កម្ពុជាប្រារព្ធខួប៦០ឆ្នាំនៃបុណ្យឯករាជ្យជាតិក្នុងបរិបទនៃវិបត្តិនយោបាយ
ទិវាបុណ្យឯករាជ្យជាតិ ៩វិច្ឆិកាឆ្នាំនេះត្រូវបានប្រារព្ធឡើងយ៉ាងអធិកអធម ជាងឆ្នាំមុនៗដោយសារតែឆ្នាំនេះជាខួបទី ៦០ ឆ្នាំ (៩វិច្ឆិកា ១៩៥៣-៩វិច្ឆិកា ២០១៣ )។ ក្រៅពីដាក់កម្រងផ្កា និងប្រទានព្រះភ្លើងជ័យនៅឯវិមានឯករាជ្យ ដោយព្រះមហាក្សត្រ ក៏មានដែរពិធីជួបជុំប្រារព្ធអង្គមិទ្ទិញនៅមុខព្រះបរមរាជវាំង។ ព្រះមហាក្សត្របានអំពាវនាវឲ្យមានការរួបរួមគ្នាក្រោមដំបូលរដ្ឋធម្មនុញ្ញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣១
តាំងពីព្រឹកព្រលឹម ព្រះមហាក្សត្រ សម្តេចព្រះបរមនាថ នរោត្តម សីហមុនី បានយាង ទៅដល់វិមានឯករាជ្យដើម្បីគោរពវិញ្ញាណក្ខន្ធអ្នកសេ្នហាជាតិ និងប្រទានភ្លើងជ័យដែលជានិមិត្តរូបនៃពិធីបុណ្យឯករាជ្យជាតិ។
មន្ត្រីជាន់ខ្ពស់នៃស្ថាប័នជាតិកំពូលៗរួមទាំងអង្គទូតនានាផងក៏បានទៅចូលរួមក្នុងពីធីនេះដែរ។ វត្តមាននៅក្នុងពិធីនោះមាន លោក ហេង សំរិន ប្រធានរដ្ឋសភា និងលោកនាយករដ្ឋមន្ត្រី ហ៊ុន សែន ប្រមុខរដ្ឋាភិបាល ប៉ុន្តែ គ្មានវត្តមានលោក ជា ស៊ីម ប្រធានព្រឹទ្ធសភាទេទំនងជាដោយសារបញ្ហាសុខភាព។ បន្ទាប់មក ព្រះមហាក្សត្រ និងមន្ត្រីអ្នកមុខអ្នកការទាំងអស់ក៏បានទៅចូលរួមក្នុងពិធីមិទ្ទិញនៅមុខព្រះបរមរាជវាំង។
ក្នុងព្រះរាជសុន្ទរកថាទៅកាន់មហាជន សម្តេចព្រះបរមនាថបានរម្លឹកឡើងវិញពីប្រវត្តិនៃការទាមទារឯករាជ្យជាតិពីប្រទេសបារាំងក្រោមព្រះរាជបូនីយកិច្ចរបស់អតីតព្រះមហាក្សត្រ សម្តេចព្រះ នរោត្តម សីហនុ។ ពិធីបុណ្យឯករាជ្យជាតិឆ្នាំនេះមានសភាពអធិកអធមជាងឆ្នាំមុនៗ ប៉ុន្តែ ទិវានេះក៏បានកើតឡើងក្នុងបរិបទដែលកម្ពុជាកំពុងជួបប្រទះវិបត្តិនយោបាយក្រោយការបោះឆ្នោត។ គ្មានទេវត្តមានមន្ត្រីគណបក្សសង្គ្រោះជាតិនៅក្នុងពិធីនោះ។
គណបក្សប្រឆាំងដែលទទួលបាន ៥៥ កៅអីក្នុងរដ្ឋសភាបានបដិសេធមិនទទួលយកលទ្ធផលនៃការបោះឆ្នោតនិងមិនបានចូលប្រជុំសភារហូតមក។ យ៉ាងណាក៏ដោយ គណបក្សប្រជាជនកម្ពុជាដែលទទួលបានសំឡេងគាំទ្រ ៦៨ កៅអីក្នុងសភាបានបង្កើតរដ្ឋសភា និងរដ្ឋាភិបាលរួចហើយក្រោមព្រះរាជវត្តមានរបស់ព្រះមហាក្សត្រ។
ថ្លែងសុន្ទរកថាក្នុងអង្គមិន្ទិញនេះ លោកនាយករដ្ឋមន្ត្រី ហ៊ុន សែន បានអះអាងថា រដ្ឋាភិបាលអាណត្តិទី៥ នេះជារដ្ឋាភិបាលស្របច្បាប់និងកើតចេញពីប្រជាជនបោះឆ្នោតគាំទ្រ ហើយរដ្ឋាភិបាល នឹងធ្វើអ្វីៗដើម្បីប្រជាជនវិញ។ ប្រហែលជាក្នុងបរិបទនៃការបែកបាក់នយោបាយនេះហើយបានជាព្រះមហាក្សត្របានអំពាវនាវជាថ្មីទៀតឲ្យខ្មែររួបរួមគ្នាដើម្បីការរីកចម្រើនរបស់ប្រទេសជាតិ។
គួរបញ្ជាក់ដែរថា ថ្ងៃ៩វិច្ឆិកានេះក៏ជាថ្ងៃប្រារព្ធខួបកំណើតនៃកងយោធពលខេមរភូមិន្ទផងដែរ។ ថ្ងៃបុណ្យឯករាជ្យជាតិ ៩ វិច្ឆិកាឆ្នាំនេះក៏ត្រូវបានប្រារព្ធឡើងក្នុងបរិបទដែល អតីតព្រះមហាក្សត្រ សម្តេចឳនរោត្តម សីហនុ ដែលជាតួអង្គអ្នកទាមទារឯករាជ្យ និងជានិមិត្តរូបនៃការផ្សះផ្សារបង្រួបបង្រួមជាតិនៅកម្ពុជាគ្មានវត្តមាននៅលើលោកនេះ ទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ