បារាំងចែចង់អ៊ីរ៉ង់តែខ្លាចរបូតអារ៉ាប៊ីសាអ៊ូឌីត
លោកហាសាន រ៉ូហានី ប្រធានាធិបតីអ៊ីរ៉ង់ ដែលទើបនឹងបញ្ចប់ដំណើរទស្សនកិច្ចនៅក្នុងប្រទេសអ៊ីតាលី បានបន្តដំណើរទៅកាន់ប្រទេសបារាំងនៅថ្ងៃពុធនេះ នៅក្នុងដំណើរទស្សនកិច្ចជាប្រវត្តិសាស្រ្តមួយ ដែលជានិមិត្តរូបនៃការផ្សះផ្សារទំនាក់ទំនង រវាងបារាំង និងអ៊ីរ៉ង់ ក្រោយពីត្រូវប្រឈមមុខដាក់គ្នាអស់ជាងមួយទសវត្សរ៍ ដោយសារតែវិបត្តិនុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០៥:២៣
អស់រយៈពេល ១៧ឆ្នាំមកហើយ មិនដែលមានប្រធានាធិបតីអ៊ីរ៉ង់ទៅបំពេញទស្សនកិច្ចនៅក្នុងប្រទេសបារាំងនោះទេ។ លើកចុងក្រោយបង្អស់ ដែលមានប្រធានាធិបតីអ៊ីរ៉ង់ទៅបំពេញទស្សនកិច្ច នៅបារាំង គឺកាលពីឆ្នាំ១៩៩៩។
ដំណើរទស្សនកិច្ចរបស់លោកហាសាន រ៉ូហានី នៅបារាំងនៅពេលនេះ ដែលកើតមានឡើងនៅក្រោយពីវិបត្តិនុយក្លេអ៊ែរអ៊ីរ៉ង់ត្រូវបិទបញ្ចប់ តាមរយៈកិច្ចព្រមព្រៀងនៅទីក្រុងវីយ៉ែន កាលពីថ្ងៃទី១៤កក្កដាឆ្នាំមុន ហើយទណ្ឌកម្មអន្តរជាតិដែលគេដាក់លើអ៊ីរ៉ង់ក៏ត្រូវគេដកចេញមកវិញ កាលពី២សប្តាហ៍មុន គឺជានិមិត្តរូបនៃការផ្សះផ្សារទំនាក់ទំនងគ្នាឡើងវិញ រវាងប្រទេសទាំងពីរនេះ។
ការផ្សះផ្សារទំនាក់ទំនងគ្នានេះក៏នាំមកជាមួយនឹងកិច្ចសន្យាពាណិជ្ជកម្មធំៗផងដែរ ដោយ
រដ្ឋាភិបាលអ៊ីរ៉ង់បានឲ្យដឹងថា នៅក្នុងអំឡុងដំណើរទស្សនកិច្ចរបស់លោកហាសាន រ៉ូហានី នៅបារាំង អ៊ីរ៉ង់នឹងចុះកិច្ចសន្យាទិញយន្តហោះអ៊ែរប៊ូស រហូតដល់ទៅ ១១៤គ្រឿង ដែលជាកិច្ចសន្យាមានតម្លៃជាទឹកប្រាក់រាប់ពាន់លានអឺរ៉ូ។ អ៊ីរ៉ង់ក៏គ្រោងនឹងចុះកិច្ចព្រមព្រៀង លើវិស័យនាំចេញរថយន្តរបស់បារាំងផងដែរ។
អ៊ីរ៉ង់គឺជាទីផ្សារដ៏ធំមួយ ដែលមានប្រជាជនរហូតដល់ទៅជិត ៨០លាននាក់ ហើយជាទីផ្សារដែលនៅទំនេរច្រើន ដោយសារតែទើបនឹងងើបចេញពីទណ្ឌកម្មអន្តរជាតិ។ លើសពីនេះទៅទៀត អ៊ីរ៉ង់គឺជាប្រទេសដែលមានធនធានប្រេងយ៉ាងច្រើនសន្ធឹកសន្ធាប់ ហើយជាប្រទេសដែលនាំប្រេងច្រើនជាងគេលំដាប់ទី៤ នៅលើពិភពលោក។ ដូច្នេះ ក្រុមហ៊ុនបារាំង ក៏ដូចជាក្រុមហ៊ុនមកពីបណ្តាប្រទេសជាច្រើនផ្សេងទៀតកំពុងតែប្រជែងគ្នាដណ្តើមឱកាសរកស៊ីនៅអ៊ីរ៉ង់ ហើយដំណើរទស្សនកិច្ចរបស់លោកហាសាន រ៉ូហានី គឺជាចំណុចចាប់ផ្តើមដ៏សំខាន់មួយ សម្រាប់បារាំង ក្នុងការបោះជំហានចូលក្នុងទីផ្សារអ៊ីរ៉ង់។
ក៏ប៉ុន្តែ ការផ្សះផ្សារទំនាក់ទំនងជាមួយនឹងអ៊ីរ៉ង់នៅពេលនេះ មិនមែនធ្វើឲ្យគ្រប់គ្នាសុទ្ធតែសប្បាយចិត្តទេ។ នៅអ៊ីរ៉ង់ ក្រុមអ្នកអភិរក្សនិយមមិននៅតែបន្តអាក់អន់ចិត្តនឹងបារាំង ដែលជាប្រទេសមួយប្រកាន់ជំហរតឹងរ៉ឹងជាងគេ ក្នុងសំណុំរឿងនុយក្លេអ៊ែរអ៊ីរ៉ង់។
នៅបារាំងវិញ អ្នកដែលមិនសប្បាយចិត្តខ្លាំង គឺសកម្មជនសិទ្ធិមនុស្ស ពីព្រោះថា ថ្វីដ្បិតតែវិបត្តិនុយក្លេអ៊ែរអ៊ីរ៉ង់ត្រូវដោះស្រាយ ប៉ុន្តែ បញ្ហាមួយនៅតែចោទ គឺបញ្ហាសិទ្ធិមនុស្ស។ អ៊ីរ៉ង់នៅតែប្រកាន់យកនូវរបបដឹកនាំតាមបែបសាសនាប្រកាន់តឹង មានការរឹតបន្តឹងសិទ្ធិសេរីភាព ជាពិសេស សិទ្ធិស្រ្តី និងសិទ្ធិសេរីភាពក្នុងការបញ្ចេញមតិ ហើយចលនានយោបាយប្រឆាំងក៏នៅតែទទួលរងនូវការធ្វើទុក្ខបុកម្នេញខ្លាំង។
បើនិយាយពីលោកហាសាន រ៉ូហានីវិញ ថ្វីដ្បិតតែគេមើលឃើញថាជាមេដឹកនាំដែលមានជំហរទន់ភ្លន់ជាងប្រធានាធិបតីមុនៗ ប៉ុន្តែ ទន់ភ្លន់តែចំពោះសំណុំរឿងនុយក្លេអ៊ែរតែប៉ុណ្ណោះ។ ចំណែកឯបញ្ហាសិទ្ធិសេរីភាពនៅក្នុងប្រទេសអ៊ីរ៉ង់វិញមិនសូវជាខុសពីប្រធានាធិបតីមុនៗនោះទេ។ ដូច្នេះហើយបានជាអង្គការសិទ្ធិមនុស្សជាច្រើនបានទាមទារឲ្យលោកហ្វ្រង់ស័រ ហូឡង់ មើលពីបញ្ហាសិទ្ធិមនុស្សនៅអ៊ីរ៉ង់ផង កុំគិតតែពីរឿងផលប្រយោជន៍សេដ្ឋកិច្ចមួយមុខ។
តាមពិត សម្រាប់បារាំង ការផ្សះផ្សារទំនាក់ទំនងជាមួយនឹងអ៊ីរ៉ង់ ត្រូវចោទជាបញ្ហាធំមួយទៀត គឺទំនាក់ទំនងជាមួយនឹងអារ៉ាប៊ីសាអ៊ូឌីត។ អារ៉ាប៊ីសាអ៊ូឌីត និងអ៊ីរ៉ង់ គឺជាគូសត្រូវនឹងគ្នា ហើយបច្ចុប្បន្ននេះកំពុងតែឈ្លោះគ្នាខ្លាំង រហូតកាត់ផ្តាច់ទំនាក់ទំនងការទូតនឹងគ្នា។ បារាំងវិញកំពុងតែមានទំនាក់ទំនងយ៉ាងល្អជាមួយអារ៉ាប៊ីសាអ៊ូឌីត ហើយក៏មានផលប្រយោជន៍សេដ្ឋកិច្ច និងនយោបាយយ៉ាងច្រើនផងដែរជាមួយគ្នា។ ដូច្នេះ បើសិនជាបារាំងងាកមកល្អូនល្អឺនខ្លាំងជាមួយអ៊ីរ៉ង់ គឺអាចនឹងធ្វើឲ្យអារ៉ាប៊ីសាអ៊ូឌីតអន់ចិត្ត។ បារាំងអាបង្កើតកិច្ចការរកស៊ីជាមួយអ៊ីរ៉ង់ ប៉ុន្តែ អាចនឹងត្រូវបាត់ប្រយោជន៍នៅអារ៉ាប៊ីសាអ៊ូឌីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ