ប្រជាជនអាល្លឺម៉ង់ប្រារព្ធខួប២៥ឆ្នាំនៃការដួលរលំជញ្ជាំងប៊ែឡាំង
ប្រជាជនអាល្លឺម៉ង់នៅថ្ងៃសៅរ៍ ទី ៩វិច្ឆិកានេះ បានប្រារព្ធខួប២៥ឆ្នាំនៃការដួលរលំជញ្ជាំងប៊ែរឡាំង ដែលធ្លាប់បានពុះខ័ណ្ឌចែកអាល្លឺម៉ង់ជាពីរ នៅក្រោយសង្រ្គាមលោកលើកទីពីរ។ ខុសពីការប្រារព្ធខួបលើកទី ២០ឆ្នាំ អាល្លឺម៉ង់នៅថ្ងៃនេះ មិនបានអញ្ជើញថ្នាក់ដឹកនាំកំពូលៗបរទេសឲ្យចូលរួម កម្មវិធីខួប២៥ឆ្នាំទេ ដោយចង់ផ្តោតសំខាន់ ឲ្យតម្លៃទៅលើប្រជាជនអាល្លឺម៉ង់ ដែលជាម្ចាស់ ចូលរួមធ្វើឲ្យជញ្ជាំងប៊ែរឡាំងដួលរលំ នាថ្ងៃទី ៩វិច្ឆិកា ឆ្នាំ ១៩៨៩។
ចុះផ្សាយនៅថ្ងៃ៖
ស្តាប់ - ០១:៤៩
នៅថ្ងៃទី៩ វិច្ឆិកា អាល្លឺម៉ង់ប្រារព្ធខួប២៥ឆ្នាំនៃការដួលរលំជញ្ជាំងប៊ែឡាំងនៅក្នុងបរិយាកាសបុណ្យប្រជាប្រិយ គឺគ្មានការចូលរួមពីមេដឹកនាំនយោបាយបរទេស ដូចលើកមុនៗទេ។ នៅថ្ងៃអាទិត្យនេះ ប្រជាជនអាល្លឺម៉ង់ និងទេសចរច្រើនជាងមួយលាននាក់បានធ្វើដំណើរទៅចូលរួមរំលឹកគុណដល់អ្នកដែលបានចូលទៅវាយផ្តួលរំលំជញ្ជាំងប៊ែរឡាំង។ ការដួលរលំជញ្ជាំងប៊ែរឡាំងមានតម្លៃជានិមិត្តរូបព្រោះវាបានធ្វើឲ្យអាល្លឺម៉ង់ ខាងលិច និងអាល្លឺម៉ង់ ខាងកើតបានបង្រួបបង្រួមចូលគ្នាជាអាល្លឺម៉ង់តែមួយ។ លើសពីនោះ ការដួលរលំជញ្ជាំងប៊ែរឡាំងបានកំណត់ផងដែរ ការបិទបញ្ចប់សង្រ្គាមត្រជាក់។
ប៉ុន្តែ លោក Mikhaïl Gorbatchev អតីតប្រធានាធិបតី សហភាពសូវៀត ដែលបានចូលរួមនៅក្នុងព្រឹត្តិការណ៍រំលឹកខួប នៅថ្ងៃអាទិត្យ នៅទីក្រុងប៊ែរឡាំងបែរជានិយាយថា ពិភពលោកកំពុងខិតទៅរកជ្រោះសង្រ្គាមត្រជាក់ថ្មីមួយទៀត។ នៅក្នុងបទសម្ភាសន៍មួយជាមួយវិទ្យុ ទូរទស្សន៍ស្វ៊ីស លោក Mikhaïl Gorbatchev ដែលគេស្គាល់ថា ជាអ្នកធ្លាប់ជួយឲ្យអាល្លឺម៉ង់រួមគ្នាតែមួយ បានរិះគន់យុទ្ធសាស្រ្តរបស់ក្រុមប្រទេសលោកខាងលិច ដែលកំពុងចង់ប្រកួតប្រជែងផ្នែកអាវុធជាថ្មី ជាមួយរុស្ស៊ី។ តាមលោកអតីតមេដឹកនាំសហភាពសូវៀត ជញ្ជាំងថ្មីកំពុងលេចមុខ ដូចជានៅប្រទេសអ៊ុយក្រែនជាដើម។
អតីតមេដឹកនាំសហភាពសូវៀត ដែលត្រូវចូលជួបលោកស្រីនាយករដ្ឋមន្រ្តីអាល្លឺម៉ង់ នៅថ្ងៃចន្ទ បានបញ្ជាក់ដែរថា សន្តិសុខនៅអឺរ៉ុបនឹងមិនអាចកើតឡើងបានទេ បើសិនជាគ្មានការសហការគ្នារវាងរុស្ស៊ី និងអាល្លឺម៉ង់។ តាំងពីពេលចេញដំណើរពីទីក្រុងម៉ូស្គូ លោកអតីតប្រធានាធិបតីសហភាពសូវៀត បានអះអាងរួចហើយថា លោកនឹងការពារជំហររបស់លោកប្រធានាធិបតីរុស្ស៊ី វ្លាឌីមៀរ ពូទីន នៅចំពោះមុខលោកស្រីនាយករដ្ឋមន្រ្តី អាល្លឺម៉ង់ នៅថ្ងៃចន្ទ។
នៅក្នុងសប្តាហ៍នេះ លោកស្រីប្រមុខដឹកនាំអាល្លឺម៉ង់ ធ្លាប់បានប្រកាស ចង់បង្កើនទណ្ឌកម្មសេដ្ឋកិច្ចទៅលើរដ្ឋាភិបាលរុស្ស៊ី បន្ទាប់ពីទីក្រុងម៉ូស្គូបានបង្ហាញជំហរគំាទ្រការបោះឆ្នោតរបស់ក្រុមទាមទារបំបែកទឹកដី នៅ ភាគខាងកើតអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ