ទំនាក់ទំនងអាមេរិក-ប៉ាគីស្ថានកាន់តែតានតឹង ក្រោយលោកត្រាំប្រកាសយុទ្ធសាស្ត្រនៅអាហ្វហ្កានីស្ថាន
អាមេរិកកំពុងបន្ថែមសម្ពាធ បន្ថែមភាពតានតឹងដល់ទំនាក់ទំនងជាមួយប៉ាគីស្ថាន ក្រោយលោកដូណាល់ ត្រាំ ប្រកាសមិនដកកងទ័ពអាមេរិកចេញពីអាហ្វហ្កានីស្ថាន នៅថ្ងៃចន្ទកន្លងទៅ។ លោកត្រាំបានឆ្លៀតរិះគន់ប៉ាគីស្ថានថា ជាជម្រកនៃក្រុមភេរវជន។ អាមេរិកអាចនឹងដកប៉ាគីស្ថានលែងអោយមានងារថា ជាដៃគូចំបងនៃអង្គការអូតង់តទៅទៀត។
ចុះផ្សាយនៅថ្ងៃ៖ កែប្រែថ្ងៃទី៖
លោកខាវ៉ាចា មូហាម៉ាត អាស៊ីហ្វ ជារដ្ឋមន្ត្រីក្រសួងការបរទេសប៉ាគីស្ថាន បានបញ្ចេញប្រតិកម្មតបនឹងលោកដូណាល ត្រាំ ដែលបានប្រើពាក្យធ្ងន់ៗ ចោទថាប៉ាគីស្ថានជាជម្រកក្រុមបង្កចលាចលហិង្សា។ រដ្ឋមន្ត្រីការបរទេសប៉ាគីស្ថានលើកឡើងថា គ្មានប្រទេសណាមួយដែលឈឺចាប់ជាងប៉ាគីស្ថានទេ បើនិយាយពីបញ្ហាភេរវកម្ម។ ការប្រកាសអាមេរិកមិនបានផ្តោតមើលឃើញពីការលះបង់ដ៏ធំធេងរបស់ប៉ាគីស្ថានទេ។ កងទ័ពប៉ាគីស្ថានបានប្រតិកម្មតាំងពីដំបូងទីដែរថា លែងមានរចនាសម្ព័ន្ធក្រុមភេរវជននៅប៉ាគីស្ថានទៀតហើយ។
រដ្ឋាភិបាលប៉ាគីស្ថានប្រាប់ថា ខកចិត្តចំពោះការរិះគន់របស់អាមេរិក។ ត្បិតថា រដ្ឋាភិបាលប៉ាគីស្ថាននៅតែបង្ហាញបំណងចង់បានសុខសន្តិភាព ប៉ុន្តែ ទំនាក់ទំនងជាមួយអាមេរិកពេលនេះបានឡើងតានតឹង។ ក្រុមជំនាញបារម្ភថា ប៉ាគីស្ថានអាចនឹងមិនព្រមចុះញ៉មនឹងសម្ពាធអាមេរិក។ មិនមែនជាលើកទី១ទេដែលអាមេរិករិះគន់ប៉ាគីស្ថានថានៅពីក្រោយខ្នងក្រុមភេរវជនតាលីបង់ ដែលបង្កអស្ថិរភាពនៅអាហ្វហ្កានីស្ថាន ប៉ុន្តែ សំដីលោកដូណាល់ ត្រាំ កាលពីថ្ងៃចន្ទគឺរាងធ្ងន់បន្តិចហើយ។ លោកត្រាំបានព្រមានថា ប៉ាគីស្ថាននឹងទទួលការបាត់បង់ច្រើន បើបន្តអោយក្រុមឧក្រិដ្ឋជន និងក្រុមភេរវជនជ្រកកោនតទៅទៀត។ លោកត្រាំថែមទាំងលើកសរសើរឥណ្ឌាជាគូប្រជែងនុយក្លេអ៊ែររបស់ប៉ាគីស្ថាន និងសុំអោយឥណ្ឌាបន្តជួយអាហ្វហ្កានីស្ថានទៀតផង។
ថ្ងៃអង្គារម្សិលមិញ រដ្ឋមន្ត្រីការបរទេសអាមេរិក លោកធីលឡឺសុន បានបង្ហើបខ្លះៗពីវិធានការដាក់សម្ពាធប៉ាគីស្ថាន។ អាមេរិកអាចបន្ថយជំនួយ ហើយប៉ាគីស្ថានអាចនឹងរហូតបាត់បង់ងារថាជាប្រទេសដៃគូចម្បងរបស់អូតង់។ ងារនេះត្រូវបានអតីតប្រធានាធិបតី ហ្ស៊ក ដាប់ប៊ែលយូ ប៊ូស្ហ ផ្តល់អោយប៉ាគីស្ថាន ក្នុងឆ្នាំ២០០៤ ជាងារសម្រាប់ប្រទេសមិនមែនសមាជិកអូតង់ ប៉ុន្តែជាប្រទេសដៃគូដែលសហការជិតស្និទ្ធជាមួយអាមេរិក។ ដោយឡែក លោកធីលឡឺសុនមិនបានប្រាប់ថា តើអាមេរិកអាចនឹងធ្វើការវាយប្រហារនៅប៉ាគីស្ថានរឺយ៉ាងណាទេ។ តែអាមេរិកព្រមានរួចហើយថា នឹងកំចាត់ក្រុមភេរវជន ទោះជាក្រុមនេះស្ថិតនៅទីណាក៏ដោយចុះ។
នៅអាហ្វហ្កានីស្ថានវិញ ថ្ងៃពុធនេះ ភេរវជនអត្តឃាតតាលីបង់បានបំផ្ទុះរថយន្ត នៅជិតទីស្នាក់ការប៉ូលិសមួយកន្លែង នៅភាគខាងត្បូងប្រទេស។ ភេរវកម្មបានសម្លាប់មនុស្សយ៉ាងហោច៥នាក់ និងបង្ករបួសជាង១០នាក់។ ភេរវកម្មនេះបង្ហាញច្បាស់ថា ក្រុមតាលីបង់មិនបានបង្អង់យូរនឹងបញ្ចេញប្រតិកម្មជាក់ស្តែងទេ ចំពោះការដែលលោកដូណាល់ ត្រាំ សម្រេចមិនដកទាហានអាមេរិកពីអាហ្វហ្កានីស្ថាន។ ការវាយប្រហាររ៉ុកកែតទៅលើស្ថានទូតអាមេរិក នៅក្រុងកាប៊ូល កាលពីយប់ថ្ងៃចន្ទ ក៏ត្រូវក្រុមតាលីបង់ប្រកាសថា ជាស្នាដៃរបស់ខ្លួនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ