សភាអង់គ្លេសបោះឆ្នោតជាប្រវត្តិសាស្ត្រ ដើម្បីសម្រេចព្រមឬមិនព្រមលើកិច្ចព្រមព្រៀង Brexit
ចុះផ្សាយនៅថ្ងៃ៖
ស្តាប់ - ០៧:៣២
ថ្ងៃសៅរ៍ ទី១៩តុលា តំណាងរាស្ត្រអង់គ្លេសត្រូវបោះឆ្នោតជាប្រវត្តិសាស្ត្រ ដើម្បីសម្រេចយល់ព្រម ឬមិនយល់ព្រមលើកិច្ចព្រមព្រៀង Brexit។ នេះគឺជាការលំបាកខ្លាំងណាស់ចំពោះលោកនាយករដ្ឋមន្ត្រី ដែលគ្មានសំឡេងភាគច្រើនគ្រប់គ្រាន់ដើម្បីសម្រេចរឿងនេះ។ លោក បូរីស ចនសុន ត្រូវបញ្ចុះបញ្ជូលអ្នកតំណាងរាស្ត្របក្សប្រឆាំង និងសមាជិកសភាឯករាជ្យជាច្រើនទៀត ឱ្យជួយគាំទ្រ។ ក៏ប៉ុន្តែ បក្សប្រឆាំងនិងតំណាងរាស្ត្រឯករាជ្យខ្លះនៅរារែកស្ទាក់ស្ទើរ ហើយខ្លះទៀត បដិសេធ ដោយយល់ថា កិច្ចព្រមព្រៀងដែលរៀបចំឡើងដោយ លោក បូរីស ចនសុន មិនល្អទេ និងមិនបម្រើផលប្រយោជន៍ច្រើនដល់អង់គ្លេសនោះឡើយ។
តើនាយករដ្ឋមន្ត្រី បញ្ចុះបញ្ចូលយ៉ាងដូចម្តេចខ្លះ?
នៅពេលបើកសភាប្រជុំ លោកនាយករដ្ឋមន្ត្រី បូរីស ចនសុន បានថ្លែងទទូចឱ្យសមាជិកសភាដែលមកពីពហុបក្ស និងអ្នកតំណាងរាស្ត្រឯករាជ្យផ្សេងៗទៀត ឱ្យជួយបោះឆ្នោតគាំទ្រសំណើកិច្ចព្រមព្រៀងថ្មីដែលរៀបចំដោយរដ្ឋាភិបាលរបស់លោក។ លោក ចនសុន បញ្ជាក់ថា នេះជាកិច្ចព្រមព្រៀងដែលល្អបំផុតហើយ និងថា ល្មមដល់ពេលហើយ ដែលត្រូវព្យាបាលជំងឺបែកបាក់សង្គមអង់គ្លេស ហើយត្រូវផ្តល់ក្តីសង្ឃឹមថ្មី ផ្តល់ភាពធូរស្រាលដល់ប្រជាជនអង់គ្លេស។
លោក បូរីស ចន ថ្លែងដូច្នេះ គឺពិតជាត្រឹមត្រូវណារចនា។ ពីព្រោះថា គ្រប់គ្នាក៏ជ្រាបស្រាប់ដែរថា ជាង៣ឆ្នាំកន្លះមកនេះ សង្គមអង់គ្លេស ទទួលរងការបែកបាក់ប្រេះឆាគ្នាខ្លាំង តាំងតែពីក្នុងសភា ក្នុងជួររដ្ឋាភិបាល រហូតដល់ពលរដ្ឋសាមញ្ញ។ ពលរដ្ឋអង់គ្លេសខ្លះ ដែលបានបោះឆ្នោតប្រជាមតិសម្រេចចាកចេញពីសហគមន៍អឺរ៉ុប កាលពីឆ្នាំ២០១៦ នៅពេលនេះ មានអ្នកខ្លះ ខកចិត្ត និងនឹកគិតថាខ្លួនចាញ់បោកអ្នកនយោបាយ។ ជាច្រើនខែមកហើយ ដែលពលរដ្ឋម្ចាស់ឆ្នោត រស់នៅក្នុងក្តីអស់សង្ឃឹម ខឹងសម្បារ និងភាពមិនច្បាស់លាស់ចំពោះអនាគត។
នេះជាទិវាប្រវត្តិសាស្ត្រថ្មីរបស់អង់គ្លេស ដែលជិត៤០ឆ្នាំចុងក្រោយនេះ នេះជាលើកទី១ហើយដែលអង់គ្លេសសភាអង់គ្លេស ត្រូវបើកកិច្ចពិភាក្សានិងបោះឆ្នោត នៅថ្ងៃសៅរ៍យ៉ាងដូច្នេះ។ ពីព្រោះថា វេលាប្រថុចញ៉ុចពេក! សល់ពេលតែ១២ថ្ងៃទៀតតែប៉ុណ្ណោះ គឺដល់ពេលកំណត់លែងលះជាផ្លូវការ ពីសហភាពអឺរ៉ុបហើយ។ ចំពោះលោកនាយករដ្ឋមន្ត្រី ប្រសិនបើកិច្ចព្រមព្រៀមថ្មី ដែលក្រុមរបស់លោករៀបចំមកនេះ ល្អហើយ មិនចាំបាច់ទៅរកអ្វីផ្សេងទៀតទេ វានាំឱ្យខាតពេល ខាតលុយ ចាយលុយច្រើនឥតប្រយោជន៍។
រដ្ឋាភិបាលត្រូវការជាង៣០សំឡេង
ដើម្បីបោះឆ្នោតសម្រេចកិចព្រមព្រៀងបាន គេត្រូវការសំឡេងភាគច្រើន ចំនួន៣២០សំឡេង ក្នុងចំណោមអាសនៈសភា ៦៣៩ ។ គណបក្សអភិរក្សនិយមរបស់លោកនាយករដ្ឋមន្ត្រី បូរីស ចនសុន មានសំឡេង ២៨៧ តែប៉ុណ្ណោះ ដូច្នេះ លោកត្រូវការសំឡេងគាំទ្រ ជាង៣០សំឡេងបន្ថែមទៀត ដើម្បីអាចមានសិទ្ធិសម្រេច។
នៅពេលនេះ បក្សប្រឆាំង មានជាង២៤២ ហើយបក្សជាតិនិយមអេកូស ៣៥សំឡេង, បក្សសេរីប្រជាធិបតី ១៩សំឡេង បក្សតូចៗផ្សេងៗទៀត ជាង១០ សំឡេងទៀត គឺសុទ្ធតែបង្ហាញជំហរ បដិសេធស្រេចហើយ ថាមិនគាំទ្រទេ។
ដូច្នេះ បើតាមអ្នកវិភាគ ក្តីសង្ឃឹមរបស់លោក សនសុន គឺរំពឹងទៅលើពីរផ្នែក។ ទី១ គឺទៅលើ តំណាងរាស្ត្រឯករាជ្យ ដែលគ្មានចំណុះនឹងបក្សណាទាំងអស់ មានចំនួន ៣៦នាក់។ ក្នុងចំណោមអ្នកទាំងនេះ នាកន្លងមក មានជាង១៥នាក់ដែរ ដែលបានយល់ស្របកិច្ចព្រមព្រៀងដែលរៀបចំដោយរដ្ឋាភិបាល។
មួយទៀត គឺបក្សសម្ព័ន្ធអៀរឡង់ខាងជើង ដែលមានសំឡេង១០សំឡេងដែរ ពីមុនមក ជាបក្សសម្ព័ន្ធមិត្តដៃគូនឹងរដ្ឋាភិបាលស្រាប់។ ក៏ប៉ុន្តែ ក្តីរំពឹងនេះ អាចមិនច្បាស់ទេ ពីព្រោះថា គម្រោងសំណើកិច្ចព្រមព្រៀងថ្មីរបស់លោក ចនសុន គឺហាក់ដូចជាបង្ហាញថា មានព្រំដែនថ្មី ពន្ធគយនៅចន្លោះអៀរឡង់ខាងជើងនិងអៀរឡង់ ដែលធ្វើឱ្យបក្សនេះ មិនពេញចិត្ត និងយល់ថា លោកចនសុន កំពុងក្បត់ពួកគេផង។ ដូច្នេះ បក្សនេះ គឺលំបាកនឹងបញ្ចុះបញ្ចូលណាស់។
កិច្ចព្រមព្រៀងថ្មីរបស់លោក ចនសុន គឺមានការបែងចែកព្រំដែនជាពីរ។ ទី១ ព្រំដែនអង់គ្លេសជាមួយសហភាពអឺរ៉ុប ដែលមានព្រំដែនជាមួយគ្នាតែមួយគត់ ខាងដីគោក ជាប់ព្រំប្រទល់គ្នាប្រមាណ ៥០០គីឡូម៉ែត្រ ត្រង់នៅប្រទេសអៀរឡង់ និងអៀរឡង់ខាងជើងនេះ។ ការខណ្ឌព្រំដែនមួយទៀត គឺព្រំដែនទឹក។ នៅក្នុងនោះ នាយករដ្ឋមន្ត្រីអង់គ្លេស មានគម្រោងចង់ដាក់សំណើបែងចែកព្រំដែនពន្ធគយរវាងអង់គ្លេសនិងអៀរឡង់ខាងជើង។ ហើយនិង ចង់ដាក់អៀរឡង់ខាងជើង ឱ្យស្ថិតនៅក្នុង«លក្ខន្តិកៈពិសេស» Régime spécial, ឬ Statut spécial រយៈពេល៤ឆ្នាំតទៅមុខទៀត គឺពីពេលនេះ បន្តរហូតដល់ឆ្នាំ២០២៥។ ធ្វើដូច្នេះ គឺដូចជាការឆ្កឹះដំបៅចាស់រវាងអៀរឡង់ខាងជើង និងប្រទេសអៀរឡង់ ដែលបានស្គាល់សង្គ្រាមរ៉ាំរ៉ៃជាមួយនឹងគ្នាច្រើន អស់ជាទសវត្សរ៍មកហើយ។ ដូច្នេះបក្សសម្ព័ន្ធអៀរឡង់ខាងជើង នឹងមិនចង់ឃើញឡើយ។
បើសភាបោះឆ្នោតមិនយល់ព្រម តើនឹងត្រូវធ្វើយ៉ាងណាទៀត?
បើអង្គសភាបោះឆ្នោតបដិសេធសំណើរៀបចំរបស់នាយករដ្ឋមន្ត្រីនេះទេ នោះគឺអង់គ្លេសត្រូវរស់នៅក្នុងភាពមិនច្បាស់លាស់តទៅទៀត ហើយពេលនោះ សេណារីយ៉ូ នៃការដើរចេញដោយគ្មានកិច្ចព្រមព្រៀង កាន់តែលេចច្បាស់ឡើងតែម្តង។ ចំពោះនាយករដ្ឋមន្ត្រីអង់គ្លេស, លោក បូរីស ចនសុន ថាសុខចិត្តជ្រើសរើសឱ្យអង់គ្លេសដើរចេញពីសហភាពអឺរ៉ុបដោយគ្មានកិច្ចព្រមព្រៀងអ្វីទាំងអស់ វាប្រសើរជាងទៅរៀបចំកិច្ចព្រមព្រៀង ធ្វើរបាយការណ៍ថ្មីទៀត ដែលវានាំឱ្យខាតពេល និងពន្យារពេលដល់ណាទៀត។
ចំណែកសេណារីយ៉ូដែលគណបក្សប្រឆាំងរំពឹងចង់បានវិញ គឺគេចង់ឱ្យធ្វើកិច្ចព្រមព្រៀងថ្មីដែលអាចទទួលយកបានទាំងអស់គ្នាពីគ្រប់ភាគី, បើមិនអ៊ីចឹងទេ គឺគួររៀបចំការបោះឆ្នោតសភាជាថ្មី ឬក៏ថា ត្រូវធ្វើការបោះឆ្នោតប្រជាមតិ ជាថ្មីម្តងទៀតតែម្តង។
ទោះយ៉ាងណា សភាអង់គ្លេស បានសម្រេចរៀបចំជើងព្រួលបង្ការរួចហើយដែរ ដោយបានធ្វើច្បាប់មួយ ហៅថា Benn ដើម្បីពន្យារពេល ពីរឬបីខែ សុំពេលចរចាបន្ត។
ចំណែករដ្ឋបារាំងដែលជាក្បាលម៉ាស៊ីនមួយធំដែរនៅក្នុងសហភាពអឺរ៉ុប លោកប្រធានាធិបតីបារាំង អេម៉ាណុយ ម៉ាក្រុង មិនចង់ឱ្យមានការពន្យារពេលអ្វីបន្តទៅទៀតនោះទេ។ ចំពោះបារាំង បើថាអង់គ្លេសត្រូវតែដើរចេញ គឺត្រូវលែងលះគ្នាឱ្យដាច់ស្រឡះតែម្តង ដើម្បីមានពេលវេលារៀបចំជីវិតថ្មីរៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ