ប្រមុខដឹកនាំបារាំង-អាល្លឺម៉ង់យល់ស្របគ្នាពីបញ្ហាក្រិក តែនៅពុំទាន់ចុះសម្រុងគ្នាពីកំណើនសេដ្ឋកិច្ច
ចុះផ្សាយនៅថ្ងៃ៖
ស្តាប់ - ០៥:២៥
ទើបតែបានត្រូវគេតែងតាំងថ្មីៗជាប្រធានាធិបតីបារាំងនៅព្រឹកថ្ងៃអង្គារទី១៥ឧសភាឆ្នាំ២០១២ លោកហ្វ្រង់ស័រហូឡង់ក៏បានអញ្ជើញទៅទីក្រុងប៊ែរឡាំងភ្លាម ដើម្បីជួបពិភាក្សាជាមួយលោកស្រីនាយករដ្ឋមន្ត្រីអាល្លឺម៉ង់អង់ហ្គែឡាមែរគែលពីបញ្ហាកំណើនសេដ្ឋកិច្ចនៅអឺរ៉ុប និងបញ្ហាប្រទេសក្រិក។
លោកប្រធានាធិបតីបារាំងហ្វ្រង់ស័រហូឡង់អញ្ជើញទៅជួបពិភាក្សាជាមួយលោកស្រីនាយករដ្ឋមន្ត្រីអាល្លឺម៉ង់យ៉ាងឆាប់រហ័សបែបនេះ មកពីលោកហ្វ្រង់ស័រហូឡង់ចង់គូសបញ្ជាក់ឲ្យឃើញនូវសារៈសំខាន់នៃនិមិត្តរូបនៃចំណងមិត្តភាពបារាំង-អាល្លឺម៉ង់ ហើយនិងសហប្រតិបត្តិការបារាំង-អាល្លឺម៉ង់នៅក្នុងសហភាពអឺរ៉ុប។
ក្រោយពីបានជួបពិភាក្សាគ្នា ប្រមុខដឹកនាំបារាំងនិងអាល្លឺម៉ង់បានធ្វើសន្និសីទកាសែតរួមគ្នាមួយ ដោយបានថ្លែងបង្ហាញឲ្យឃើញនូវទស្សនៈយល់ឃើញដូចគ្នាពីបញ្ហាសេដ្ឋកិច្ចនិងហិរញ្ញវត្ថុនៅប្រទេសក្រិក ហើយបានប្រកាសឲ្យដឹងពីឆន្ទៈរបស់ខ្លួនក្នុងការរក្សាប្រទេសក្រិកឲ្យឋិតនៅក្នុងតំបន់ចាយប្រាក់អឺរ៉ូ។ ក៏ប៉ុន្តែពាក់ព័ន្ធនឹងវិធានការជំរុញឲ្យមានសន្ទុះកំណើនសេដ្ឋកិច្ចនៅអឺរ៉ុបវិញ ប្រទេសបារាំងរបស់លោកហ្វ្រង់ស័រហូឡង់និងប្រទេសអាល្លឺម៉ង់របស់លោកស្រីមែរគែលមានជំហរនិងមានទស្សនៈយល់ឃើញខុសៗគ្នា។
ពាក់ព័ន្ធនឹងបញ្ហាប្រទេសក្រិក លោកប្រធានាធិបតីបារាំងហ្វ្រង់ស័រហូឡង់និងលោកស្រីនាយករដ្ឋមន្ត្រីអាល្លឺម៉ង់ចង់ឲ្យទីក្រុងអាថែនបន្តឋិតនៅក្នុងតំបន់ចាយប្រាក់អឺរ៉ូ ហើយក្បាលម៉ាស៊ីនសេដ្ឋកិច្ចបារាំង-អាល្លឺម៉ង់នឹងខិតខំរិះរកគ្រប់លទ្ធភាពសម្រាប់ជួយដោះស្រាយវិបត្តិហិរញ្ញវត្ថុក្រិក។ ទីក្រុងប៉ារីសនិងទីក្រុងប៊ែរឡាំងបានថ្លែងប្រាប់ទៀតថា គេនឹងរិះរកវិធានការថ្មីសម្រាប់ជួយជំរុញឲ្យប្រទេសក្រិកមានកំណើនសេដ្ឋកិច្ចឡើងវិញ ប្រទេសក្រិកដែលកំពុងធ្លាក់ទៅក្នុងវិបត្តិនយោបាយដ៏វឹកវរ ហើយកំពុងគ្រោងរៀបចំធ្វើការបោះឆ្នោតជ្រើសតាំងសមាជិកសភាក្រិកជាថ្មីម្តងទៀតនៅរវាងខែមិថុនាខាងមុខនេះ។
គួរកត់សម្គាល់ថា នៅក្នុងបរិបទដែលមានវិបត្តិសេដ្ឋកិច្ចនិងវិបត្តិហិរញ្ញវត្ថុដ៏វឹកវរបែបនេះ ទីផ្សារហិរញ្ញវត្ថុអន្តរជាតិកំពុងបារម្ភយ៉ាងខ្លាំង ខ្លាចប្រទេសក្រិកចាកចេញពីតំបន់អឺរ៉ូ។ នៅថ្ងៃពុធទី១៦ឧសភានេះ ទីផ្សារភាគហ៊ុននៅទីក្រុងប៉ារីសនៅម៉ោង៩និង៤៥នាទីបានធ្លាក់ស្រុតបាត់បង់អស់១,២២%មកនៅ៣ ០០១ពិន្ទុ ដោយហេតុតែគេបារម្ភខ្លាចក្រែងវិបត្តិហិរញ្ញវត្ថុនៅប្រទេសក្រិកធ្វើឲ្យតំបន់ចាយប្រាក់អឺរ៉ូធ្លាក់ទៅក្នុងសភាពផុយស្រួយ។
បើប្រទេសក្រិកនៅតែមានវិបត្តិនយោបាយ វិបត្តិសេដ្ឋកិច្ច និងវិបត្តិហិរញ្ញវត្ថុរកច្រកចេញពុំរួច ការចាកចេញពីតំបន់អឺរ៉ូគឺពិតជាចៀសពុំផុត។ សម្មតិកម្មនៃការចាកចេញពីតំបន់អឺរ៉ូដោយប្រទេសក្រិកដែលគេពុំដែលហ៊ានរំលឹកដល់ ឥឡូវនេះបានត្រូវលើកយកមកនិយាយដោយលោកស្រីគ្រីស្ទីនឡាហ្កាដ អគ្គនាយកនៃមូលនិធិរូបុយវត្ថុអន្តរាជាតិ FMI ដែលជាម្ចាស់បំណុលដ៏ធំរបស់ប្រទេសក្រិក។
ហើយការចាកចេញពីតំបន់ចាយប្រាក់អឺរ៉ូដោយទីក្រុងអាថែនអាចធ្វើឲ្យប្រទេសបារាំងបាត់បង់អស់ប្រមាណ៥០ពាន់លានអឺរ៉ូ។ នេះបើយោងតាមតួលេខរបស់លោកហ្វ្រង់ស័របារ័ង អតីតរដ្ឋមន្ត្រីក្រសួងហិរញ្ញវត្ថុបារាំង។
ពាក់ព័ន្ធកិច្ចព្រមព្រៀងតុល្យភាពថវិកានិងវិធានការជំរុញឲ្យមានសន្ទុះកំណើនសេដ្ឋកិច្ចវិញ លោកប្រធានាធិបតីបារាំងហ្វ្រង់ស័រហូឡង់បានថ្លែងប្រាប់កាលពីម្សិលមិញនៅទីក្រុងប៊ែរឡាំងថា “លោកនឹងយករាល់បញ្ហានិងរាល់វិធានការពាក់ព័ន្ធនឹងកិច្ចព្រមព្រៀងតុល្យភាពថវិកានិងវិធានការជំរុញឲ្យមានសន្ទុះកំណើនសេដ្ឋកិច្ច មកដាក់នៅលើតុចរចានាឱកាសជំនួបក្រុមប្រឹក្សាអឺរ៉ុបនៅថ្ងៃទី២៣ឧសភាខាងមុខនេះ ក៏ដូចគ្នាអ៊ីចឹងដែរសម្រាប់សញ្ញាប័ណ្ណអឺរ៉ូ”។ សញ្ញាប័ណ្ណអឺរ៉ូដែលទីក្រុងប៊ែរឡាំងពុំចង់ដឹងឮសោះឡើយ។
លោកប្រធានាធិបតីបារាំងបានសង្កត់បញ្ជាក់ឲ្យដឹងថា លោកចង់ឲ្យមានការចរចាឡើងវិញនូវ “កិច្ចព្រមព្រៀងតុល្យភាពថវិកា”។ “កិច្ចព្រមព្រៀងតុល្យភាពថវិកា” ដែលតម្រូវឲ្យមានវិន័យយ៉ាងសែនតឹងរ៉ឹងជ្រុលហួសនៅក្នុងអឺរ៉ុបមួយដែលកំពុងមានវិបត្តិសេដ្ឋកិច្ច។ រីឯលោកស្រីនាយករដ្ឋមន្ត្រីអាល្លឺម៉ង់វិញ លោកស្រីយល់ស្របជាមួយលោកហូឡង់ពីការជួយជំរុញឲ្យមានសន្ទុះកំណើនសេដ្ឋកិច្ចនៅអឺរ៉ុប ក៏ប៉ុន្តែពុំត្រូវប៉ះពាល់សោះឡើយដល់“កិច្ចព្រមព្រៀងតុល្យភាពថវិកា”។
ដូច្នេះ ឃើញថាជំហររបស់លោកប្រធានាធិបតីបារាំងហ្វ្រង់ស័រហូឡង់និងជំហររបស់ លោកស្រីនាយករដ្ឋមន្ត្រីអាល្លឺម៉ង់មែរគែលនៅមានគម្លាតពីគ្នា។ ក៏ប៉ុន្តែជំហររបស់លោករដ្ឋមន្ត្រីក្រសួងហិរញ្ញវត្ថុអាល្លឺម៉ង់បែរជាខិតមកជិតជំហររបស់លោកហូឡង់។
គួរបញ្ជាក់ថា ជំហររបស់លោកប្រធានាធិបតីបារាំងថ្មី ហ្វ្រង់ស័រហូឡង់ បានទទួលការគាំទ្រពីសំណាក់សហរដ្ឋអាមេរិកដែលសរសើរពី “ការរិះរកវិធានការជួយជំរុញឲ្យមានកំណើនសេដ្ឋកិច្ចនៅអឺរ៉ុប”។
ក៏ប៉ុន្តែ ប្រទេសបារាំងនិងប្រទេសអាល្លឺម៉ង់ដែលជាក្បាលម៉ាស៊ីនសេដ្ឋកិច្ចដ៏សំខាន់នៅអឺរ៉ុប ត្រូវតែរិះរកដំណោះស្រាយឲ្យបានឆាប់រហ័ស ដោយហេតុថានាពេលបច្ចុប្បន្ននេះ សូម្បីតែកំណើនសេដ្ឋកិច្ចអាល្លឺម៉ង់ក៏ចាប់ធ្លាក់ចុះទន់ខ្សោយហើយដែរ ដោយនៅត្រីមាសទី១ឆ្នាំ២០១២នេះ បានកើនឡើងតែ០,៥%ប៉ុណ្ណោះ។ រីឯប្រទេសបារាំងវិញ មានអត្រាកំណើនសេដ្ឋកិច្ចសូន្យនៅរយៈពេលត្រីមាសទី១ឆ្នាំ២០១២ដដែលនេះ។ ប្រទេសអ៊ីតាលីវិញបានធ្លាក់ស្រុតចុះ-០,៨៧%ដែលជាការធ្លាក់ចុះដុនដាបខ្លាំងជាងការគ្រោងទុក។ ចំណែកឯប្រទេសក្រិកឯណោះវិញ សេដ្ឋកិច្ចបានដើរថយក្រោយ ហើយបានបាត់បង់អស់-៦,២%សម្រាប់រយៈកាលត្រីមាសទី១ឆ្នាំ២០១២នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ