គណបក្សប្រជាជនកម្ពុជារម្លឹកខួបរណសិរ្ស២ធ្នូ នៅក្រចេះ និងភ្នំពេញ
ព្រឹត្តិការណ៍ធំ២ ត្រូវគណបក្សប្រជាជនកម្ពុជារៀបចំធ្វើដើម្បីរម្លឹកខួបឆ្នាំទី៣៥ នៃការបង្កើតចលនារណសិរ្ស២ធ្នូ។ នៅថ្ងៃអាទិត្យនេះ សហភាពសហព័ន្ធយុវជនកម្ពុជាដែលដឹកនាំដោយលោកហ៊ុន ម៉ានី បានរៀបចំពិធីតាំងពិពណ៌ និងរៀបចំការប្រគំតន្ត្រីនៅក្នុងពហុកីឡាដ្ឋានជាតិអូឡាំពិក។ នៅព្រឹកថ្ងៃចន្ទទី២ធ្នូវិញ លោកហេង សំរិនប្រធានកិត្តិយសរបស់គណបក្សប្រជាជនកម្ពុជានឹងសម្ពោធវិមានអនុស្សាវរីយ៍២ធ្នូនៅក្នុងស្រុកស្នួលខេត្តក្រចេះ។
ចុះផ្សាយនៅថ្ងៃ៖
ស្តាប់ - ០២:៣២
«ខ្ញុំមានអាយុ៣៥ឆ្នាំ»។ នេះជាឈ្មោះនៃព្រឹត្តិការណ៍រម្លឹកខួបអនុស្សាវរីយ៍នៃការបង្កើតរណសិរ្ស២ធ្នូរបស់គណបក្សប្រជាជនកម្ពុជានៅឆ្នាំ១៩៧៨។ ចលនា២ធ្នូដែលត្រូវបានបង្កើតឡើងដើម្បីផ្តួលរំលំរបបកម្ពុជាប្រជាជាធិបតេយ្យរបស់ប៉ុល ពត អៀង សារី ខៀវ សំផន។
ក្នុងឆ្នាំនេះ គណបក្សប្រជាជនកម្ពុជាបានរៀបចំព្រឹត្តិការណ៍ធំ២ផ្សេងគ្នាដើម្បីឧទ្ទិសដល់ថ្ងៃ២ធ្នូ ដែលគណបក្សប្រជាជនកម្ពុជាអត្ថាធិប្បាយថា វាបានបង្កើតអោយមានថ្ងៃ៧មករា។
នៅថ្ងៃអាទិត្យនេះ សហភាពសហព័ន្ធយុវជនកម្ពុជា ដែលដឹកនាំដោយលោកហ៊ុន ម៉ានី កូនប្រុសមួយរូបរបស់លោកលោកនាយករដ្ឋមន្ត្រីហ៊ុន សែន បានរៀបចំព្រឹត្តិការណ៍តាំងពិពណ៌ និងការប្រគំតន្ត្រីខ្នាតធំមួយនៅក្នុងទីធ្លានៃពហុកីឡាដ្ឋានជាតិអូឡាំពិក។
នៅឯស្រុកស្នួល ក្នុងខេត្តក្រចេះឯណោះវិញ សមាជិកនៃអតីតចលនារណសិរ្ស សាមគ្គី សង្គ្រោះជាតិកម្ពុជា និងសមាជិករដ្ឋសភា នឹងមានវត្តមាននៅក្នុងពិធីសម្ពោធវិមានអនុស្សាវរីយ៍២ធ្នូដ៏ធំ និងថ្មីសន្លាង នៅព្រឹកថ្ងៃចន្ទទី២ធ្នូនេះ។ ពិធីសម្ពោធដែលត្រូវធ្វើឡើងក្រោមអធិបតីភាព លោកហេង សំរិន ប្រធានកិត្តិយសគណបក្សប្រជាជនកម្ពុជា និងជាប្រធានរដ្ឋសភាជាតិកម្ពុជា។
លោកញ៉ែម ថ្ថាវី សមាជិករដ្ឋសភា និងជាមន្ត្រីជាន់ខ្ពស់មួយរូបរបស់គណបក្សប្រជាជនកម្ពុជាបានពន្យល់ប្រាប់វិទ្យុបារាំងអន្តរជាតិថា ថ្ងៃទី២ធ្នូឆ្នាំ១៩៧៨ ជាថ្ងៃប្រវត្តិសាស្ត្រដ៏មានអត្ថន័យមួយរបស់ប្រទេសកម្ពុជា និងរបស់គណបក្សប្រជាជនកម្ពុជា។ តំណាងរាស្ត្រមណ្ឌលខេត្តកំពង់ធំរូបនេះបញ្ជាក់ថា គេមិនអាចបំភ្លេចចំនុចប្រត្តិសាស្ត្រ២ធ្នូ ដែលបានបង្កើតអោយមានអ្វីៗទាំងអស់នៅពេលនេះបាននោះទេ។
២ធ្នូ១៩៧៨គឺជាការចាប់កំណើតនៃចលនាតស៊ូដែលមានឈ្មោះថា«រណសិរ្ស សាមគ្គីសង្គ្រោះជាតិកម្ពុជា»នៅឯស្រុកស្នួល ខេត្តក្រចេះ។ រណសិរ្សនេះត្រូវបានបង្កើតឡើងក្នុងគោលដៅផ្តួលរំលំរបបវាលពិឃាតនៅលើទឹកដីកម្ពុជាចន្លោះពីឆ្នាំ ១៩៧៥ដល់១៩៧៩ ក្រោមការជួយគាំទ្រពី កងទ័ពវៀតណាម។
នៅកម្ពុជា អ្នកនយោបាយដែលខុសនិន្នាការគ្នា បានផ្តល់តម្លៃទៅលើថ្ងៃប្រវត្តិសាស្ត្រផ្សេងៗគ្នា។ ខណៈដែលគណបក្សប្រឆាំង និងអង្គការសង្គមស៊ីវិលមួយចំនួនទទួលស្គាល់តែថ្ងៃទី២៣តុលា១៩៩១ ថាជាថ្ងៃនាំសន្តិភាពអោយដល់កម្ពុជានោះ ថ្នាក់ដឹកនាំគណបក្សប្រជាជនកម្ពុជានៅតែអោយតម្លៃទៅលើថ្ងៃ២ធ្នូ១៩៧៨នេះ។ អនុប្រធានគណបក្សប្រជាជនកម្ពុជាលោកហ៊ុន សែនធ្លាប់បាននិយាយថា បើគ្មាន២ធ្នូ១៩៧៨ ក៏មានថ្ងៃ៧មករា១៩៧៩ ហើយក៏គ្មានជំនួប សីហនុ-ហ៊ុន សែន ឆ្នាំ១៩៨៧ ហើយក៏គ្មាន២៣តុលា ១៩៩១ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ