ឥណ្ឌាទទួលបានកំណើនសេដ្ឋកិច្ចខ្ពស់សម្រាប់ឆ្នាំ ២០១៥-២០១៦
នៅក្នុងប្រទេសឥណ្ឌា អត្រាកំណើនសេដ្ឋកិច្ចសម្រាប់ឆ្នាំ ២០១៥ និង ២០១៦ បានលោតដល់ ៧,៦% នេះបើតាមតួលេខផ្សព្វផ្សាយដោយ Central Statistic Office នាថ្ងៃអង្គារ ទី៣១ ឧសភា។ ជាមួយនឹងអត្រាកំណើនសេដ្ឋកិច្ច ៧,៦% ជាសក្ខីកម្មមួយដែលបញ្ជាក់ថា មហាអំណាចសេដ្ឋកិច្ចលំដាប់ទី៣ នៅអាស៊ីមួយនេះបានស្ថិតក្នុងចំណោមប្រទេសធំៗក្នុងលោកដែលកំពុងមានអត្រាកំណើនសេដ្ឋកិច្ចខ្ពស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
កំណើនសេដ្ឋកិច្ចដែលឥណ្ឌាទទួលបានខ្លាំងជាងគេ គឺនៅក្នុងត្រីមាសទី១ចន្លោះខែមករា និងខែមីនាឆ្នាំ ២០១៦ ដែលមានអត្រាដល់ទៅ ៧,៩%។ គឺជាអត្រាមួយដ៏ខ្ពស់លើសពីការប្រមើលទុករបស់ក្រុមសេដ្ឋកិច្ចវិទូដែលប៉ាន់ប្រមាណត្រឹម ៧,៥%។ លទ្ធផលជាក់ស្តែងនេះជាការលើកទឹកចិត្តដល់រដ្ឋាភិបាលជាតិនិយមហិណ្ឌូរបស់លោកនាយករដ្ឋមន្រ្តីណារ៉េនដ្រា ម៉ូឌីដែលទើបចូលកាន់អំណាចបាន ២ឆ្នាំ និងដែលបានសន្យាផ្តល់សន្ទុះសេដ្ឋកិច្ច និងការវិនិយោគបរទេស។
ក្នុងនាមជាប្រទេសមហាអំណាចសេដ្ឋកិច្ចលំដាប់ទី៣ នៅអាស៊ីមែន តែឥណ្ឌាកំពុងធ្វើដំណើរវ៉ាចិនដែលជាប្រទេសជិតខាង និងគូប្រជែងរបស់ខ្លួននៅក្នុងតំបន់។ ជាក់ស្តែងនា៣ត្រីមាសកន្លងទៅ ឥណ្ឌាទទួលបានកំណើនសេដ្ឋកិច្ចជាង ៧% ទល់នឹងចិនដែលទទួលបានត្រឹម ៦,៧% ដែលជាអត្រាមួយយ៉ាងទាបគិតក្នុងរយៈពេល ៧ឆ្នាំចុងក្រោយ។ តែក្រុមសេដ្ឋកិច្ចវិទូមានមន្ទិលសង្ស័យចំពោះវិធានគន់គូរថ្មីរបស់រដ្ឋាភិបាលដែលបានជួយដំឡើងតួលេខកំណើនសេដ្ឋកិច្ច។ តែរដ្ឋាភិបាលអះអាងថា របៀបគិតលេខថ្មីរបស់ខ្លួនមិនខុសពីស្តង់ដារអន្តរជាតិប៉ុន្មានទេ។
មានកត្តាជាច្រើនដែលបានអនុញ្ញាតឲ្យឥណ្ឌាទទួលបានកណើនសេដ្ឋកិច្ចខ្ពស់ពេលនេះ ពិសេសកត្តាបញ្ចុះអត្រាការប្រាក់របស់ធនាគារកណ្តាលដែលបានជួយបង្កើនការវិនិយោគ និងការចំណាយរបស់ពលរដ្ឋ។ ជាក់ស្តែងក្នុងខែមេសាកន្លងទៅ ធនាគារកណ្តាលបានទម្លាក់អត្រាការប្រាក់នាំមុខមកនៅត្រឹម ៦,៥% ដែលជាកម្រិតមួយយ៉ាងទាបគិតក្នុងរយៈពេល ៥ឆ្នាំកន្លងទៅ។ តែក្រុមសេដ្ឋកិច្ចវិទូបានយល់ឃើញថា អត្រា ៦,៥% នៅមានកម្រិតខ្ពស់ និងបានទាមទារឲ្យមានការបញ្ចុះបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ