អាជ្ញាធរចិនដោះលែងវិចិត្រករអៃ វៃវៃឲ្យនៅក្រៅឃុំបណ្តោះអាសន្ន
ជាការដោះលែងមួយដ៏ភ្ញាក់ផ្អើលដែលមិនមានអ្នកណាគិតស្មានដល់។ នៅថ្ងៃពុធទី២៣ មិថុនា ២០១១ វិចិត្រករ អៃ វៃវៃ ត្រូវបានដោះលែងឲ្យមានសេរីភាពបណ្តោះអាសន្ន នៅក្រោយការដាក់ឃុំ ក្នុងគុកប៉ូលិសជិតបីខែ។ វិចិត្រករ អៃ វៃវៃ ដែលអន្តរជាតិស្គាល់តាមរយៈការរិះគន់របស់គាត់ ផ្ទាល់ទៅលើការរំលោភសិទ្ធិមនុស្សដោយរដ្ឋអំណាចចិន ត្រូវអាជ្ញាធរចាប់ខ្លួន ស្ងាត់ៗ កាលពីខែមេសា នៅមុនពេលលោកឡើងយន្តហោះសំដៅទីក្រុងឡុងដ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
វិចិត្រករ អៃ វៃវៃ ត្រូវប៉ូលិសចិនចាប់ដាក់ឃុំដោយ សម្ងាត់ ជាងពីរខែកន្លះ មុននឹងត្រូវដោះលែង កាលពីថ្ងៃពុធម្សិលមិញ។ ដោយមិនធ្វើអត្ថាធិប្បាយច្រើន វិចិត្រករវ័យ ៥៤ឆ្នាំ គ្រាន់តែនិយាយតាមទូរស័ព្ទប្រាប់ទីភ្នាក់ងារព័ត៌មានបារាំង AFPថា លោកសប្បាយចិត្ត ដែលមានសេរីភាព និងបានជួបជុំគ្រួសារឡើងវិញ។ លោក អៃ វៃវៃបានបដិសេធមិននិយាយអ្វីច្រើន ជាពិសេសទាក់ទងនឹងលក្ខខណ្ឌជីវិតរបស់លោក នៅពន្ធនាគារទេ។ លោកបានចាកចេញពីផ្ទះរបស់លោក នៅភាគខាងជើងទីក្រុងប៉េកាំង និងសម្រេចទៅរស់នៅ ជាមួយក្រុមគ្រួសារ ដែលអាស័យដ្ឋានមិនត្រូវបានគេបង្ហើបឲ្យដឹង។
បើតាមទីភ្នាក់ងារព័ត៌មានចិនថ្មី វិចិត្រករ អៃ វៃវៃត្រូវដោះលែងឲ្យនៅក្រៅឃុំដោយមកពីគាត់បានសារភាពទោសកំហុសរបស់គាត់ និងមួយវិញទៀត ដោយមកពីគាត់កំពុងមានជម្ងឺទឹកនោមផ្អែមផង។
អ្នកនាំពាក្យរបស់ក្រសួងការបរទេសចិនបាននិយាយបញ្ជាក់ នៅថ្ងៃព្រហស្បតិ៍នេះថា សិល្បករ អៃ វៃវៃ ត្រូវបានដោះលែងឲ្យនៅក្រៅឃុំបណ្តោះអាសន្ន។ ដូច្នេះ អៃ វៃវៃ មិនមានសិទ្ធិចាកចេញពីកន្លែងស្នាក់នៅរបស់គាត់ ដោយគ្មានការអនុញ្ញាតិពីអាជ្ញាធរចិនទេ។ នោះមានន័យថា បើទោះបីជា អៃ វៃវៃ នៅក្រៅឃុំមែន ប៉ុន្តែ នៅក្នុងរយៈពេលមួយឆ្នាំ នៃការតាមដានស៊ើបអង្កេត គាត់ត្រូវចូលខ្លួនទៅបង្ហាញមុខនៅតុលាការ និងមិនបំផ្លាញភ័ស្តុតាង។
អៃ វៃវៃ ជាវិចិត្រករមានស្នាដៃ ដោយលោកបានចូលរួមគូររចនាប្លង់ពហុកីឡាដ្ឋានជាតិ ដ៏ល្បីឈ្មោះនៅប្រទេសចិន សម្រាប់ទទួលកីឡាអូឡាំពិក ឆ្នាំ ២០០៨។ នៅក្រោយអាជ្ញាធរចាប់ខ្លួន សកម្មជនការពារសិទ្ធិមនុស្ស លោកបានចេញមុខរិះគន់ផ្ទាល់ដល់ចំណាត់ការរំលោភសិទ្ធិមនុស្សរបស់រដ្ឋអំណាចចិន។ ដូច្នេះ នៅក្នុងរលកបង្រ្កាបអ្នកដែលរិះគន់ខ្លួន អាជ្ញាធរចិនបានចាប់លោក អៃ វៃវៃ មុនពេលឡើងយន្តហោះ ទៅចូលរួមក្នុងការតាំងពិព័រណ៌របស់លោកនៅទីក្រុងឡុងដ៍។ អាជ្ញាធរប៉េកាំងបានចោទលោកអៃ វៃវៃពីបទគេចវេះ មិនបង់ពន្ធជូនរដ្ឋ។
យោងតាមមេធាវីរបស់លោក អៃ វៃវៃ ទោសគេចពន្ធមានត្រឹមការផាកពិន័យ ប៉ុន្តែ ក្នុងករណីរបស់លោក អៃ វៃវៃ លោកអាចជាប់ទោសដាក់ពន្ធនាគារ ដោយតុលាការបានចោទប្រកាន់លោកថា មានចេតនាបំផ្លាញឯកសារដែលពាក់ព័ន្ធនឹងការគេចពន្ធ។
អន្តរជាតិ ជាពិសេសអង្គការការពារសិទ្ធិមនុស្សស្វាគម ការដោះលែងវិចិត្រករ អៃ វៃវៃ ប៉ុន្តែ អន្តរជាតិនៅតែប្រយ័ត្នប្រយែង និងមិនទាន់ទុកចិត្តទាំងស្រុងទៅលើជំហររបស់ចិន ដែលសុខចិត្តដោះលែងលោក អៃ វៃវៃ។ អង្គការHuman Rights Watch អង្គការAmnesy International និង អង្គការអ្នកកាសែតគ្មានព្រំដែនបានវាយតម្លៃថា អាជ្ញាធរចិនបានទទួលជោគជ័យក្នុងការបង្រ្កាបទៅលើអ្នកប្រឆាំងនឹងខ្លួន។ រដ្ឋអំណាចចិនបានប្រើតុលាការ ដើម្បីគំរាមបិទមាត់សកម្មជនការពារសិទ្ធិមនុស្ស។
ជាក់ស្តែង នៅក្រោយការដោះលែង លោក អៃ វៃវៃ បានរក្សាភាពស្ងៀមស្ងាត់ មិននិយាយស្តីអ្វីទាំងអស់។ អង្គការអន្តរជាតិមើលឃើញថា បន្ទាប់ពីអាជ្ញាធរបានហាមមិនឲ្យលោក វៃវៃ ទាក់ទងនឹងអ្នកកាសែត និងស្ថាប័នអន្តរជាតិ លោក វៃវៃត្រូវបិទមាត់ មិនរិះគន់ អាជ្ញាធរចិន ដើម្បីជៀសវាងការចាប់ឃុំជាថ្មី និងដើម្បីសន្តិសុខរបស់គ្រួសាររបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ