អាល្លឺម៉ង់បដិសេធចេញសងការខូចខាតសង្គ្រាមលោកទៅអោយប៉ូឡូញ
រដ្ឋាភិបាលអាល្លឺម៉ង់គូសបញ្ជាក់ទៅប៉ូឡូញថ្ងៃសុក្រនេះ ថាគ្មានអ្វីតំរូវអោយអាល្លឺម៉ង់ ចេញសងការខូចខាតសង្គ្រាមលោកលើកទី២ ទៅអោយប៉ូឡូញទេ។ រដ្ឋាភិបាលអាល្លឺម៉ង់គូសបញ្ជាក់ដូច្នេះ ក្រោយពេលនាយករដ្ឋមន្ត្រីប៉ូឡូញលើកឡើងកាលពី ថ្ងៃព្រហស្បតិ៍ថា ប៉ូឡូញមានសិទ្ធិទទួលបានសំណងពីអាល្លឺម៉ង់។
ចុះផ្សាយនៅថ្ងៃ៖ កែប្រែថ្ងៃទី៖
នៅប៉ូឡូញមួយរយៈពេលចុងក្រោយនេះ មានការលើកឡើងពីការទាមទារអោយអាល្លឺម៉ង់ចេញសំណងខូខខាតសង្គ្រាមលោកលើកទី២ ដោយសារតែប្រធានគណបក្សអភិរក្សកាន់អំណាច គឺលោក Jaroslaw Kaczynski បានចោទអាល្លឺម៉ង់ថា មិនទទួលខុសត្រូវចំពោះសង្គ្រាមលោកលើកទី២ ដែលបានកើតឡើង ពីឆ្នាំ១៩៣៩ ដល់ឆ្នាំ១៩៤៥នោះ។ ថ្ងៃព្រហស្បតិ៍កន្លងទៅ លោកស្រីនាយករដ្ឋមន្ត្រីប៉ូឡូញ Beata Szydlo ក៏បានលើកឡើងដែរថា ប៉ូឡូញមានសិទ្ធិទទួលសំណងខូចខាតនេះ ប៉ុន្តែ គ្រាន់តែប៉ូឡូញមិនទាន់បានធ្វើសំណើសុំផ្នែកនយោបាយប៉ុណ្ណោះ។ រដ្ឋាភិបាលប៉ូឡូញលើកឡើងថា អាចនឹងសុំអោយអាល្លឺម៉ង់សងរហួតមួយពាន់ពាន់លានដុល្លារទៀតផង។
អ្នកនាំពាក្យរដ្ឋាភិបាលអាល្លឺម៉ង់តបទៅវិញថា អាល្លឺម៉ង់ទទួលខុសត្រូវចំពោះ សង្ក្រាមលោក ហើយរឿងដោះស្រាយសំណងខូចខាតសង្ក្រាម បង្កឡើងដោយរបបណាហ្ស៊ី បានធ្វើចប់សព្វគ្រប់តាំងពីឆ្នាំ១៩៥៣ម្ល៉េះ។ អាល្លឺម៉ង់បានចេញសងការខូចខាតអោយប្រទេសជាច្រើន ប៉ុន្តែ កាលនោះ ប៉ូឡូញសម្រេចចិត្តមិនយកសំណងពីអាល្លឺម៉ង់ទេ។ រដ្ឋាភិបាលលោកស្រីមែរគែលបានលើកឡើងថា ប៉ូឡូញបានគូសបញ្ជាក់ច្រើនដងមកហើយ ពិសេសក្នុងឆ្នាំ១៩៧០ និងឆ្នាំ២០០៤ថា បដិសេធមិនយកសំណងពីអាល្លឺម៉ង់ទេ។ ដូច្នះ អាល្លឺម៉ង់ចាត់ទុកថា រឿងនេះវាចប់ សព្វគ្រប់ហើយ។ ប៉ុន្តែ បើយោងតាមរដ្ឋាភិបាលប៉ូឡូញ កាលនោះ ការដែលប៉ូឡូញសម្រេចចិត្តមិនយកសំណងពីអាល្លឹម៉ង់ ក៏ដោយសារទទួលសម្ពាធពីអតីតសហភាពសូវៀតដែរ ព្រោះថា កាលនោះ ប៉ូឡូញជាសមាជិកក្រុមកុម្មុយនិស្ត។
ថ្ងៃសុក្រនេះ ក្រុមអាចារ្យគ្រិស្តសាសនាប៉ូឡូញបានស្នើអោយរដ្ឋាភិបាលប្រុងប្រយ័ត្នកុំបង្ករឿងល្អក់កករដល់ទំនាក់ទំនង និងទំនុកចិត្តទ្វេភាគីជាមួយអាល្លឺម៉ង់។ ក្រុមអាចារ្យប៉ូឡូញស្នើអោយរដ្ឋាភិបាលផ្តល់តម្លៃ នឹកឃើញឡើងវិញនូវការផ្សះផ្សារវាងប្រទេសទាំង២ ក្រោយពេលរបបកុម្មុយនិស្ត្រដួលរលំមក។ ទំនាក់ទំនងរវាងអាល្លឺម៉ង់និងប៉ូឡូញមានភាពតានតឹង ដោយសារថ្មីៗនេះ លោកស្រីមែរគែល បានរិះគន់ពីរបបនិតិរដ្ឋនៅប៉ូឡូញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ