លីកាដូចេញផ្សាយរបាយការណ៍រំលឹកពីការរំលោភសិទ្ធិមនុស្សរយៈពេល១០ឆ្នាំចុងក្រោយនៅកម្ពុជា
អង្គការសម្ព័ន្ធខ្មែរជំរឿន និងការពារសិទ្ធិមនុស្ស ចេញផ្សាយអត្ថបទពីការរំលោភសិទ្ធិមនុស្សនៅកម្ពុជានារយៈពេល១០ឆ្នាំក្រោយ ដើម្បីចូលរួមប្រារព្ធទិវាសិទ្ធិមនុស្សអន្តរជាតិឆ្នាំ២០១៩នេះ។ នេះបើតាមការបញ្ជាក់របស់មន្ត្រីជាន់ខ្ពស់នៃអង្គការសិទ្ធិមនុស្សមួយនេះ។
ចុះផ្សាយនៅថ្ងៃ៖
កាលពីថ្ងៃទី១ ខែធ្នូ អង្គការសម្ព័ន្ធខ្មែរជំរឿន និងការពារសិទ្ធិមនុស្ស ហៅកាត់ថាលីកាដូ បានចេញផ្សាយនូវអត្ថបទទី១របស់ខ្លួន ដែលលើកឡើងពីការរំលោភសិទ្ធិមនុស្សនៅកម្ពុជា ដែលបានកើតឡើង កាលពីឆ្នាំ២០១០កន្លងទៅ។ តាមរយៈអត្ថបទនោះ បញ្ហាដីធ្លី គឺមានចំនួនច្រើនជាងបញ្ហាផ្សេងទៀត និងបន្ទាប់មកបញ្ហានយោបាយ បញ្ហាការងារ និងសង្គមស៊ីវិល។
លោក អំ សំអាត នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ បានអះអាងប្រាប់វិទ្យុបារាំងអន្តរជាតិនៅថ្ងៃទី០២ ខែធ្នូ នេះថា ការចេញផ្សាយរបាយការណ៍នេះគឺជាការសង្ខេប និងរំលឹកឡើងវិញនូវករណីរំលោភសិទ្ធិមនុស្សនៅកម្ពុជា ក្នុងរយៈពេល១០ឆ្នាំ គឺពីឆ្នាំ២០១០ ដល់ឆ្នាំ២០១៩ ក្នុងន័យចូលរួមប្រារព្ធទិវាសិទ្ធិមនុស្សអន្តរជាតិ១០ធ្នូ ឆ្នាំ២០១៩នេះ។
ប៉ុន្តែការចេញផ្សាយរបាយការណ៍នេះ គឺធ្វើឡើងមួយឆ្នាំ សម្រាប់មួយថ្ងៃ ដោយផ្តើមពីថ្ងៃទី១ ខែធ្នូ សម្រាប់ឆ្នាំ២០១០ រហូតដល់ថ្ងៃទី១០ ធ្នូ ដែលនឹងចេញផ្សាយជាបន្តបន្ទាប់គ្នា។ នេះបើតាមលោក អំ សំអាត។
លោក អំ សំអាត អះអាងថា ការរំលោភបំពានសិទ្ធិមនុស្សនៅប៉ុន្មានឆ្នាំមុនគឺមានរូបភាពប្រហាក់ប្រហែលគ្នា ដែលភាគច្រើនគឺជាការរំលោភសិទ្ធិដីធ្លី។ ប៉ុន្តែនៅប៉ុន្មានឆ្នាំចុងក្រោយនេះ ការរំលោភសិទ្ធិទាក់ទងនឹងស្ថានភាពនយោបាយនៅកម្ពុជាគឺមានច្រើនជាង។ លោក សំអាត បានកត់សម្គាល់ថា ចាប់ពីឆ្នាំ២០១៧មក បញ្ហានយោបាយបានធ្វើឲ្យប៉ះពាល់ដល់ការគោរពសិទ្ធិច្រើនជាងគេ។
សូមជម្រាបជូនថាទិវាសិទ្ធិមនុស្ស១០ ធ្នូ ឆ្នាំ២០១៩នេះ ក្រៅតែពីការចេញរបាយការណ៍រំលឹកពីការរំលោភសិទ្ធិមនុស្សនៅកម្ពុជានារយៈពេល១០ឆ្នាំ អង្គការសិទ្ធិមនុស្សមួយនេះ ក៏គ្រោងចែកម្ហូបអាហារដល់អ្នកជាប់ពន្ធនាគារ ហើយក៏ គ្រោងប្រារព្ធទិវាសិទ្ធិមនុស្សអន្តរជាតិជាមួយសហគមន៍នៅតាមបណ្តាខេត្តផងដែរ។ នេះបើតាមមន្ត្រីជាន់ខ្ពស់របស់អង្គការសិទ្ធិមនុស្សនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ