អ.ស.ប.៖មានពលរដ្ឋកូរ៉េខាងជើង ៣ភាគ៤ ត្រូវការជំនួយមនុស្សធម៌ជាបន្ទាន់
អង្គការសហប្រជាជាតិបានសម្តែងក្តីបារម្ភរបស់ខ្លួនចំពោះកង្វះអាហារបរិភោគនៅក្នុងទឹកដីកូរ៉េខាងជើង។ នៅក្នុងរបាយការណ៍មួយមានចំណងជើងថា « សាធារណរដ្ឋកូរ៉េ ២០១៦៖តម្រូវការ និងអាទិភាព » ចេញផ្សាយថ្ងៃព្រហស្បតិ៍ ទី២១ មេសា អង្គការសហប្រជាជាតិបានប្រាប់ឲ្យដឹងថា មានពលរដ្ឋកូរ៉េខាជើងជាង ៣ភាគ៤ត្រូវការជំនួយមនុស្សធម៌គ្រប់បែបជាបន្ទាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
អង្គការសហប្រជាជាតិមិនបានស្តីបន្ទោសអ្វីធំដុំដាក់រដ្ឋអំណាចកូរ៉េខាងជើងទេ តែបានបញ្ជាក់នៅក្នុងរបាយការណ៍របស់ខ្លួនថា ទោះបីជាមានការប្រឹងប្រែងគ្រប់បែបយ៉ាងរបស់រដ្ឋអំណាច ពិសេសនៅក្នុងវិស័យកសិកម្មក៏ដោយ ក៏វិស័យមួយនេះនៅមិនទាន់អាចផ្តល់ផលិផលគ្រប់គ្រាន់ដើម្បីចិញ្ចឹមជីវិតពលរដ្ឋកូរ៉េខាងជើងទាំង ២៥លាននាក់បានទេ។ មូលហេតុមកពីភាពរាំងស្ងួតដែលបានកាត់បន្ថយការប្រមូលផលកសិកម្មយ៉ាងច្រើននាឆ្នាំកន្លងទៅ។
យោងតាមរបាយការណ៍របស់អង្គការសហប្រជាជាតិ មានពលរដ្ឋកូរ៉េខាងជើងជាង ៣ភាគ៤ ពោលជាង ១៨លាននាក់កំពុងស្ថិតក្នុងស្ថានភាពខ្វះអាហារបរិភាគ និងត្រូវការជំនួយមនុស្សធម៌គ្រប់បែបជាបន្ទាន់។ ទន្ទឹមគ្នានេះ របាយការណ៍ក៏បានសម្តែងការខកចិត្តចំពោះសហគមន៍អន្តរជាតិដែលមិនបានចាប់អារម្មណ៍ពីវិបត្តិកង្វះស្បៀងអាហារនៅកូរ៉េខាងជើង។ របាយការណ៍ដដែលបានអះអាងថា កង្វះអាហារបរិភោគនៅកូរ៉េខាងជើងបានក្លាយជាក្តីកង្វល់ដែលមិនអាចមើលរំលងបាន ព្រោះវាជាមូលហេតុមួយនៃការស្លាប់ និងការឈឺស្កាត់ ពិសេសនៅលើស្រ្តីភេទ និងកុមារមានអាយុក្រោម ៥ឆ្នាំ។
ថ្មីៗកន្លងទៅនេះ របាយការណ៍ឆ្នាំ ២០១៥ របស់អង្គការស្បៀងអាហារ និងកសិកម្មពិភពលោកហៅកាត់ថា FAO បានឲ្យដឹងថា អត្រានៃចំនួនពលរដ្ឋកូរ៉េខាងជើងខ្វះអាហារបរិភាគក្នុងចន្លោះឆ្នាំ ២០១៤-២០១៦ មានចំនួន ៤១,៦% ពោលមានការកើនឡើងបើធៀបនឹងចន្លោះឆ្នាំ ២០០៥-២០០៧ ដែលមាន ៣៥,៥%។ សូមជម្រាបជូនថា ភាពរាំងស្ងួត ការគ្រប់គ្រងមិនបានល្អ និងការចំណាយលុយច្រើននៅក្នុងកម្មវិធីនុយក្លេអ៊ែរ គឺជាប្រភពនៃគ្រោះទុរ្ភិក្សសម្លាប់ពលរដ្ឋកូរ៉េខាងជើងជាច្រើនម៉ឺននាក់ក្នុងពាក់កណ្តាលទសវត្សឆ្នាំ ៩០។
អ្វីជាក្តីបារម្ភរបស់អង្គការសហប្រជាជាតិពេលនេះ គឺមិនចង់ឃើញគ្រោះទុរ្ភិក្សកើតមានជាថ្មីនៅកូរ៉េខាងជើង។ សូមជម្រាបជូនថា ជំនួយអន្តរជាតិ ពិសេសជំនួយអាមេរិក និងជំនួយកូរ៉េខាងត្បូងជិតខាងសម្រាប់កូរ៉េខាងជើងបានកាត់បន្ថយច្រើន ដោយសារតែភាពតានតឹងនុយក្លេអ៊ែរបង្កឡើងដោយរបបក្រុងព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ