មានប្រទេសចំនួន ៣០ កំពុងស្វែងរកកិច្ចសហប្រតិបត្តិការរួមគ្នាក្នុងផ្នែកអវកាស
នៅថ្ងៃព្រហស្បតិ៍ ទី៩ មករា អង្គ Forum អន្តរជាតិស្តីពីការរុករកអវកាសត្រូវបានរៀបចំឡើងនៅក្រសួងការបរទេសអាមេរិកដោយមានការចូលរួមពីប្រទេសចំនួន ៣០ ក្នុងមានចិន និងរុស្ស៊ីជាដើម។ គោលដៅនៃអង្គ Forum នោះ គឺស្វែងរកកិច្ចសហប្រតិបត្តិរួមគ្នាក្នុងផ្នែកអវកាស។ វិស័យអវកាសដែលមកទល់សព្វថ្ងៃ មានការប្រកួតប្រជែងដាច់ដោយឡែកគ្នារវាងប្រទេសនីមួយៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
អង្គ Forum អន្តរជាតិស្តីពីការរុករកអវកាសត្រូវបានបង្កើតឲ្យមានឡើងកាលពីជាង ២ឆ្នំាមុននៅក្នុងប្រទេសអ៊ីតាលី ក្រោមការជួយឧបត្ថម្ភរបស់សហភាពអឺរ៉ុប និងទីភ្នាក់ងារអវកាសអឺរ៉ុប។ តែនេះជាលើកទីមួយដែលអង្គ Forum ត្រូវបានរៀបចំឡើងនៅក្នុងក្រសួងការបរទេសអាមេរិក។ គឺជាជំនួបថ្នាក់រដ្ឋមន្រ្តីដោយមានការចូលរួមពី៣០ប្រទេស មានដូចជាអឺរ៉ុប ចិន រស្ស៊ី ជប៉ុន ឥណ្ឌា ឬមួយក៏ប្រេស៊ីលជាដើម។ គោលដៅនៃអង្គ Forum លើកនេះ គឺស្វែងរកកិច្ចសហប្រតិបត្តិការរួមគ្នាក្នុងការរុករកអវកាស ដោយទុកមួយកន្លែងនូវការប្រណំាងប្រជែងគ្នាក្នុងវិស័យនេះ។ ថ្លែងនៅចំពោះមុខគណៈប្រតិភូដែលបានចូលរួម លោកអនុរដ្ឋមន្រ្តីការបរទេសអាមេរិក William Burns បានជំរុញប្រទេសចូលរួមទំាងអស់ឲ្យលះបង់នូវគំនិតអាត្មានិយម និងរួមសហការណ៍គ្នានៅក្នុងការរុករកអវកាសដើម្បីប្រយោជន៍មនុស្សលោកទូទៅ។
គួររម្លឹកជូនថា កាលនៅក្នុងសម័យសង្រ្គាមត្រជាក់ ការរុករកអវកាសបានក្លាយជាល្បែងនៃការប្រកួតប្រជែងគ្នាយ៉ាងខ្លំាងរវាងសហរដ្ឋអាមេរិក និងសហភាពសូវៀត។ មហាអំណាចពិភពលោកទំាងពីរក្នុងជំនាន់នោះបានប្រជែងគ្នាដើម្បីក្លាយជាអ្នកទីមួយដែលបានទៅដល់ភពព្រះចន្ទមុនគេ ឬមួយក៏អាចបញ្ជូននាវាអវកាសដែលមានមនុស្សស្នាក់នៅទៅក្នុងតារាវិថីមុនគេ។ សព្វថ្ងៃនេះទៀត ការប្រកួតប្រជែងផ្នែកអវកាសក៏កំពុងបន្តមានរវាងប្រទេសចិន ជប៉ុន និងឥណ្ឌា។ ឥណ្ឌាដែលទើបបញ្ជូនដោយជោគជ័យកាលពីខែវិច្ឆិកា ឆ្នំាទៅមិញ នូវយាន្តអវកាសមួយដែលនំាទៅជាមួយនូវម៉ាស៊ីនស្ទង់មួយទៅក្បែរភពផ្កាយអង្គារ។
បច្ចុប្បន្ននេះ មាន១៦ប្រទេសហើយក្នុងនោះមានជប៉ុន អាមេរិក រុស្ស៊ីអឺរ៉ុបបានរួមសហការណ៍គ្នានៅក្នុងវិស័យអវកាសតាមរយៈស្ថានីយ៍អវកាសអន្តរជាតិដោយបានចំណាយលុយអស់ ១០០ ០០០លានដុល្លារ និងដែលកិច្ចសហប្រតិបត្តិការនេះទើបបានពន្យារពេលរហូតដល់ទៅឆ្នំា ២០២៤។ តែមហិច្ឆតារបស់អង្គ Forum អន្តរជាតិស្តីពីការរុករកអវកាស គឺចង់ឲ្យកិច្ចសហប្រតបត្តិការក្នុងវិស័យអវកាសនេះក្លាយជាកិច្ចសហប្រតិបត្តិការមានលក្ខណៈពិភពលោកតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ