យន្តហោះដឹកអ្នកដំណើររបស់អេហ្ស៊ីបត្រូវគេចាប់ពង្រត់យកទៅកោះស្ហ៊ីប
យន្តហោះដឹកអ្នកដំណើរមួយគ្រឿងរបស់ក្រុមហ៊ុនអេហ្ស៊ីបត្រូវបានចាប់ពង្រត់យកទៅចុះចតនៅកោះស្ហ៊ីបនៅថ្ងៃអង្គារនេះ។ ក្រោយពីឆ្លងកាត់ការចរចា អ្នកដំណើរស្ទើរតែទាំងអស់ត្រូវបានដោះលែងមកវិញ ហើយប្រធានាធិបតីស្ហ៊ីបបានអះអាងថា ហេតុការណ៍ចាប់ពង្រត់យន្តហោះនេះមិនមែនជាអំពើភេរវកម្មនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
យន្តហោះដែលត្រូវបានគេចាប់ពង្រត់នៅថ្ងៃអង្គារនេះ គឺជាប្រភេទយន្តហោះធុនអ៊ែរប៊ូស A320 របស់ក្រុមហ៊ុនអាកាសចរណ៍អេហ្ស៊ីប ឈ្មោះ EgyptAir ។ យន្តហោះនេះមានដឹកអ្នកដំណើរចំនួន៨១នាក់ ជាជើងហោះហើរក្នុងស្រុក រវាងទីក្រុងគែរឆ្ពោះ និងទីក្រុងអាឡិចសង់ឌ្រី។
យោងតាមសេចក្តីថ្លែងការណ៍របស់ក្រសួងអាកាសចរណ៍ស៊ីវិលអេហ្ស៊ីប ក្នុងចំណោមអ្នកដំណើរទាំង ៨១នាក់ នៅលើយន្តហោះនេះ មានពលរដ្ឋបរទេសចំនួន ២១នាក់ ក្នុងនោះមានពលរដ្ឋអាមេរិក៨នាក់ អង់គ្លេស៤នាក់ ហូឡង់៤នាក់ ប៊ែលហ្ស៊ិក២នាក់ និងបារាំងម្នាក់។ ក្រសួងអាកាសចរណ៍ស៊ីវិលអេហ្ស៊ីបក៏បានឲ្យដឹងផងដែរថា បើតាមការរៀបរាប់របស់អ្នកបើកបរយន្តហោះ នៅក្នុងពេលដែលយន្តហោះកំពុងហោះហើរ មានអ្នកដំណើរម្នាក់អះអាងថាខ្លួនមានគ្រាប់បែកជាប់ខ្លួន ហើយគំរាមបង្ខំឲ្យបើកយន្តហោះទៅចុះចតនៅលើកោះស្ហ៊ីប។
ក្រោយពេលចុះចតនៅឯព្រលានយន្តហោះស្ហ៊ីប អាជ្ញាធរបានធ្វើការចរចាជាមួយអ្នកចាប់ពង្រត់យន្តហោះ រហូតឈានទៅដោះលែងអ្នកដំណើរស្ទើរតែទាំងអស់ លើកលែងតែអ្នកដំណើរបរទេសចំនួន ៤នាក់ និងអ្នកបម្រើការលើយន្តហោះចំនួន ៣នាក់។
រហូតមកទល់នឹងពេលនេះ គេនៅមិនទាន់អាចដឹងច្បាស់នៅឡើយទេ អំពីគោលដៅពិតប្រាកដ នៃការចាប់ពង្រត់យន្តហោះនេះ។ យោងតាមការផ្សាយរបស់វិទ្យុជាតិស្ហ៊ីប អ្នកចាប់ពង្រត់យន្តហោះទាមទារចង់បានសិទ្ធិជ្រកកោននយោបាយ ព្រមទាំងទាមទារឲ្យដោះលែងស្រ្តីអ្នកទោស ដែលកំពុងជាប់ឃុំនៅអេហ្ស៊ីប។ ក៏ប៉ុន្តែ ប្រធានាធិបតីស្ហ៊ីបវិញបានប្រាប់អ្នកសារព័ត៌មានថាករណីនេះមិនជាប់ទាក់នឹងអំពើភេរវកម្មណាមួយនោះទេ តែវាទំនងជារឿងផ្ទាល់ខ្លួនច្រើនជាង ដោយអ្នកចាប់ពង្រត់យន្តហោះបានទាមទារជួបនិយាយជាមួយអតីតភរិយារបស់ខ្លួន។
គេនៅមិនទាន់ដឹងច្បាស់នៅឡើយទេថា តើប្តីប្រពន្ធមួយគួនេះមានរឿងអ្វីនឹងគ្នាដែលនាំរហូតទៅដល់មានការចាប់ពង្រត់យន្តហោះបែបនេះ។ គេគ្រាន់តែដឹងថា អ្នកចាប់ពង្រត់យន្តហោះគឺជាជនជាតិអេហ្ស៊ីប ដែលមានសញ្ជាតិអាមេរិក ចំណែកឯអតីតភរិយាគឺជាជនជាតិស្ហ៊ីប ហើយបើយោងតាមការអះអាងរបស់ប៉ូលិសស្ហ៊ីប អតីតភរិយារូបនេះត្រូវបានគេនាំទៅដល់ព្រលានយន្តហោះហើយ ដើម្បីធ្វើការចរចាជាមួយនឹងអតីតស្វាមីរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ