ទិវាបុណ្យជាតិបារាំង១៤កក្កដា ឆ្នាំចុងក្រោយក្នុងអាណត្តិរបស់លោកហូឡង់
ចុះផ្សាយនៅថ្ងៃ៖
ស្តាប់ - ០៦:០៧
ដូចរៀងរាល់ឆ្នាំដែរ ថ្ងៃ១៤កក្កដា ឆ្នាំនេះ បារាំងបានរៀបចំប្រារព្ធពិធីបុណ្យជាតិ តាំងពីម៉ោង១០ព្រឹក ដោយមានក្បួនដង្ហែយោធារបស់កងទ័ពរាប់ពាន់នាក់។ សម្រាប់ពិធីបុណ្យជាតិឆ្នាំ២០១៦នេះ បារាំងបានអញ្ជើញមេដឹកនាំនូវែលសេឡង់ និងអូស្ត្រាលី ជាភ្ញៀវកិត្តិយស ដើម្បីរំលឹកដល់ខួប១០០ឆ្នាំនៃការប្រយុទ្ធរវាងកងទ័ពបារាំង អង់គ្លេស ប្រឆាំងនឹងកងទ័ពអាល្លឺម៉ង់ កាលពីឆ្នាំ១៩១៦។ កាលនោះទាហានប្រទេសទាំង២បានចូលជួយកងទ័ពបារាំងនឹងអង់គ្លេស។
ក្នុងឱកាសបុណ្យជាតិថ្ងៃព្រហស្បតិ៍នេះ ទាហានអូស្រ្តាលី ១៤០នាក់ និងទាហាននូវែលសេឡង់៨៥នាក់ បានចូលរួមក្នុងក្បួនដង្ហែក្រុងប៉ារីស។ យន្តហោះ៥៥គ្រឿង ឧទ្ធម្ភាគចក្រ២១២គ្រឿង បានហោះលើលំហអាកាស អបអរថ្ងៃបុណ្យនេះ។ ប្រមុខការទូតអាមេរិកចន ឃែររី ក៏មានវត្តមានក្នុងឱកាសនេះដែរ។
ដើម្បីពង្រឹងសន្តិសុខពិធីបុណ្យ អាជ្ញាធរបានពង្រាយ កងកម្លាំង ជាង១ម៉ឺននាក់។ បុណ្យជាតិថ្ងៃនេះ ជាបុណ្យលើកចុងក្រោយនៃអាណត្តិប្រធានាធិបតីរបស់លោកហ្វ្រង់ស៊័រ ហូឡង់ នៅមុនការបោះឆ្នោតប្រធានាធិបតីឆ្នាំ២០១៧។ បន្ទាប់ពីចប់ក្បួនដង្ហែព្រឹកមិញ ប្រធានាធិបតីបារាំងផ្តល់បទសម្ភាសដល់ទូរទស្សន៍ ទាក់ទងប្រធានបទសំខាន់ៗ ដូចជា ច្បាប់ការងារ ភាពចម្រូងចម្រាសរវាងរដ្ឋាភិបាលនិងរដ្ឋមន្ត្រីសេដ្ឋកិច្ច បញ្ហាប្រិចស៊ីត រឺក៏នយោបាយសន្តិសុខនៅក្រៅប្រទេសជាដើម។
លទ្ធផលដឹកនាំរបស់លោកហូឡង់ សម្រាប់បទសម្ភាសទូរទស្សន៍
សន្តិសុខ ច្បាប់ការងារ បញ្ហាជនគ្មានការងារធ្វើ រឺកំណើនសេដ្ឋកិច្ច សុទ្ធតែជាអ្វីដែលប្រជាជនបារាំងរង់ចាំចេញពីមាត់លោកហូឡង់ ក្នុងបទសម្ភាសថ្ងៃបុណ្យជាតិនេះ។ លោកហូឡង់អាចត្រឹមនិយាយថា ក្នុងអាណត្តិដឹកនាំរបស់លោក សេដ្ឋកិច្ចបារាំងបានងើបឡើងវិញបានបន្តិចប៉ុណ្ណោះ។ បារាំងបានរក្សាឱនភាពថវិកាអោយមានលំនឹង២,៧ភាគរយ សម្រាប់ឆ្នាំ២០១៧។ ជនដែលគ្មានការងារធ្វើវិញ បានថយចុះជាងមុនបន្តិច។ លោកហូឡង់អាចលើកឡើងវិញដែរ នូវបំណងលោកចង់អោយមានការអនុម័តច្បាប់ការងារដ៏ចម្រូងចម្រាស ដែលបានបង្កបាតុកម្មក្នុងពេលកន្លងមក។
ទាក់ទងនឹងនយោបាយសន្តិសុខ លោកហូឡង់អាចលើកឡើងជាថ្មី ពីជំហរពង្រឹងសុវត្ថិភាពក្នុងប្រទេស ក៏ដូចជាក្រៅប្រទេស។ ក្នុងអាណត្តិរបស់លោក ក្រុងប៉ារីសបានរងភេរវកម្មធ្ងន់ធ្ងរ កម្រមាន សម្លាប់មនុស្សដល់ទៅជិត១៥០នាក់ កាលពីខែវិច្ឆិកា ឆ្នាំមុន។
ថ្មីៗនេះទៀត មានដំណឹងថា សកម្មជនក្រុមជីហាតរដ្ឋអ៊ីស្លាមម្នាក់ ជាជនជាតិប្រេស៊ីល គ្រោងធ្វើភេរវកម្មប្រឆាំងក្រុមកីឡាករបារាំង ដែលត្រូវចូលរួមប្រកួតកីឡាអូឡាំពិក នៅក្រុងរីយ៉ូ ខែសីហាខាងមុខនេះផង។ ដូច្នេះ បារាំងមិនអាចប្រហែសបានទេ។ ម្សិលមិញ ប្រធានាធិបតីបារាំងបានប្រកាសបញ្ជូនទាហានបារាំងបន្ថែមទឿត ទៅជួយជាយោបល់ដល់ទាហានអ៊ីរ៉ាក់ ក្នុងការកំទេចក្រុមជីហាតរដ្ឋអ៊ីស្លាម។ ថ្ងៃនេះលោកបានលើកឡើងជាថ្មីដែរ នូវរឿងជួយទាហានអ៊ីរ៉ាក់នេះ។
ចំពោះនយោបាយការបរទេសវិញ លោកហូឡង់នៅតែបង្ហាញជំហរ ការពារនយោបាយសហភាពអឺរ៉ុប បង្ហាញថា អឺរ៉ុបនៅតែខ្លាំង នៅតែរួបរួមគ្នា ទោះជាអង់គ្លេសដើរចេញពីអឺរ៉ុបក្តី។ នៅអង់គ្លេសពេលនេះ លោកស្រីតេរេសា ម៉ី បានចូលមកកាន់តំណែងជានាយករដ្ឋមន្ត្រី បន្តពីលោកកាមេរ៉ុន។ ដូច្នេះ និតិវិធីចាកចេញពីអឺរ៉ុបអាចនឹងធ្វើបានលឿន។
សប្តាហ៍ក្រោយនេះ លោកហូឡង់នឹងធ្វើដំណើរទស្សនកិច្ចជួបមេដឹកនាំប្រទេសអឺរ៉ុបមួយចំនួន ដូចជាស្លូវ៉ាគី ពរទុយហ្កាល់ អូទ្រីសជាដើម ដើម្បីពិភាក្សាពីបញ្ហាBrexitនេះ។
រដ្ឋមន្ត្រីសេដ្ឋកិច្ច អេម៉ានុយអែល ម៉ាក្រុង ដង្កូវក្នុងសាច់បក្សកាន់អំណាច
តាំងពីថ្ងៃអង្គារមក នាយករដ្ឋមន្ត្រីម៉ានុយអែល វ៉ាល់ បានខឹងសម្បារនឹងរដ្ឋមន្ត្រីសេដ្ឋកិច្ចអេម៉ានុយអែល ម៉ាក្រុង។ ភាពចម្រូងចម្រាស ភាពតានតឹងរវាងបក្សកាន់អំណាច និងរដ្ឋមន្ត្រីសេដ្ឋកិច្ចគឺមានមួយរយៈមកហើយ។
មូលហេតុដោយសារតែគេមើលឃើញថា រដ្ឋមន្ត្រីសេដ្ឋកិច្ចវ័យក្មេងរូបនេះ កំពុងធ្វើចរឹតអោយគេគ្រប់គ្នាគិតថា លោកអាចនឹងឈរឈ្មោះជាបេក្ខជន សម្រាប់ការបោះឆ្នោតប្រធានាធិបតី ឆ្នាំ២០១៧។ លោកបានបង្ហាញមហិច្ឆតានេះឡើង ដោយបានបង្កើតចលនានយោបាយមួយ កាលពីខែមេសា។ ចលនានោះ ឈ្មោះថា En Marche យើងអាចប្រែថា ដាក់អោយដើរ រឺអោយមានចលនា។ លោកម៉ាក្រុងបានស្វែងរកមូលនិធិសម្រាប់ចលនានេះ។ ចលនានេះបានទទួលការគាំទ្រពីប្រធានាធិបតីហូឡង់ផងដែរ។
កាលពីថ្ងៃ១២កក្កដា រដ្ឋមន្ត្រីសេដ្ឋកិច្ចម៉ាក្រុង បានបើកអង្គមេទិញលើកទី១ សម្រាប់ចលនានយោបាយរបស់លោក។ ក្នុងអង្គមេទិញនោះ លោកបានថ្លែងទាក់ទងនឹងការប្រមូលរាល់មនុស្សដែលចង់ផ្លាស់ប្តូរប្រទេស។ ការប្រើពាក្យចង់ផ្លាស់ប្តូរប្រទេសដូច្នេះ អាចមានន័យថា លោកម៉ាក្រុងមិនពេញចិត្តនឹងរដ្ឋាភិបាលរបស់លោកហូឡង់ ដែលលោកខ្លួនឯងក៏ជារដ្ឋមន្ត្រីសេដ្ឋកិច្ចមួយរូបក្នុងជួររដ្ឋាភិបាលដែរនោះ។
ក្នុងនាមលោកជាសមាជិកបក្សសង្គមនិយមកាន់អំណាចសព្វថ្ងៃ ទង្វើទាំងអស់នេះ ហាក់បង្ហាញថា លោកកំពុងក្បត់បក្សខ្លួនឯងយ៉ាងច្បាស់ក្រឡែត ទោះមិនធ្វើដោយបើកចំហរក៏ដោយចុះ។ ប្រហែលដោយសារតែប្រជាប្រិយភាពក្នុងស្រុករបស់លោកកើនឡើងខ្ពស់ ទើបធ្វើអោយលោកកាន់តែក្រអឺត ក៏ថាបាន។ គួរបញ្ជាក់ថា ប្រជាប្រិយភាពរបស់ប្រធានាធិបតីហូឡង់បានធ្លាក់ចុះខ្លាំង បើប្រៀបនឹងលោកម៉ាក្រុង។
ទោះយ៉ាងនេះក្តី លោកម៉ាក្រុងមិនបានប្រាប់ជាផ្លូវការថា លោកចង់ឈរឈ្មោះជាបេក្ខជនបោះឆ្នោតប្រធានាធិបតីឆ្នាំក្រោយនេះទេ។ ក្នុងថ្ងៃបុណ្យជាតិនេះ លោកហូឡង់អាចនឹងប្រដែប្រដៅអោយលោកម៉ាក្រុងរៀបចំអត្តចរឹតអោយរាបសាបន្តិចទៅវិញ ព្រោះទង្វើលោកម៉ាក្រុង អាចធ្វើអោយបក្សកាន់អំណាចកាន់តែធ្លាក់ខ្សោយ។
ប្រជាប្រិយភាពលោកហូឡង់ធ្លាក់ចុះខ្លាំង មុនការបោះឆ្នោតប្រធានាធិបតីឆ្នាំ២០១៧
គេមិនដឹងថា តើប្រធានាធិបតីផុតអាណត្តិ រូបនេះ ចង់ឈរឈ្មោះក្នុងការបោះឆ្នោតឆ្នាំក្រោយនេះរឺយ៉ាងណាទេ។ ប្រសិនបើលោកចង់ឈរឈ្មោះ លោកអាចត្រឹមតែឈរឈ្មោះសម្រាប់ការបោះឆ្នោតក្នុងបក្សសង្គមនិយម ក្នុងចំណោមបេក្ខជនផ្សេងៗទៀត ដើម្បីរកបេក្ខជនប្រចាំបក្សប៉ុណ្ណោះ។
គេមិនដឹងថា តើលោកអាចជាប់ឆ្នោតរឺយ៉ាងណា ព្រោះប្រជាប្រិយភាពលោកក្នុងពេលបច្ចុប្បន្ន បានស្រុតចុះខ្លាំង។ ក្នុងស្រុក គេកំពុងនាំគ្នារិះគន់លោកហូឡង់ ថាចំណាយលុយបង់ថ្លៃជាងកាត់សក់ផ្ទាល់ខ្លួន មួយខែៗ សន្ធឹកសន្ធាប់ដល់ទៅជិត១០ ០០០អឺរ៉ូ។ ត្បិតថា អតីតសង្សារលោក គឺលោកស្រី វ៉ាឡេរី ទ្រីយែរវែលឡឺ បានចេញមុខបកស្រាយការពារថា លោកមិនបានដឹងរឿងប្រាក់ខែនេះក្តី ក៏បណ្តាញសង្គមបាននាំគ្នាចំអកលោកលេងរួចទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ