ផ្តាសាយបក្សីផ្ទុះ២ករណីបន្ថែម
គិតត្រឹមថ្ងៃព្រហស្បតិ៍ទី១៤ វិច្ឆិកានេះ ពលរដ្ឋកម្ពុជាចំនួន២នាក់បន្ថែមទៀត ហើយត្រូវបានគេប្រកាសឱ្យដឹងថាមានឆ្លងជំងឺផ្តាសាយបក្សី។ ជំងឺផ្តាសាយបក្សី ដែលបានចម្លងដល់ពលរដ្ឋកម្ពុជាចំនួន២៦នាក់ ហើយក្នុងឆ្នាំ២០១៣នេះ។ រដ្ឋមន្ត្រីក្រសួងសុខាភិបាល បានព្រមានថា ជំងឺផ្តាសាយក្សីនៅតែបន្តគំរាមកំហែងដល់ពលរដ្ឋកម្ពុជា ហើយកុមារជាអ្នកងាយរងគ្រោះ និងមានហានិភ័យខ្ពស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ក្រសួងសុខាភិបាល បានព្រមានចំពោះការរីករាលដាលជំងឺផ្តាសាយបក្សីដែលកំពុងតែបន្តរុកកួនអាយុជីវិត និងសុខភាពពលរដ្ឋកម្ពុជា ខណៈដែលពលរដ្ឋកម្ពុជាចំនួន២នាក់បន្ថែមទៀតហើយ បានឆ្លងជំងឺផ្តាសាយបក្សីH5N1 នៅក្នុងខែវិច្ឆិកានេះ។ ថ្លែងក្នុងសេចក្តីប្រកាសព័ត៌មានកាលពីថ្ងៃទី១៤ វិច្ឆិកា លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានសង្កត់ធ្ងន់ថា ជំងឺផ្តាសាយបក្សី H5N1 នៅតែបន្តគំរាមកំហែងដល់សុខភាពពលរដ្ឋកម្ពុជា ហើយថា ជំងឺនេះច្រើនកើតមានលើកុមារដែលជាអ្នកមានភាពងាយរងគ្រោះច្រើន និងមានហានិភ័យខ្ពស់។
លោកបានលើកឡើងបញ្ជាក់ពីមូលហេតុដែលនាំឱ្យកុមារជាអ្នកងាយរងគ្រោះចំពោះជំងឺផ្តាសាយបក្សីនេះថា ជានិច្ចកាល កុមារតែងតែជាអ្នកមើលថែទាំ និងឱ្យចំណីបក្សី និយាយជារួមជាអ្នកនៅកៀកផ្ទាល់ជាមួយបក្សី។
ជាការឆ្លើយតបចំពោះជំងឺផ្តាសាយបក្សីនេះ យុទ្ធនាការអប់រំសុខភាពសាធារណៈទូទាំងប្រទេស ត្រូវបានដាក់កំពុងឱ្យដំណើរការអនុវត្តន៍ក្នុងខេត្តពីរ គឺភូមិវាល់វង់ ស្រុកសំរោងទង ខេត្តកំពង់ស្ពឺ និងភូមិកូនដំរី ស្រុកសាលាក្រៅ ខេត្តប៉ៃលិន។
គួររំលឹកថា គិតជាសរុប ជំងឺផ្តាសាយបក្សីបានឆ្លងដល់ពលរដ្ឋកម្ពុជាចំនួន៤៧ករណី នៅទូទាំងប្រទេស។ ហើយ៣៥ករណី បានកើតលើកុមារអាយុក្រោម១៤ឆ្នាំ និង ២៧ករណី ក្នុងចំណោមករណីទាំងអស់ជានារី។ តែក្នុងឆ្នាំ២០១៣នេះមួយប៉ុណ្ណោះ មនុស្សចំនួន១៣នាក់បានស្លាប់បាត់បង់ជីវិត។ ជាមួយនឹងការកើនឡើងគួរឱ្យព្រួយបារម្មណ៍នេះ ក្រសួងសុខាភិបាលក៏បានព្រមានថា បើទោះបីជាជំងឺផ្តាសាយបក្សី H5N1 នេះ មិនងាយឆ្លងទៅកាន់មនុស្សក៏ដោយ ប៉ុន្តែបើវាផ្លាស់ប្តូរ ជំងឺនេះនឹងអាចរាលដាលដូចនឹងជំងឺផ្តាសាយតាមរដូវកាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ