អតីតប្រធានក្រុមហ៊ុនធានារ៉ាប់រងចិន ជាប់ទោស១៨ឆ្នាំ ពីបទលួចបន្លំប្រាក់ក្រុមហ៊ុនជាង១០ពាន់លានដុល្លា
កាលពីថ្ងៃព្រហស្បត្តិ៍ អតីតប្រធានក្រុមហ៊ុនធានារ៉ាប់រង Anbang របស់ចិនមួយរូប ដែលមានទ្រព្យសម្បត្តិពាន់លានដុល្លានិងធ្វើអាជីវកម្មជាច្រើនទាំងក្នុងនិងក្រៅប្រទេស ត្រូវបានកាត់ទោសអោយជាប់ពន្ធនាគាររយៈពេល១៨ឆ្នាំ ពីបទលួចបន្លំប្រាក់ក្រុមហ៊ុនជាង១០ពាន់លានដុល្លា។
ចុះផ្សាយនៅថ្ងៃ៖
កាលពីថ្ងៃព្រហស្បត្តិ៍ម្សិលមិញនេះ តុលាការចិនបានសំរេចកាត់ទោសអតីតប្រធានក្រុមហ៊ុនធានារ៉ាប់រងAnbangរបស់ចិន ដែលមានឈ្មោះថា Wu Xiaohui អោយជាប់ពន្ធនាគាររយៈពេល១៨ឆ្នាំ ព្រមទាំងរឹបអូសទ្រព្យសម្បត្តិរបស់លោកចំនួន១.៦ពាន់លានដុល្លាផងដែរ។ ការសំរេចនេះ គឺបានធ្វើឡើងក្រោយពីរកឃើញថា លោក Wu បានកេងប្រវ័ញ្ចនិងលួចបន្លំប្រាក់របស់ក្រុមហ៊ុនAnbangជាង១០ពាន់លានដុល្លា តាមរយៈការបង្វែរលុយទៅកាន់ក្រុមហ៊ុនផ្សេងៗទៀតដែលលោកគ្រប់គ្រង ក្នុងចន្លោះឆ្នាំ ២០១១និង២០១៧។
ក្រុមហ៊ុនAnbang ត្រូវបានបង្កើតឡើងក្នុងឆ្នាំ២០០៤ ក្នុងនាមជាក្រុមហ៊ុនធានារ៉ាប់រងរថយន្ត តែលោក Wu បានប្រែក្លាយក្រុមហ៊ុនមួយនេះអោយទៅជាក្រុមហ៊ុនហិរញ្ញវត្ថុខា្នតធំមួយ ដែលធ្វើអាជីវកម្មក្នុងប្រទេសជាច្រើនទូទាំងពិភពលោក។
សកម្មភាពអាជីវកម្មធំៗក្រៅប្រទេសរបស់ Anbang រួមមានការទិញយកសណ្ឋាគារ Waldorf Astoria ក្នុងទីក្រុងញូវយ៉កកាលពីឆ្នាំ២០១៤ ដែលមានតម្លៃជិត២ពាន់លានដុល្លា និងការដេញថ្លៃក្រៅប្រទេសដែលមានតម្លៃរាប់ពានលានដុល្លាផ្សេងទៀត។
ការធ្វើអាជីវកម្មដែលមានចំនួនទឹកប្រាក់ដ៏ច្រើនរបស់Anbang បានទាញនូវការចាប់អារម្មណ៍ខ្លាំងពីមន្ត្រីអាជ្ញាធររបស់រដ្ឋាភិបាល ហើយការត្រួតពិនិត្យទៅលើក្រុមហ៊ុននេះត្រូវបានធ្វើឡើងរឹតតែតឹងរឹង។
រហូតដល់ដើមឆ្នាំ២០១៧ ភ្នាក់ងាររដ្ឋាភិបាលចិនទទួលបន្ទុកផ្នែកសេវាកម្មធានារ៉ាប់រង បានរឹបអូសយកទាំងស្រុងនូវការគ្រប់គ្រងលើប្រតិបត្តិការរបស់Anbang រយៈពេល១ឆ្នាំ ដែលនេះជាផ្នែកមួយនៃវិធានការរបស់រដ្ឋាភិបាលក្នុងការការពារ កុំអោយក្រុមហ៊ុនឯកជនខ្នាតធំដែលមានបំណុលច្រើនដួលរលំ ដែលអាចបង្កជាហានិភ័យដល់ប្រព័ន្ធហិរញ្ញវត្ថុទាំងមូល។
ទន្ទឹមនឹងការរឹបអូសនោះ លោក Wu Xiaohui ត្រូវបានបញ្ឈប់ពីតំណែង ហើយត្រូវចោទប្រកាន់ពីបទកេងប្រវ័ញ្ចប្រាក់ក្រុមហ៊ុន Anbang ក្នុងអាណត្តិជាប្រធានក្រុមហ៊ុនរបស់លោក។ ករណីនេះ ត្រូវបានស៊ើបអង្កេតចាប់តាំងពីពេលនោះ រហូតដល់ការប្រកាសកាត់ទោសកាលពីម្សិលមិញនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ