គណៈកម្មការអឺរ៉ុប ជាផ្ទាំងស៊ីបភេរវកម្មជីហាតមកពីស៊ីរី
ចុះផ្សាយនៅថ្ងៃ៖
ស្តាប់ - ០៥:៤៥
គម្រោងភេរវកម្មជីហាតនៅអឺរ៉ុបជាច្រើន ទំនងជាត្រូវបានអាជ្ញាធរបែលហ្សិកកម្ចាត់ទាន់ពេលវេលា ក្នុងរយៈពេលប៉ុន្មានខែចុងក្រោយនេះ ក្នុងនោះមានមួយសំដៅវាយប្រហារប្រឆាំងនឹងគណៈកម្មការអឺរ៉ុប។ នេះបើតាមការប្រភពព័ត៌មានហូឡង់។ ជាភេរវជនដែលចាប់ខ្លួនបានទំនងជាបានរៀបចំផែនការវាយប្រហារភេរវកម្ម ដោយការបាញ់រះសម្លាប់ជីវិតមនុស្សឱ្យបានច្រើនបំផុត តាមដែលអាចធ្វើទៅបាន ពោលគឺមានទម្រង់ស្រដៀងនឹងភេរវកម្មនៅមុខសារៈមន្ទីរជនជាតិជីហ្វ នាទីក្រុងព្រុចសែល កាលពីខែឧសភាកន្លងទៅ។
អាជ្ញាធរបែលហ្ស៊ិក បានបញ្ជាក់ព័ត៌មាននេះភ្លាមនៅល្ងាចមិញ ថាពិតជាមានការប៉ុនប៉ងធ្វើភេរវកម្មជីហាតប្រឆាំងនឹងគណៈកម្មការអឺរ៉ុបមែន និងបានចាប់ខ្លួនភេរវជនសង្ស័យយ៉ាងហោចណាស់ពីរនាក់មកពីក្រុងឡាអេប្រទេសហូឡង់ ដើមកំណើតតួកគី ជាជីហាតប៉ុនប៉ងធ្វើភេរវកម្ម។ ប៉ុន្តែនៅ ព្រឹកថ្ងៃនេះ គេពុំឃើញមានការពង្រឹងសុវត្ថិភាពអ្វីពិសេសនៅជុំវិញទីស្នាក់ការគណៈកម្មការអឺរ៉ុបទេ។
ភេរវកម្មជីហាតសម្លាប់មនុស្សឱ្យបានច្រើន
បើតាមព័ត៌មានផ្តល់ដោយវិទ្យុនិងទូរទស្សន៍ជាតិហូឡង់ ក្រុមអ៊ីស្លាមជ្រុលនិយម ដែលទើបត្រលប់មកពីធ្វើជាជីហាតនៅស៊ីរី បានរៀបចំ ផែនការវាយប្រហារភេរវកម្ម មិនមែនសំដៅលើបុគ្គលជាតំណាងគណៈកម្មការអឺរ៉ុបណាម្នាក់ឱ្យពិតប្រាកដទេ ! តែកម្មវត្ថុគឺត្រូវសម្លាប់មនុស្សឱ្យបានច្រើនបំផុត គឺដូចភេរវកម្មដែលធ្លាប់បានកើតឡើងនៅមុខសារៈមន្ទីរជនជាតិជីហ្វ នៅទីក្រុងព្រុចសែល កាលពីខែឧសភា។ ភេរវកម្មដែលកាលណោះបានផ្តាច់ជីវិតមនុស្សអស់បួននាក់ និងទំនងជាស្នាដៃរបស់ភេរវជន ម៉េឌី នេម៉ូស ជាជនជាតិបារាំង ធ្លាប់បម្រើការជាជីហាត ជាឆ្មាំគុក នៅស៊ីរី។
តាមការពិតមានមនុស្សជាច្រើននាក់ផ្សេងទៀត ត្រូវចាប់ខ្លួនបាន តែអាជ្ញាធរបែលហ្ស៊ិកបានលាក់ព័ត៌មានដោយចេតនាមិនបង្ហើបបង្ហាញ អំពីអត្តសញ្ញាណជនសង្ស័យ អំពីផែនការនិងចំណុចស៊ីបភេរវកម្មអ្វីទាំងអស់ ដើម្បីកុំឱ្យសាធារណជនភ័យជ្រួលច្របល់។ សូមបញ្ជាក់ថា អាគារដែលជាទីស្នាក់ការគណៈកម្មការអឺរ៉ុបនៅទីក្រុងព្រុចសែល ជាទីតាំងមានបុគ្គលិករាប់ពាន់នាក់ធ្វើការ ខ្លះជាមន្ត្រី ជាអ្នកទទួលខុសត្រូវជាន់ខ្ពស់របស់សហភាពអឺរ៉ុប និងរបស់ប្រទេសជាសមាជិកទាំង២៨។ ម្យ៉ាងទៀតព្រុចសែលជាក្រុងដែលមានទីស្នាក់កណ្តាលអូតង់ និងក្រុមហ៊ុន ព្រមទាំងអង្គការអន្តរជាតិច្រើនតាំងនៅ តែបែលហ្ស៊ិកជ្រើសរើស ប្រើវិធានការសន្តិសុខបែបខ្មូរមុខនិងស្ងាត់ៗ។ បើតាមកាសែត បែលហ្សិក បានកម្ចាត់ផែនការភេរវកម្មជាស្នាដៃពួកសកម្មជនរដ្ឋអ៊ីស្លាមជីហាតបានច្រើនករណីណាស់ គ្រាន់តែមិនបំពងព័ត៌មានឱ្យខ្ចរខ្ចាយមកក្រៅប៉ុណ្ណោះ។
ពលរដ្ឋបែលហ្សិក៤០០នាក់ធ្វើជីហាតនៅស៊ីរីនិងអ៊ីរ៉ាក់
បែលហ្សិកក៏ដូចជាបណ្តាប្រទេសក្នុងអឺរ៉ុបផ្សេងទៀត សុទ្ធតែព្រួយបារម្ភអំពីការកើនឡើងនៃចំនួនពលរដ្ឋទៅធ្វើជីហាតនៅស៊ីរីនិងអ៊ីរ៉ាក់ដូចគ្នា។ ចំនួនជនជាតិបែលហ្ស៊ិករត់ចូលធ្វើជាយុទ្ធជនប្រយុទ្ធតស៊ូដើម្បីបុព្វហេតុសាសនានៅស៊ីរីនិងអ៊ីរ៉ាក់ មានប្រមាណ៤០០នាក់ តិចជាងពាក់កណ្តាលបើប្រៀបទៅនឹងបារាំង តែបើនិយាយពីអត្រាភាគរយនៃចំនួនប្រជាជនសរុបក្នុងស្រុកវិញ គឺបែលហ្សិកនាំមុខបារាំងឆ្ងាយណាស់។ នៅក្នុងចំណោមពលរដ្ឋ៤០០នាក់ ប្តូរខ្លួនទៅជាជីហាត មាន៩០នាក់ បានត្រលប់មកប្រទេសវិញ។ ជាទូទៅនៅពេលត្រលប់មកវិញ ពួកជីហាត កាន់តែដាច់ខាត កាន់តែមានគំនិតសងសឹកកាន់ខ្លាំង ក្លាយជាគ្រោះថ្នាក់សម្រាប់ជាតិ និងសម្រាមក្នុងភ្នែកភ្នាក់ងារស៊ើបការណ៍។
ពង្រីកសម្ព័ន្ធអន្តរជាតិនៅអង្គមហាសន្និបាតអង្គការសហប្រជាជាតិ
សង្គ្រាមស៊ីវិលនៅស៊ីរី និងវិបត្តិនៅអ៊ីរ៉ាក់ នេះបានក្លាយជាដីដ៏មានជីរជាតិសម្រាប់បណ្តុះគំនិតជីហាត និងជ្រុលនិយម ឱ្យដុះលូតលាស់ពេញពិភពលោក។ ហេតុដូច្នេះហើយបានជាលោកបារ៉ាក់អូបាម៉ា បានប្រកាសនៅល្ងាចមិញ ថានឹងពាំនាំយកគ្រោះថ្នាក់ដែលបង្កឡើងដោយពលរដ្ឋបរទេស (ពលរដ្ឋនៃប្រទេសលោកខាងលិច) ចូលខ្លួនទៅបម្រើជីហាតរដ្ឋអ៊ីស្លាមនៅស៊ីរី និងអ៊ីរ៉ាក់ ទៅ ពិភាក្សា ក្នុងជំនួបប្រជុំពិសេសដឹកនាំដោយរូបលោកផ្ទាល់ ឱកាស មហាសន្និបាតប្រចាំឆ្នាំរបស់ក្រុមប្រឹក្សាសន្តិសុខអង្គការសហប្រជាជាតិ នៅទីក្រុងញូវយ៉ក សប្តាហ៍ក្រោយនេះ។ លោកអូបាម៉ាក៏គ្រោងនឹងឆ្លៀតប្រើមហាសន្និបាតអង្គការសហប្រជាជាតិនេះ ដើម្បីពង្រីកសម្ព័ន្ធអន្តរជាតិប្រឆាំងនឹងរដ្ឋអ៊ីស្លាម ដើម្បីរួមគ្នាកម្ទេចឱ្យអស់ឬសគល់ជ្រុលនិយមអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ