ចំនួនអ្នកស្លាប់ក្នុងគ្រោះថ្នាក់ធ្លាក់យន្តហោះយោធាឥណ្ឌូណេស៊ីកើនឡើងដល់១១៦នាក់
នៅឥណ្ឌូណេស៊ី យន្តហោះយោធាមួយគ្រឿងបានធ្លាក់ និងផ្ទុះឆេះ នៅក្នុងតំបន់ទីប្រជុំជន លើកោះស៊ូម៉ាត្រា។ យោងតាមតុល្យការថ្មីៗចុងក្រោយផ្តល់ដោយអាជ្ញាធរឥណ្ឌូណេស៊ី ចំនួនអ្នកស្លាប់ក្នុងហេតុការណ៍នេះមានយ៉ាងតិច ១១៦នាក់។ ចំនួនមនុស្សដែលជិះលើយន្តហោះមាន១១៣នាក់ ក៏ប៉ុន្តែ គេនៅមិនទាន់ដឹងច្បាស់នៅឡើយ អំពីចំនួនជនរងគ្រោះដែលនៅលើដី។
ចុះផ្សាយនៅថ្ងៃ៖ កែប្រែថ្ងៃទី៖
យោងតាមមន្រ្តីអ្នកនាំពាក្យនៃកងទ័ពជាតិឥណ្ឌូណេស៊ី យន្តហោះដែលធ្លាក់នេះ គឺជាយន្តហោះដឹកជញ្ជូនយោធាធុន Hercules C-130 ផលិតនៅសហរដ្ឋអាមេរិក។ យន្តហោះនេះ មានបេសកកម្មដឹកជញ្ជូនគ្រឿងបរិក្ខាយោធាទៅផ្គត់ផ្គង់មូលដ្ឋានកងទ័ព ក៏ប៉ុន្តែ ២នាទីក្រោយពីបានហោះឡើង យន្តហោះនេះក៏ត្រូវធ្លាក់នៅក្នុងទីក្រុង Medan ដែលជាទីក្រុងដ៏ធំមួយ មានប្រជាជនរស់នៅប្រមាណជា ២លាននាក់។
កាលពីដំបូង មន្រ្តីអ្នកនាំពាក្យយោធាឥណ្ឌូណេស៊ីបានឲ្យដឹងថា នៅលើយន្តហោះដែលធ្លាក់នេះ មានមនុស្សជិះតែ ១២នាក់ប៉ុណ្ណោះ។ ក៏ប៉ុន្តែ ក្រោយមក អគ្គបញ្ជាការកងទ័ពអាកាសឥណ្ឌូណេស៊ីបានបញ្ជាក់ថា ក្រៅពីអាកាសយានិក និងអ្នកបច្ចេកទេសទាំង ១២នាក់ មានមនុស្ស ១០១នាក់ផ្សេងទៀត ដែលជិះនៅលើយយន្តហោះ។ លោកអគ្គបញ្ជាការកងទ័ពអាកាសក៏បានលើកឡើងផងដែរថា នៅក្នុងចំណោមមនុស្សទាំង ១១៣នាក់ ដែលជិះលើយន្តហោះនេះ លោកមិនរំពឹងថានឹងមានអ្នករស់រានមានជីវិតនោះទេ។
ក្រៅពីជនរងគ្រោះដែលជិះនៅលើយន្តហោះ អ្វីដែលគេមិនទាន់ដឹងពិតប្រាកដ គឺចំនួនជនរងគ្រោះ ដែលនៅលើដី ដោយសារតែយន្តហោះនេះបានធ្លាក់ និងផ្ទុះឆេះ នៅក្នុងទីតាំងដែលសម្បូរទៅដោយផ្ទះប្រជាជនរស់នៅ។
គេសង្កេតឃើញថា នៅឥណ្ឌូណេស៊ី គ្រោះថ្នាក់ធ្លាក់យន្តហោះយោធាតែងតែកើតមានឡើងជារឿយៗ ហើយហេតុការណ៍ចុងក្រោយបំផុត គឺការធ្លាក់យន្តហោះប្រដេញធុន F-16 កាលពីខែមេសាកន្លងទៅថ្មីៗនេះ។ បើនិយាយពីខាងសុវត្ថិភាពក្នុងវិស័យអាកាសចរណ៍ស៊ីវិលវិញ ឥណ្ឌូណេស៊ីក៏មានប្រវត្តិមិនល្អប៉ុន្មានដែរ ដោយគេសង្កេតឃើញមានជារឿយៗ ករណីធ្លាក់យន្តហោះដឹកអ្នកដំណើរ នៅក្នុងរយៈពេលប៉ុន្មានឆ្នាំចុងក្រោយនេះ។ ករណីចុងក្រោយបំផុត ដែលហាក់នៅថ្មីៗនៅឡើយ គឺគ្រោះថ្នាក់ធ្លាក់យន្តហោះរបស់ក្រុមហ៊ុន AirAsia កាលពីខែធ្នូ ដែលកាលណោះបានបណ្តាលឲ្យមនុស្សស្លាប់រហូតដល់ទៅ ១៦២នាក់។
សម្រាប់ទីក្រុង Medan នេះគឺមិនមែនជាលើកទី១ទេ ដែលមានហេតុការណ៍ធ្លាក់យន្តហោះ នៅទីប្រជុំជនបែបនេះ។ កាលពីឆ្នាំ២០០៥ យន្តហោះដឹកអ្នកដំណើរក្នុងស្រុកមួយគ្រឿងបានធ្លាក់ទៅលើផ្ទះប្រជាជន ដែលកាលណោះបណ្តាលឲ្យមនុស្សស្លាប់ចំនួន ១៥០នាក់ រាប់ទាំងអ្នកជិះលើយន្តហោះ និងជនរងគ្រោះដែលនៅលើដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ