណៈ ពេលដែលលោកដើរចែកកាដូ ជូនដល់មនុស្សម្នា នៅឯទីក្រុងដារ៉ាហ្គា។ មុនពេលកើតហេតុ ខ្មាន់កាំភ្លើងបានបន្លំលាក់ខ្លួនក្នុងហ្វូងមនុស្ស ហើយរង់ចាំឪកាសល្អ បាញ់សំដៅ លោក តែម្តង។ នៅក្នុងហេតុការណ៍នេះ អង្គរក្សម្នាក់របស់លោក Batocabe ក៏ត្រូវបានបាញ់សម្លាប់ផងដែរ។
គួរជម្រាបជូនថា មុនពេលករណីឃាតកម្ម សមាជិកសភាហ្វីលីពីន លោក Batocabe ធ្លាប់បានប្រកាសស្តីអំពីគម្រោងចង់ឈរឈ្មោះជាចៅហ្វាយក្រុង ដារ៉ាហ្គា សម្រាប់ការបោះឆ្នោតពាក់កណ្តាលអាណត្តិ ដែលនឹងប្រព្រឹត្តទៅនៅក្នុងខែឧសភា ឆ្នាំ២០១៩ ខាងមុខ។
សូមជ្រាបផងដែរថា ក្នុងអំឡុងពេលដែលមានការរៀបចំការបោះឆ្នោតសំខាន់ណាមួយ កើតឡើងនៅក្នុងប្រទេស សង្គមហ្វីលីពីនជាញឹកញយ តែងតែត្រូវបានរួមរឹតទៅដោយ អំពើហិង្សា និងការបំភិតបំភ័យ ជាដើម។ល។
ជាក់ស្តែង មុនត្រូវបានបាញ់សម្លាប់ លោក Batocabe ធ្លាប់បានលើកឡើងពីការព្រួយបារម្ភរបស់លោកដែលថា គូប្រជែងរបស់លោក ក្នុងការដណ្តើមតំណែងចៅហ្វាយក្រុង ដារ៉ាហ្គា ធ្លាប់បានប្រើប្រាស់ឥទ្ធិពល និងកម្លាំងប្រដាប់អាវុធដើម្បីអាចឈ្នះការប្រកួតប្រជែង។
គួររំឭកជូនផងដែរ ករណីបាញ់សម្លាប់តំណាងរាស្ត្រ នៅក្នុងប្រទេសហ្វីលីពីន មុនពេលបោះឆ្នោត ឧស្សាហ៍កើតមានញឹកញាប់ណាស់។ ជាក់ស្តែង នៅដើមឆ្នាំនេះ២០១៨នេះ តំណាងរាស្ត្រហ្វីលីពីនម្នាក់ ត្រូវបានបាញ់សម្លាប់ នៅខាងក្រៅវិហារកាតូលិក នៅឯជាយក្រុងម៉ានីល។
ដោយមើលថា ស្ថានភាពនយោបាយមិនល្អ នៅតែបន្តកើតឡើងក្នុងប្រទេស សមាជិកព្រឹទ្ធសភាហ្វីលីពីនម្នាក់ គឺលោក Grace Poe បានចេញមុខរិះគន់អំពី ការធ្វើឃាតទៅលើអ្នកនយោយនានា ដោយបានទទូចថា ប្រវត្តិហិង្សានយោបាយដ៏អាក្រក់នៅក្នុងសង្គមហ្វីលីពីន គួរត្រូវបានបិទបញ្ចប់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ