ពិភពលោកប្រារព្ធទិវាអន្តរជាតិប្រឆាំងនឹងនិទណ្ឌភាពនៃឧក្រិដ្ឋកម្មលើអ្នកសារព័ត៌មាន ជាលើកដំបូង
ចុះផ្សាយនៅថ្ងៃ៖
ស្តាប់ - ០៦:០៣
ថ្ងៃនេះជាខួបមួយឆ្នាំគត់ដែលវិទ្យុបារាំងអន្តរជាតិបានបាត់បង់សហជីវិនពីររូប។ អ្នកស្រី ស្ហ៊ីឡែនឌុយប៉ុង (Gislaine Dupont) អ្នកកាសែត និងលោក ក្លូដ បែរឡុង (Claude Verlon) អ្នកជំនួយការបច្ចេកទេស ត្រូវបានឃាតករចាប់ខ្លួននិងធ្វើឃាតនៅក្រុងគីដាល់ប្រទេសម៉ាលី។ ដើម្បីរំលឹកដល់វិញ្ញាណក្ខន្ធអ្នកកាសែតទាំងពីរ អង្គការសហប្រជាជាតិបានចេញក្រិត្យអនុម័តយកថ្ងៃទី ២ វិច្ឆិកា ជាទិវាអន្តរជាតិប្រឆាំងនឹងនិទណ្ឌភាពនៃឧក្រិដ្ឋកម្មលើអ្នកកាសែត ចាប់ពីឆ្នាំ២០១៤នេះតទៅ។
អង្គការសហប្រជាជាតិបានអនុម័ត នៅឆ្នាំ ២០១៣ នាឱកាសជំនួបប្រជុំលើកទី ៦៨ កំណត់យកថ្ងៃទី ២ វិច្ឆិកា ជាទិវាអន្តរជាតិប្រឆាំងនឹងនិទណ្ឌភាពនៃឧក្រិដ្ឋកម្មលើអ្នកកាសែត និងដើម្បីឧទ្ទិសដល់វិញ្ញាណក្ខន្ធអ្នកកាសែតរបស់វិទ្យុបារាំងពីររូប ស្លាប់នៅប្រទេសម៉ាលីពេលកំពុងបំពេញបេសកកម្ម។
ទិវាអន្តរជាតិប្រឆាំងនឹងនិទណ្ឌភាពនៃឧក្រិដ្ឋកម្មលើអ្នកកាសែត បានចូលជាធរមាននិងផ្លូវការ ជាលើកដំបូង នៅថ្ងៃទី ២ វិច្ឆិកា ២០១៤ និងដែលអង្គការសហប្រជាជាតិចង់បំផុសបំផុលឱ្យបានទូលំទូលាយបំផុត ឱ្យពិភពលោក រដ្ឋាភិបាល ប្រព័ន្ធឃោសនាព័ត៌មានបែបបូរាណ-ទំនើប អង្គការក្រៅរដ្ឋាភិបាល សង្គមស៊ីវិល បានស្គាល់ និងលើកតម្កើងទិវានេះ ជាបន្តរៀងទៅពីមួយឆ្នាំទៅមួយឆ្នាំ។ ទិវាអន្តរជាតិ ដែលនឹងក្លាយជាទម្រដ៏សំខាន់មួយក្នុងការរួមចំណែកធ្វើឱ្យប្រសើរឡើងផ្នែកសុវត្ថិភាព និងសន្តិសុខសម្រាប់អ្នកសារព័តមាន ក្នុងប្រយោជន៍បំរើការអភិវឌ្ឍន៍សង្គម។
ជាមួយនឹងការកំណត់ទិវាអន្តរជាតិប្រឆាំងនឹងនិទណ្ឌភាពនៃឧក្រិដ្ឋកម្មលើអ្នកសារព័ត៌មាន អង្គការសហប្រជាជាតិចង់ជំរុញឱ្យរដ្ឋជាសមាជិក ខិតខំធ្វើគ្រប់យ៉ាង ការពារមិនឱ្យមានអំពើហិង្សា ឬបើមាន ត្រូវតែបញ្ជូនជនឧក្រិដ្ឋទៅឱ្យតុលាការកាត់ទោសតាមច្បាប់ និងធានាបរិយាកាសសមស្របសម្រាប់ឱ្យអ្នកសារព័ត៌មានបំពេញការងារបានដោយឯករាជ្យ និងដោយគ្មានការជ្រៀតជ្រែក។
តើពិភពលោកនឹងក្លាយទៅជាយ៉ាងណាបើគ្មានការផ្តល់ព័ត៌មាន
ក្នុងមួយទសវត្សចុងក្រោយនេះ បើតាមអង្គការអ្នកយកការណ៍គ្មានព្រំដែន មានអ្នកកាសែត ជាង៧០០នាក់ទេ ត្រូវបានគេសម្លាប់ ពេលកំពុងបំពេញការងារ ព្រោះតែចង់ផ្តល់ព័ត៌មានដល់សាធារណជន។ នេះមិនរាប់អំពីចំនួនអ្នកកាសែតដែលរងការគំរាមកំហែង មិនដល់ស្លាប់ ការចាប់ឃុំឃាំង ធ្វើបាបរាងកាយ ការបង្ក្រាប ...ជារៀងរាល់ថ្ងៃ។
អ្វីដែលគួរព្រួយបារម្ភកាន់តែខ្លាំង គឺក្នុងចំណោមបទឧក្រិដ្ឋ១០ មានយ៉ាងច្រើនមួយករណីប៉ុណ្ណោះដែលសម្រេចបានដល់ការដាក់ទោស ។ តុល្យការដ៏គួរឱ្យព្រឺព្រួចនេះ បានធ្វើវិជ្ជាជីវៈជាអ្នកយកព័ត៌មាន ក្លាយជារបរប្រកបដោយគ្រោះថ្នាក់ គ្រោះថ្នាក់ដល់ជីវិតទៀត។ បើពិបាក បើមានគ្រោះថ្នាក់ នោះនឹងមានគ្រោះគ្មានទទួលបានព័ត៌មាន។ តើគេអាចស្រមៃបានទេថាពិភពលោកនឹងក្លាយទៅជាណា ប្រសិនបើគ្មានការផ្តល់ព័ត៌មានអ្វីនោះ។ នេះហើយជាកម្មវត្ថុដែលពិភពលោកអ្នកកាសែត ចង់បញ្ជ្រៀបក្នុងអារម្មណ៍អ្នកស្តាប់វិទ្យុ ទូរទស្សន៍ ប្រព័ន្ធអ៊ីនធ័រនែត ប្រព័ន្ធសង្គម ។ល។និង។ល។ នៅលើពិភពលោកទាំងមូល អំពីមូលដ្ឋានគ្រឹះនៃលទ្ធិប្រជាធិបតេយ្យ អំពីភាពចាំបាច់នៃសិទ្ធិទទួលបានព័ត៌មាន នាឱកាសទិវាអន្តរជាតិប្រឆាំងនឹងនិទណ្ឌភាពនៃឧក្រិដ្ឋកម្មប្រឆាំងនឹងអ្នកសារព័ត៌មាន លើកទីមួយ នៅថ្ងៃទី២វិច្ឆិកានេះ។
អ្នកកាសែតវិទ្យុបារាំងអន្តរជាតិស្លាប់នៅម៉ាលី ការអង្កេតអូសជើង
ទាក់ទងនឹងការអង្កេតសំណុំរឿងមរណភាព អ្នកស្រី Ghislaine Dupont និងលោក Claude Verlon កាលពីថ្ងៃពុធទី ២៩ តុលា រដ្ឋមន្ត្រីក្រសួងការបរទេសបារាំង បានប្រកាសថានៅចំពោះមុខសភា ការស៊ើបអង្កេតបានឈានដល់ដំណាក់កាលផ្តាច់ព្រ័ត្រហើយ !
អ្នកកាសែតបារាំងទាំងពីរ ត្រូវបានគេចាប់ខ្លួន រួចសម្លាប់ នៅពេលចេញពីផ្ទះមេដឹកនាំជាតិនិយមអាហ្សាវ៉ា ក្រោយពីសម្ភាសន៍រួច។ មួយឆ្នាំក្រោយ មានចំណុចអាថ៌កំបាំងច្រើនទម្លាយមិនចេញ ការស៊ើបអង្កេតជួបភាពស្មុគស្មាញខ្លាំង ជាពិសេសដោយសារស្ថានភាពនៅក្រុងគីដាល់ ដែលអំណាចកណ្តាលម៉ាលីក្តោបមិនជុំ។ ទោះបីការអង្កេតយឺតអូសជើងយ៉ាងណា ក៏ក្រុមគ្រួសារអ្នកកាសែតទាំងពីរ នៅតែមានក្តីសង្ឃឹមជានិច្ចថានឹងដឹងការពិតបាន នៅថ្ងៃខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ