ផលិតផលផ្លាស្ទិក បង្កគ្រោះថ្នាក់យ៉ាងណាដល់សុខភាព ?
ចុះផ្សាយនៅថ្ងៃ៖
ស្តាប់ - ០៩:០០
Bisphénol A សារធាតុគីមីម្យ៉ាងប្រើជាល្បាយសំរាប់ផលិតរបស់របរប្រើប្រាស់ ដូចជាប្រអប់ ផ្លាស្ទិក ដាក់ម្ហូបអាហារ ដបទឹកជ័រ ប្រអប់អាហារកំប៉ុង ដបទឹកដោះគោកូនង៉ែត ។ល។ និង។ល។ កំពុងក្លាយជាប្រធានបទដ៏ប្រទាញប្រទង់បំផុតមួយ ចំពោះសុខភាព។ ប្រទេសកាណាដា បានប្រកាសផ្អាកមិនឱ្យមានការផលិតដបទឹកដោះគោជ័រ មានបង្កប់សារធាតុគីមី Bisphénol តាំងពីឆ្នាំ២០០៨មក សហរដ្ឋអាមេរិកធ្វើតាមក្រោយ។ ចំណែកប្រទេសបារាំង សភាទើបបានអនុម័តច្បាប់ហាមឃាត់ដែរ ពោលគឺចាប់ពីឆ្នាំ២០១៣នេះទៅ ហាមឃាត់ដាច់ខាតការផលិតប្រអប់អាហារ ដបទឹកគោ សម្រាប់ក្មេង និងសម្រាប់មនុស្សចាស់នៅឆ្នាំ២០១៥។តើ Bisphénol A ជាអ្វី ? និងពិតជាបង្កគ្រោះថ្នាក់ដល់សុខភាពមែនឬយ៉ាងណា ?
គ្រប់គ្នា បានបរិភោគ សារធាតុគីមី Bisphénol A ចូលក្នុងពោះ ខ្លះតិចខ្លះច្រើន ដោយមិនដឹងខ្លួន ពីព្រោះប្រអប់ ចាន ឬដបជ័រ កំប៉ុង ដាក់ម្ហូប ដែលយើងប្រើប្រាស់ជាប្រចាំថ្ងៃនេះ ធ្វើឡើងដោយមានសន្សំសារធាតុ Bisphénol A។ សារធាតុគីមីនេះ ទោះក្នុងបរិមាណតិចតួចយ៉ាងក្តី ក៏អាចផ្តល់ផលវិបាក និងបំផ្លាញសុខភាព ដូច្នេះបើអាចចៀសវាងបាន គួរកុំចូលចិត្តប្រើប្រអប់ឬដបជ័រទាំងនោះពេក។
តើ Bisphénol A ជាអ្វី ?
Bisphénol A ឬ (BPA) ជាផលិតផលគីមីសំយោគ ដែលប្រើប្រាស់យ៉ាងទូលំទូលាយ ក្នុងឧស្សាហកម្មផ្លាស្ទិក តាំងពីចុងឆ្នាំ១៩៥០មក។ នៅលើពិភពលោកយើងនេះ គេប៉ាន់ប្រមាណថា មានផលិតផលធ្វើដោយល្បាយ Bisphénol A ដល់ទៅប្រមាណ ៣,៨លានតោន ក្នុងមួយឆ្នាំៗ។
Bisphétanol A ល្បាយគីមីរវាង Phenol & Acétone នេះ ត្រូវបានយកមកប្រើ តាមបែបផ្សេងគ្នា មានជាអាទិ៍ ជាគ្រឿងផ្សំផលិតរបស់របរប្រើប្រាស់ជាផ្លាស្ទិក មានគុណភាពខ្ពស់ ធន់ខ្លាំង មិនឆេះ ពោលគឺពពួក Polycarbonate ជាដបទឹកដោះគោក្មេង ដបទឹកប្រើបានច្រើនដង។ គេក៏សង្កេតឃើញមានសារធាតុ Bisphétanol Aនេះ នៅក្នុងផលិតផលជ័រថ្លាៗ ឬជាវែកនី ដែលពាសបិទនៅផ្នែកខាងក្នុងប្រអប់អាហារ ឬ ភេសជ្ជៈ កំប៉ុង ឬគំរបដប គំរបក្រឡ។ នៅប្រទេសបារាំង បើតាមភ្នាក់ងារចំណីអាហារ ល្បែងក្មេងលេងខ្លះ កៅអីឡានសំរាប់ក្មេង រទេះដឹកទារក កន្ត្រក សូម្បីតែសម្ភារៈបរិក្ខារពេទ្យមួយចំនួនសំរាប់ទារក សុទ្ធតែមានបន្សំ BPA ទាំងអស់។
ឃើញថាសារធាតុ Bisphétanol អា ជាជោគជ័យមួយសំរាប់ឧស្សាហកម្មអស់រយៈពេលជាច្រើនឆ្នាំ ប៉ុន្តែហេតុអ្វីបានជានៅពេលនេះមានការហាមឃាត់មិនឱ្យប្រើប្រាស់ទៅវិញ ?!
ថ្វីដ្បិតតែនៅក្នុងសីតុណ្ហភាពធម្មតា BPA សំងំឈឹងក្នុងជ័រឬផ្លាស្ទិកមែន ប៉ុន្តែ នៅពេលឡើងកំដៅ ដោយស្ងោ ដាក់កំដៅក្នុងMicrowave ឬក្នុងឡដុត ឬនៅពេលលាងក្នុងម៉ាស៊ីនក្តៅខ្លាំង Bisphétanol អា សាយភាយចេញមកក្រៅដោយសេរី ដូចនេះវាងាយនឹងបញ្ជៀបចូលទៅក្នុងចំណីអាហារនិងភេសជ្ជៈណាស់។
សារធាតុគីមី Bisphétanol A នេះ មានសកម្មភាពដូចជាអ័រមូនបញ្ចេញដោយអូវ៉ែរ ដូច្នេះវាអាចប៉ះពាល់យ៉ាងខ្លាំងដល់ប្រព័ន្ធក្រពេញក្នុងការបញ្ចេញអ័រមូន និងអាចមានសមត្ថភាពបង្កផលវិបាកដល់សរីរាង្គមនុស្ស ទោះបីជាក្នុងកំរិតបរិមាណទាបយ៉ាងណាក៏ដោយ។ ការទទួលទានសារធាតុBisphétanol A នេះ អាចធ្វើឱ្យប្រឈម និងបង្កើនគ្រោះគ្មានកូន មហារីកសុដន និងពងស្វាស។ ជាងនេះទៅទៀត តាំងពីឆ្នាំ១៩៩០មក កម្មវិធីជាតិអាមេរិកផ្នែកជាតិពុល បានគូសបញ្ជាក់ពីផលប៉ះពាល់ផ្សេងទៀត ដែលអាចបង្កឡើងដោយ Bisphétanol A ទោះក្នុងបរិមាណដ៏តិចតួចបំផុតក្តី គឺ ការលូតលាស់របស់ទារក និងកូនក្នុងផ្ទៃ ប្រព័ន្ធទឹកមូដក្មេងប្រុសមិនប្រក្រតី ឆាប់ពេញវ័យមានរដូវចំពោះក្មេងស្រី ប្រព័ន្ធមេតាបូលិកប្រែប្រួលបង្កបង្កើតឱ្យងាយមានជំងឺទឹកនោមផ្អែមប្រភេទទីពីរ មានជំងឺធាត់ចុកខ្លាញ់ ព្រមទាំងមានបញ្ហាអាកប្បកិរិយា ពិបាកផ្ចង់អារម្មណ៍ ឬរពិសជ្រុលជាដើម។ ផលវិបាកបង្កឡើងដោយសារធាតុ Bisphétanol A នេះត្រូវបានក្រុមអ្នកស្រាវជ្រាវអន្តរជាតិជិត៤០នាក់ ព្រមព្រៀងនិងចុះផ្សាយក្នុងរបាយការណ៍ផ្សព្វផ្សាយជាសាធារណៈនៅឆ្នាំ២០០៦។
ប៉ុន្តែនៅពេលនោះ ភ្នាក់ងារសុវត្ថិភាពចំណីអាហារនៅអឺរ៉ុប ដែលទោះមានការសង្ស័យហើយក៏ដោយ ក៏ត្រូវត្រួតពិនិត្យឱ្យបានល្អិតល្អន់សិនមុននឹងអាចចេញអនុសាសន៍ហាមឃាត់បាន។ សម្រាប់អឺរ៉ុប កំរិតអតិបរិមានៃសារធាតុ Bisphétanol A ដែលមនុស្សអាចធន់បានដោយគ្មានប៉ះពាល់ដល់សុខភាព គឺ០,០៥មីល្លីក្រាមសម្រាប់ទម្ងន់ខ្លួនមួយគីឡូក្រាម។ សរុបមកវិញ ទារកនិងក្មេងទើបនឹងកើត ប្រឈមនឹងសារធាតុ Bisphétanol A តិចជាងកំរិតបង្កគ្រោះថ្នាក់ដល់សុខភាពទេ ប៉ុន្តែយោងតាមពាក្យស្លោក "ការពារប្រសើរជាងព្យាបាល” រដ្ឋាភិបាលបានណែនាំឱ្យអ្នកជាឪពុកម្តាយកាត់បន្ថយការប្រើដបទឹកដោះគោជ័រ ហើយងាកមកបំបៅដោះកូន ក្នុងន័យការពារក្រែងមានគ្រោះថ្នាក់ដល់សុខភាព។ រហូតមកដល់ឆ្នាំ២០១១ ទើបភ្នាក់ងារសុវត្ថិភាពចំណីអាហារអឺរ៉ុប អះអាងថាមានភស្តុតាងវិទ្យាសាស្ត្រគ្រប់គ្រាន់ បញ្ជាក់បានពីការការពារប្រសើរជាងព្យាបាល និងបានស្នើសុំទៅអឺរ៉ុប ចាត់បញ្ចូល BPA ក្នុងក្រុមមានជាតិពុល។ ព្យួរការធ្វើចរាចរណ៍លក់ដូរដបទឹកគោក្មេងមានបន្សំ BPA នៅខែកក្កដាឆ្នាំ២០១០ សម្រាប់ប្រទេសបារាំង និងនៅខែមករាឆ្នាំ២០១១សម្រាប់អឺរ៉ុបទាំងមូល។
តាមការពិតទៅឥទ្ធិពលរបស់ Bisphénol A មិនត្រឹមតែប៉ះពាល់លើទារកនិងកុមារប៉ុណ្ណោះទេ គឺប៉ះពាល់ដល់មនុស្សគ្រប់រូប គ្រប់វ័យ គ្មានប្រកាន់ស្រទាប់វណ្ណៈឡើយ។ ការសិក្សាមួយបានផ្តល់លទ្ធផលគួរឱ្យភ្ញាក់ផ្អើល “ស្នាម Bisphétanol A មាននៅក្នុងអេសង់ទីយ៉ុងទឹកនោមបណ្តាជននៅបស្ចឹមប្រទេស ដល់ទៅ៩៥%”។ មនុស្សចាស់ប្រឈមនឹងសារធាតុនេះ អាចមិនរងផលវិបាកភ្លាមមែន ប៉ុន្តែបន្តបញ្ជូនទៅកូនចៅជំនាន់ក្រោយ ដោយបន្សល់ទុកនូវវិបត្តិអាក្បកិរិយា ទោះកូនចៅនោះមិនបានស្រូបសារធាតុ Bisphénol A ខ្លួនឯងក៏ដោយ។
ប៉ុន្តែដោយហេតុថា ការហាមឃាត់ដាច់ខាត ក្នុងអត្ថន័យការពារប្រសើរជាងព្យាបាល បើធ្វើឡើងដោយភ្លាមៗពេក អាចធ្វើឱ្យឧស្សាហកម្មរងគ្រោះ ទើបសភាបារាំងពន្យារពេលហាមឃាត់មិនឱ្យមានការផលិតគ្រឿងខ្ចប់អាហារពីBisphénol A ដល់ឆ្នាំ២០១៥។ ឯវត្ថុទាំងឡាយទាក់ទងនឹងកុមារក្រោមអាយុ៣ឆ្នាំ ច្បាប់បារាំងចូលជាធរមាននៅឆ្នាំ២០១៣នេះតែម្តង។
ជាចុងក្រោយ នេះជាដំបូន្មានខ្លះ ជាជំនួយដល់លោកអ្នកដែលគេចពី Bisphénol A ៖
- ចូរចៀសវាងកុំសូវប្រើផ្លាស្ទិក។ នៅប្រទេសជឿនលឿនគេអាចសម្គាល់ ប្រអប់ផ្លាស្ទិក មាន Bisphénol A ដោយសញ្ញាត្រីកោណនិងលេខ។ ត្រីកោណបានន័យថាជារបស់អាចយកទៅផលិតវិញបាននិងលេខ៧ បញ្ជាក់ថាមាន Bisphénol A។ បើប្រយ័ត្នមែនទែនលេខ ៣ និង៦ ក៏គួរមិនប្រើដែរ។
- ដោយហេតុថាភាពប្រឈមខ្លាំងនឹង Bisphénol A គឺតាមផ្លូវចំណីអាហារ ៖ សូម រក្សាម្ហូបអាហារ ចំណីចំណុកក្នុង ប្រអប់ឬ ដបធ្វើពីកែវ ពីសេរ៉ាមិក ឬពីដែកអ៊ីណុក។ ចំពោះអ្នកប្រើប្រាស់មៃក្រូវេវ គួរចៀសវាងឱ្យបានកុំកម្តៅម្ហូបគោក ឬទឹក ក្នុងប្រអប់ផ្លាស្ទិក។
- ជាចុងក្រោយ ចំពោះការជ្រើសរើសដបទឹកដោះគោឱ្យកូន សូមប្រើដបទឹកដោះគោជាសាច់កែវ ឬបើជាផ្លាស្ទិក ដែលមានបញ្ជាក់ថាគ្មាន BPA៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ