ឯកអគ្គរដ្ឋទូតចិនចប់អាណត្តិ ប្រកាសគាំទ្រចំណាត់ការរបស់កម្ពុជាបង្រ្កាបបទល្មើសបង្កឡើងដោយជនជាតិចិន
ឯកអគ្គរដ្ឋទូតចិនចប់អាណត្តិនៅកម្ពុជា នៅក្នុងជំនួបជាមួយ លោក ស ខេង រដ្ឋមន្រ្តីក្រសួងមហាផ្ទៃ កាលពីថ្ងៃសុក្រ បានប្រកាសពីការគាំទ្ររបស់រដ្ឋាភិបាលចិន ចំពោះចំណាត់ការរបស់អាជ្ញាធរកម្ពុជា ក្នុងការបង្រ្កាបបទល្មើសដែលបង្កឡើងដោយជនជាតិចិន នាពេលកន្លងមក។ បទល្មើសដែលបង្កឡើងដោយជនជាតិចិន កន្លងមក មានដូចជា បទល្មើសឆ្លងដែន ការចាប់ជំរិតតាមប្រព័ន្ធអ៊ីនធឺណេត ការជួញដូរគ្រឿងញៀន និងការប្រព្រឹត្តអំពើពេស្យាចារជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ក្រៅពីបង្ហាញពីការគាំទ្រចំណាត់ការរបស់អាជ្ញាធរកម្ពុជា លោក ស្យុង ប៉ ឯកអគ្គរដ្ឋទូតចិន ដែលចប់អាណត្តិនៅកម្ពុជា ក៏បានលើកសរសើរ និងបង្ហាញពីការពេញចិត្តពេញថ្លើមចំពោះអាជ្ញាធរកម្ពុជាដែលបានសហប្រតិបត្តិការយ៉ាងល្អ លើការងារសន្តិសុខ ដូចជាការបង្រ្កាបរាល់ជនជាតិចិនដែលបានប្រព្រឹត្តបទល្មើសបានទាន់ពេលវេលា ក្រោយពីជនជាតិចិនទាំងនោះ បានបង្កភាពអនាធិបតេយ្យ និងបញ្ហាសន្តិសុខ សណ្តាប់ធ្នាប់។ ជាសកម្មភាព ដែលឯកអគ្គរដ្ឋចិន លើកឡើងថា បានធ្វើឱ្យប៉ះពាល់ដល់ផលប្រយោជន៍ប្រជាពលរដ្ឋកម្ពុជា និងជនជាតិចិនរស់នៅក្នុងប្រទេសកម្ពុជា ក៏ដូចជាប៉ះពាល់ដល់រូបភាពនៃទំនាក់ទំនងរវាងប្រទេសទាំងពីរ។ នេះបើតាមការចុះផ្សាយរបស់អគ្គស្នងការនគរបាលជាតិ។
នៅក្នុងជំនួបដដែលនោះ លោក ស ខេង ក៏បានអះអាងថា រដ្ឋាភិបាលកម្ពុជា នឹងខិតខំសហការគ្នាឲ្យកាន់តែខ្លាំងក្លាបន្ថែមទៀតក្នុងការបង្ក្រាបជនល្មើសទាំងនោះ។
កាលពីចុងខែសីហា អគ្គស្នងការនគរបាលជាតិ បានបញ្ជូនក្រុមការងារពីភ្នំពេញ ចុះទៅពង្រឹងសន្តិសុខ សណ្ដាប់ធ្នាប់ នៅខេត្តព្រះសីហនុ។ ខេត្តព្រះសីហនុរបស់ខ្មែរ ដែលត្រូវបានគេមើលឃើញជាទូទៅថា បានក្លាយជាទីកន្លែងប្រមូលផ្ដុំ ដោយការវិនិយោគរបស់ជនជាតិចិន ខណៈដែលបញ្ហាអសន្តិសុខសង្គមមួយចំនួនបង្កឡើង ដោយជនជាតិចិន ក៏បានកើតឡើងទន្ទឹមគ្នាដែរ។
បើតាមលោក កែវ វណ្ណថន អ្នកនាំពាក្យអគ្គនាយកដ្ឋានអន្តោប្រវេសន៍កម្ពុជា ក្នុងរយៈពេល៨ ខែឆ្នាំ២០១៨ នេះ កម្ពុជាបានចាប់ និងបណ្តេញចេញជនអន្តោប្រវេសន៍ខុសច្បាប់ចំនួន៧៧២នាក់ ដោយនៅក្នុងនោះ មានជនជាតិចិនដល់ទៅ ៣៥២នាក់ ដែលជាចំនួនច្រើនជាងគេ។
យ៉ាងណាក៏ដោយ ទំនាក់ទំនងកម្ពុជា-ចិន ត្រូវបានប្រមុខរដ្ឋាភិបាលកម្ពុជា វាយតម្លៃថា កាន់តែមានភាពស្អិតរមួត តាមរយៈការផ្តល់ជំនួយឥតសំណង និងកម្ចីជាបន្តបន្ទាប់មកប្រទេសកម្ពុជា ដើម្បីអនុវត្តគម្រោងនានា ខណៈភាគីទាំងពីរ ក៏បានប្រកាសពីជំហររៀងខ្លួនថា នឹងបន្តបង្កើនសហប្រតិបត្តិការយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ