លោកដូណាល់ត្រាំលើកយករឿងអាកាសធាតុត្រជាក់ខ្លាំងនៅអាមេរិកមកចំអករឿងឡើងកម្តៅផែនដី
ទីក្រុងមួយចំនួននៅសហរដ្ឋអាមេរិកកំពុងតែប្រឈមមុខនឹងអាកាសធាតុត្រជាក់ខ្លាំងកម្រជួប នៅក្នុងរយៈពេលប៉ុន្មានទសវត្សរ៍ចុងក្រោយនេះ។ អាជ្ញាធរនៅតាមក្រុងអស់ទាំងនោះបានប្រកាសឲ្យប្រជាជនមានការប្រុងប្រយ័ត្ន។ ចំណែកលោកដូណាល់ត្រាំវិញ បានឆ្លៀតយកអាកាសធាតុត្រជាក់នេះ មកចំអករឿងការឡើងកម្តៅនៃភពផែនដី ដែលលោកតែងតែបដិសេធមិនព្រមជឿតាំងពីដើមរៀងមក។
ចុះផ្សាយនៅថ្ងៃ៖
សរសេរនៅលើទំព័រធ្វីតធ័រ (Twitter) របស់លោក កាលពីថ្ងៃព្រហស្បតិ៍ លោកដូណាល់ត្រាំបានលើកឡើងថា នៅតំបន់ប៉ែកខាងកើតសហរដ្ឋអាមេរិកអាកាសធាតុចុះត្រជាក់ខ្លាំងមិនធ្លាប់មាន។ ប្រសិនបើមានការឡើងកម្តៅនៃភពផែនដីបន្តិចប្រហែលជាល្អ។ ការឡើងកម្តៅនៃភពផែនដីដែលអាមេរិកខំចំណាយលុយរាប់ពាន់លានដុល្លារដើម្បីទប់ស្កាត់។
In the East, it could be the COLDEST New Year’s Eve on record. Perhaps we could use a little bit of that good old Global Warming that our Country, but not other countries, was going to pay TRILLIONS OF DOLLARS to protect against. Bundle up!
Donald J. Trump (@realDonaldTrump) December 29, 2017
តាមការពិតទៅ ការណ៍ដែលលោកដូណាល់ត្រាំបដិសេធមិនព្រមជឿរឿងភពផែនដីឡើងកម្តៅមិនមែនជារឿងថ្មីទេ។ តាំងពីដើមរៀងមក លោកដូណាល់ត្រាំតែងតែបានលើកឡើងថា រឿងឡើងកម្តៅនៃភពផែនដីនេះគឺជារឿងប្រឌិតឡើងដោយចិន ដើម្បីធ្វើឲ្យខូចប្រយោជន៍របស់ក្រុមហ៊ុនអាមេរិក។
ក៏ប៉ុន្តែ ការលើកឡើងកាលពីថ្ងៃព្រហស្បតិ៍ ដោយយកហេតុផលអាកាសធាតុត្រជាក់មួយពេលខាងក្រៅ មកធ្វើជាទឡ្ហីករណ៍ បដិសេធរឿងឡើងកម្តៅផែនដី វាបង្ហាញថា លោកដូណាល់ត្រាំ ក្នុងឋានៈជាប្រធានាធិបតីនៃប្រទេសមហាអំណាចពិភពលោក ហាក់ដូចជាខ្វះការយល់ដឹង អំពីអ្វីទៅដែលហៅថា “ការឡើងកម្តៅនៃភពផែនដី”។
ជាការពិតណាស់ថា តំបន់ឆ្នេរសមុទ្រប៉ែកខាងកើតសហរដ្ឋអាមេរិកកំពុងប្រឈមមុខនឹងអាកាសធាតុត្រជាក់ខ្លាំង។ អាជ្ញាធរក្រុងញូយ៉កថែមទាំងបានធ្វើការព្យាករថា នៅក្នុងអំឡុងបុណ្យឆ្លងឆ្នាំនេះ សីតុណ្ហភាពនៅញូយ៉កនឹងធ្លាក់ចុះត្រជាក់ខ្លាំងបំផុតមិនធ្លាប់មាន (ក្នុងអំឡុងពេលដូចគ្នា) ចាប់តាំងពីទសវត្សរ៍ឆ្នាំ១៩៦០មក។
ក៏ប៉ុន្តែ ដូចជាការលើកឡើងរបស់នាយកបណ្ឌិតសភាវិទ្យាសាស្រ្តក្រុងកាលីហ្វ័រញ៉ាឆ្លើយតបទៅនឹងធ្វីតរបស់លោកដូណាល់ត្រាំថា “បើទោះបីជាសីតុណ្ហភាពបច្ចុប្បន្ននៅខាងក្រៅអគារ Trump Tower (នៅទីក្រុងញូយ៉ក) កំពុងធ្លាក់ចុះត្រជាក់ខ្លាំង ក៏ប៉ុន្តែ ការប្រែប្រួលអាកាសធាតុលើភពផែនដីគឺកំពុងកើតមានយ៉ាងពិតប្រាកដ”។
Believe it or not, global climate change is very real even if it’s cold outside Trump Tower right now. Just like there is still hunger in the world, even if you just had a Big Mac. https://t.co/VCGyGRWGCJ
Jon Foley (@GlobalEcoGuy) December 29, 2017
តាំងពីដើមរៀងមក អ្នកវិទ្យាសាស្រ្តតែងតែបានធ្វើការពន្យល់ជាច្រើនដងរាប់មិនអស់រួចមកហើយថា គេមិនអាចធ្វើការសន្និដ្ឋានពីការឡើងកម្តៅភពផែនដី ដោយគ្រាន់តែមើលទៅលើអាកាសធាតុមួយពេល នៅកន្លែងណាមួយបាននោះទេ។ ការឡើងកម្តៅនៃភពផែនដី គឺសំដៅទៅលើការកើនឡើងនៃសីតុណ្ហភាពគិតជាមធ្យមនៅលើភពផែនដី ដែលគេសង្កេត និងវាស់ នៅក្នុងរយៈពេលយូរអង្វែង។
ភពផែនដីឡើងកម្តៅ មិនមែនមានន័យថា សីតុណ្ហភាពនៅកន្លែងណាមួយនឹងលែងចុះត្រជាក់ខ្លាំងនោះទេ។ ម្តងម្កាល សីតុណ្ហភាពនឹងនៅតែចុះត្រជាក់ខ្លាំង ឬរហូតខ្លាំងមិនធ្លាប់មាន តែក្នុងពេលជាមួយគ្នា សីតុណ្ហភាពក្តៅខ្លាំងមិនធ្លាប់មានក៏កើតមានដែរ ហើយបន្តិចម្តងៗ សីតុណ្ហភាពចុះត្រជាក់ខ្លាំងនឹងមានកាន់តែតិចទៅៗ រីឯសីតុណ្ហភាពក្តៅខ្លាំងវិញកើតមានកាន់តែញឹកញាប់ឡើងៗ។
យោងតាមអ្នកជំនាញអាកាសធាតុ នៅក្នុងអង្គការឧតុនិយមអន្តរជាតិ សីតុណ្ហភាពមធ្យមនៅលើភពផែនដី នៅក្នុងឆ្នាំ២០១៦កន្លងទៅនេះ បានកើនឡើងដល់កម្រិតមួយខ្ពស់បំផុតដែលគេមិនធ្លាប់ឃើញមាននៅក្នុងប្រវត្តិសាស្រ្ត ហើយឆ្នាំ២០១៧នេះ សីតុណ្ហភាពមធ្យមនឹងមានកម្រិតប្រហាក់ប្រហែល ឬក៏អាចឡើងលើសឆ្នាំ២០១៦ទៀតក៏អាចថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ