អ្នកឃោសនារកសំឡេងឆ្នោតរបស់គណបក្សនយោបាយ ជាច្រើនមិនពាក់មួកសុវត្ថិភាព
ចុះផ្សាយនៅថ្ងៃ៖
ស្តាប់ - ០៣:៥៨
ចាប់តាំងពីយុទ្ធនាការបោះឆ្នោតជាង៤សប្ដាហ៍មកនេះ គេសង្កេតឃើញមានយុវជន ជាច្រើនបានចូលរួមយ៉ាងសកម្មក្នុងការឃោសនារកសំឡេងឆ្នោតសម្រាប់គណបក្សនយោបាយដែលពួកគេគាំទ្រ។ វាជាការល្អណាស់ការចូលរួម របស់យុវ័យក្នុងការងារនយោបាយ តែ គេសង្កេតឃើញថាមានយុវជន មួយចំនួន ធំមិនបានគោរពច្បាប់ចរាចរ និងអាជ្ញាធរមួយចំនួន ក៏ហាក់ដូចជាមានភាពធូរលង់ផងដែរ។ តើការមិនគោរពច្បាប់ចរាចរ វាអាចធ្វើឱ្យមានផលប៉ះពាល់ដល់កម្រិតណា ដល់ប្រទេសប្រកាន់នីតិរដ្ឋមួយនេះ?
នៅក្នុងប្រទេសដែលប្រកាន់នីតិរដ្ឋ ប្រកាន់យកប្រជាធិបតយ្យ ដូចជាប្រទេសកម្ពុជា មានមនុស្សម្នារទាំងអស់តែងតែចង់ ឱ្យមានការគោរពច្បាប់ ដែលជាពិសេស ច្បាប់ចរាចរ ក្នុងយុទ្ធនាការឃោសនារកសំឡេងឆ្នោត ។ ការឃោសនាដែលមាន ជាហូរហែរពីសំណាក់របស់យុវ័យ ជាចំណុចល្អណាស់ ដែលពួកគាត់ មាន ឆន្ទៈក្នុងការចូលរួមក្នុងរឿងនយោបាយ
តែក្នុងរយះពេលកន្លងមកនេះ គេឃើញមានយុវ័យជាច្រើន ជិះទោចក្រយានយន្ត ក្នុងការឃោសនា មិនបានគោរពច្បាប់ចរាចរឱ្យបានត្រឹមត្រូវឡើយ។ គឺពួកគាត់ មិនបានពាក់មួយសុវត្តិភាពដែលតម្រូវឱ្យពាក់ដោយច្បាប់ចរាចរផ្លូវគោគឡើយ។ ជាងនេះទៅទៀតមានយុវ័យមួយចំនួនក៏មិនគោរពភ្លើង និងផ្លាកសញ្ញាចរាចរផងដែរ។ ទង្វើខាងលើធ្វើឱ្យមនុស្សម្នារ ជាច្រើនមានការព្រួយបារម្ភ អំពីគ្រោះថ្នាក់ អំពីសណ្ដាប់ធ្នាប់ចរាចរ និង ការគោរពច្បាប់ជាមូលដ្ឋាន។
ការមិនពាក់មួយសុវត្ថិភាពរបស់យុវ័យមួយចំនួន ត្រូវបានគេរកឃើញថាមានមូលហេតុជាពីរយ៉ាង។ គឺការមិនចង់គោរពពីសំណាក់យុវ័យខ្លួនឯងផ្ទាល់ និងទីពីមកពីមានភាពធូរលង់មួយចំនួនពីសំណាក់អាជ្ញាធរមានសមត្ថកិច្ច និងគណបក្សនយោបាយផ្ទាល់តែម្ដង។
មូលហេតុទីមួយ គឺដោយសារតែយុវជនផ្ទាល់មានចេតនាមិនពាក់ដោយខ្លួនឯងតែម្ដង។ ពួកគាត់យល់ថា វាជាការរំខាន។ ជាងនេះទៅទៀតគឺការមើលស្រាលច្បាប់ពីសំណាក់យុវ័យផ្ទាល់តែម្តង។ ហើយអ្នកមួយចំនួនយល់ថា ក្នុងកំឡុងពេលយុទ្ធនាការនេះ ប៉ូលីសចរាចរ មិនសូវចាប់អ្នកមិនពាក់មួកសុវត្ថិភាពឡើយ។ គឺដោយសារតែមានការអធ្យាស្រ័យ ។ ជាងនេះទៅទៀតកន្លងមក អជ្ញាធរធ្លាប់ប្រាប់ថា ក្រុម អ្នកហែរក្បួនឃោសនាធ្វើដំណើរដោយយឺតៗ វាមិនបណ្ដាលឱ្យមានគ្រោះថ្នាក់ចរាចរទេ។
មានមតិមួយចំនួនតែងតែខ្សឹមខ្សៀវគ្នាថា សូម្បីតែការបើកបរក្នុងកំឡុងពេកយុទ្ធនាការនេះ ក៏គេមិនសូវឃើញមាន ការរំខានមួយចំនួនពីក្រុមប៉ូលីសចរាចរទេចំពោះអ្នកមិនគោរពច្បាប់ចរាចរមួយចំនួន។ សំនួរចោទសួរថា តើនេះជាវប្បធម៌ ដែលតែងតែមានក្នុងសង្គមខ្មែរ ឬយ៉ាងណាក្នុងកំឡុងពេលយុទ្ធនាការរកសំឡេងឆ្នោត។ ក្នុងកំឡុងពេលនេះ មនុស្សមួយចំនួន ហាក់ដូចជាមើលងាយចំពោះច្បាប់ចរាចរ។ ហើយអជ្ញាធរទៀតសោត ហាក់ដូចជាធូរលង់ផងដែរ។ តើហេតុផលនេះ គឺដើម្បីការទាក់ទាញប្រជាប្រិយភាព ដើម្បីរកសំឡេងឆ្នោត ឬមួយក៏ជាការអធ្យាស្រ័យមួយក្នុងសង្គម។ ព្រោះ មតិមួយចំនួនតែនិយាយថា ក្នុងសង្គមខ្មែរ គេច្រើនយកមនោសញ្ចេតនាមកនិយាយច្រើនជាង។ ហើយការធ្យាស្រ័យគ្នាក្នុងសង្គម ជារឿងសំខាន់។
ចំណុចម្យ៉ាងទៀត កន្លងមកមានស្ថាប័ននានាបានចំណាយថវិការ ជាច្រើនដើម្បីជម្រុញ ការអនុវត្តន៍ច្បាប់ចរាចរ ឱ្យបានតឹងរឹង ដើម្បីសុវត្តិភាព ក្នុងការធ្វើដំណើរ។ ដែលក្នុងមួយឆ្នាំៗ គេបានចំណាយថវិការជាច្រើនសម្រាប់ការងារនេះ។ ក្នុងកំឡុងពេលឃោសនារកសំឡេងឆ្នោត គេឃើញផងដែរបក្សនយោបាយនានាបានអំពាវឱ្យសកម្មជនរបស់ខ្លួនពាក់មួកសុវត្ថិភាពក្នុងឃោសនា បើប្រើប្រាស់ទោចក្រយានយន្ត។ តែហាក់ដូចមិនសូវមានប្រសិទ្ធិភាពប៉ុន្មានទេ។
បក្សនយោបាយមួយចំនួនបានចំណាយថវិការជាច្រើនសម្រាប់ផលិតមួក អាវ ខិតបណ្ណ ផ្លាកសញ្ញា គណបក្សជាយ៉ាងសន្ធឹកសន្ធាប់។ តែគេមិនទាន់ឃើញមានបក្សនយោបាយណាមួយ ជម្រុញដល់អ្នកឃោសនារបស់ខ្លួន ឱ្យពាក់មួកសុវត្តិភាពឱ្យមានបានតឹងរឹងឡើយ។ ដូចជាបំផុសឱ្យមានការផលិតមួកសុវត្តិភាព ដែលមានសំគាន់គណបក្ស សម្រាប់រយះឃោសនា។ ហើយបក្សនយោបាយគួរតែ ដាក់កម្រិត ឱ្យមានការគោរពច្បាប់ ឱ្យបានខ្ជាប់ខ្ជួនជាដើម។ យ៉ាងហោចណាស់ ការជម្រុញខាងលើនេះ អាចចូលរួមចំណែកមួយ ដែលនាំឱ្យយុវ័យមានឆន្ទៈក្នុងការគោរពច្បាប់ បើទោះបីជា អ្នកមួយចំនួនយល់ថាមិនសូវសំខាន់ក៏ដោយ។
នៅអតីតកាលប្រជាជនខ្មែរ ដែលបានឆ្លងកាត់ក្នុងរបប៣ឆ្នាំ ៨ ខែ២០ ថ្ងៃ បានធ្លាប់ស្គាល់អស់ហើយ ការឈឺចាប់ ភាពភ័យខ្លាចក្នុងរបបមួយដែលគ្មានការគោរពច្បាប់ណាមួយឡើយ។ ក្នុងន័យនេះ សម្រាប់សង្គមខ្មែរបច្ចុប្បន្ន ការជម្រុញ និងបណ្ដុះគំនិតឱ្យយុវជន មានឆន្ទៈគោរពច្បាប់ចាប់ពីចំណុចតូចតាច នៅវិញខ្លួន ក្នុងជីវភាពប្រចាំថ្ងៃទៅ ជាចំណុចសំខាន់ណាស់ ដែលអ្នកនយោបាយទាំងអស់គួរយកមកពិចារណា។ មិនមែនគិតតែ ប្រើយុទ្ធសាស្ត្រ ដើម្បីយកសំឡេងឆ្នោតនោះទេ។
បើធ្វើបែបនេះបាន ក្នុងសង្គមខ្មែរ ការទម្លាប់គោរពច្បាប់ នឹងចាប់ផ្ដើមដុះ បន្តិចម្ដងៗ ក្នុងផ្នត់គំនិតកូនខ្មែរ សម្រាប់ការរស់នៅប្រចាំថ្ងៃ គ្រប់ៗគ្នាមិនខាន។ ជាងនេះទៅទៀត កម្ពុជានឹងក្លាយជាប្រទេសដែលប្រកាន់នីតិរដ្ឋគំរូ មួយដល់ប្រទេសដ៏ទៃទៀត ដោយសារតែទម្លាប់គោរពច្បាប់ បានដក់ក្នុងដួងចិត្តប្រជាជនខ្មែរគ្រប់រួប តែម្តង។ ហើយសូមយុវ័យផ្ទាល់ គួរតែយល់ថា ខ្លួនជាទំពាំងស្នងឬស្សី ដូច្នេះការប្រកាន់យកទម្លាបល្អ ក្នុងសង្គម និងការគោរពច្បាប់នេះ ជាចំណុចខ្លាំងក្នុងការអភិវឌ្ឍន៍ ប្រទេសជាតិទៅអនាគត និងវាជាគ្រិះមួយយ៉ាងរឹងម៉ាំ សម្រាប់ប្រទេសដែលប្រកាន់នីតិរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ