អ៊ីរ៉ង់ទាញសញ្ញាអាសន្នស្តីពីការខ្វះខាតទឹកប្រើប្រាស់សម្រាប់រដ្ឋធានីតេអេរ៉ង់
អាជ្ញាធរអ៊ីរ៉ង់បានប្រកាសអាសន្នពីការខ្វះខាតទឹក និងអំពាវនាវឲ្យប្រជាជនប្រើប្រាស់ទឹកដោយសន្សំសំចៃបំផុត។ នៅអ៊ីរ៉ង់ ទំនប់ស្តុកទុកទឹកចំនួនបីក្នុងចំណោម៥ ដែលត្រូវផ្គត់ផ្គង់សម្រាប់ការប្រើប្រាស់នៅក្នុងរដ្ឋធានីស្ទើរតែគ្មានទឹកទាល់តែសោះ។ នេះបើតាមការអះអាងរបស់អនុប្រធានាធិបតីអ៊ីរ៉ង់ ដែលបានទាញសញ្ញាអាសន្ន បន្ទាប់ពីបានទៅទស្សនាទំនប់ស្តុកទឹក នៅក្រៅក្រុងតេអេរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងចំណោមទំនប់ស្តុកទុកទឹក ចំនួន ប្រាំ ដែលត្រូវផ្គត់ផ្គង់ទឹកសម្រាប់រដ្ឋធានីតេអេរ៉ង់ និងខេត្តនៅជុំវិញ ទំនប់ចំនួនបីមានទឹកសម្រាប់តែការប្រើប្រាស់ ពីរបីថ្ងៃទៀតប៉ុណ្ណោះ។ ដូច្នេះ ទីក្រុងតេអេរ៉ង់ ដែលមានប្រជាជនរស់នៅប្រមាណ១៤លាននាក់ នឹងជួបប្រទះការខ្វះខាតទឹកប្រើប្រាស់ នាពេលខាងមុខ។
ដើម្បីជៀសវាងនយោបាយបែងចែកចំណែកទឹក រដ្ឋាភិបាលអ៊ីរ៉ង់បានស្នើសុំឲ្យប្រជាជនក្នុងរដ្ឋធានីកាត់បន្ថយការប្រើប្រាស់ដែលមិនចាំបាច់ ដូចជាការលាងរថយន្ត ឬការស្រោចសួនច្បារដោយទឹកស្អាត។ សំណើមានន័យស្មើការព្រមាន ព្រោះថា អាជ្ញាធរអ៊ីរ៉ង់បានបញ្ជាក់ហើយថា បើសិនប្រជាជនល្មើស មិនប្រយ័ត្នប្រយែង ដើម្បីសន្សំសំចៃទឹក នោះ ដំបូងពួកគេនឹងត្រូវគេកាត់ផ្តាច់ មិនឲ្យប្រើប្រាស់ទឹក បន្ទាប់មក នឹងមានការពិន័យតឹងរ៉ឹងសម្រាប់អ្នកដែលល្មើសប្រើប្រាស់ទឹកច្រើន។
យោងតាមក្រុមហ៊ុនគ្រប់គ្រងទឹកស្អាតនៅអ៊ីរ៉ង់ ប្រជាជនអ៊ីរ៉ង់ម្នាក់ប្រើប្រាស់ទឹកស្អាត ប្រមាណ ២៥០លីត្រក្នុងមួយថ្ងៃ គឺច្រើនជាងបរិមាណមធ្យម ដែលប្រជាជនក្នុងពិភពលោកប្រើប្រាស់ ប្រមាណ ១៥០លីត្រ។
ជារួម មិនមែនមានតែរដ្ឋធានីដែលជួបការខ្វះខាតទឹក។ ខេត្តជាង៥០០ទៀតរបស់អ៊ីរ៉ង់ក៏កំពុងជួបវិបត្តិខ្វះទឹកដូចគ្នានេះដែរ ដោយសារតែគ្រោះរាំងស្ងួតហួតហែងខ្លាំង។ តាមអាជ្ញាធរបរិមាណទឹកភ្លៀងធ្លាក់ថយចុះប្រមាណ៨ភាគរយ នៅឆ្នាំនេះ។
ដើម្បីទប់ទល់គ្រោះគ្មានទឹកប្រើប្រាស់ អាជ្ញាធរអ៊ីរ៉ង់បានធ្វើនយោបាយបិទទឹកចំនួន ៧ម៉ោង ក្នុងមួយថ្ងៃ។ រដ្ឋាភិបាលបានប្រកាសផងដែរថវិកា១០ពាន់លានដុល្លារដើម្បីធ្វើទំនើបកម្មវិស័យកសិកម្ម ដែលរហូតមកដល់ពេលនេះ ពឹងអាស្រ័យចំនួន៩០ភាគរយទៅលើទឹកភ្លៀង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ