ប្រធាន គជប អំពាវនាវ ឲ្យពលរដ្ឋទៅបោះឆ្នោត ទោះបីជាគ្មានវត្តមានគណបក្សសង្រ្គោះជាតិ
ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃអង្គារនេះ បានស្នើពលរដ្ឋគ្រប់រូប ដែលមានឈ្មោះក្នុងបញ្ជីបោះឆ្នោត ឲ្យទៅបោះឆ្នោត ជ្រើសរើសតំណាងរាស្រ្ត ដែលនឹងប្រព្រឹត្តិទៅ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ឲ្យបានគ្រប់ៗគ្នា។ ការថ្លែងយ៉ាងដូច្នេះ ធ្វើឡើងក្រោយកិច្ចប្រជុំពិគ្រោះយោបល់ លើសេចក្តីព្រាងបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្រ្ត នីតិកាលទី៦ ឆ្នាំ២០១៨។
ចុះផ្សាយនៅថ្ងៃ៖
ថ្លែងទៅកាន់អ្នកសារព័ត៌មានក្រោយពីបញ្ចប់កិច្ចប្រជុំពិគ្រោះយោបល់ លើសេចក្តីព្រាងបទបញ្ជា និងនីតិវិធីសម្រាប់ការបោះឆ្នោត ជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ប្រធានគណៈកម្មាធិការជាតិរៀបចំការបោះឆ្នោត លោក ស៊ិក ប៊ុនហុក បានអំពាវនាវឲ្យប្រជាពលរដ្ឋដែលមានសិទ្ធិបោះឆ្នោត និងមានឈ្មោះក្នុងបញ្ជីបោះឆ្នោត ឲ្យទៅបោះឆ្នោតឲ្យបានគ្រប់គ្នា បើទោះបីមិនមានវត្តមានអតីតគណបក្សសង្រ្គោះជាតិ។ លោក ស៊ិក ប៊ុនហុក បន្តថា ប្រជាពលរដ្ឋ នឹងស្តាយក្រោយ បើពួកគេបោះចោលសិទ្ធិ និងឱកាសរបស់ខ្លួន ក្នុងការជ្រើសរើសថ្នាក់ដឹកនាំ។
សម្រាប់ការបោះឆ្នោតខាងមុខនេះ ប្រធានស្ថាប័នរៀបចំការបោះឆ្នោត អះអាងថា គ.ជ.ប នឹងនៅតែបន្តដំណើរការ ការងារឲ្យមានតម្លាភាព និងយុត្តិធម៌តាមឆន្ទៈរបស់ប្រជាពលរដ្ឋ តាមរយៈការធ្វើឲ្យបញ្ជីឈ្មោះបោះឆ្នោតមានភាពត្រឹមត្រូវ ដោយធានាថា ប្រជាពលរដ្ឋខ្មែរគ្រប់អាយុ១៨ឆ្នាំ ត្រូវតែមានឈ្មោះត្រឹមត្រូវក្នុងបញ្ជីបោះឆ្នោត។ ចំណែកឯ ការរាប់សន្លឹកឆ្នោត នឹងធ្វើឡើងដោយត្រឹមត្រូវ និងគ្មានភាពលម្អៀង។
សូមជម្រាបជូនដែរថា សេចក្តីព្រាងបទបញ្ជា និងនីតិវិធីសម្រាប់ការបោះឆ្នោត ជ្រើសតាំងអ្នកតំណាងរាស្ត្រនីតិកាលទី៦ ឆ្នាំ២០១៨នេះ មាន១០ជំពូក និង ឧបសម្ព័ន្ធចំនួន៩ ដោយមានសមាសភាពដែលបានចូលរួមផ្តល់អនុសាសន៍ដូចជា តំណាងគណបក្សនយោបាយ អគ្គលេខាធិការដ្ឋានព្រឹទ្ធសភា ស្ថានទូតជប៉ុន អង្គការខុមហ្វ្រែល និងក្រុមប្រឹក្សាធម្មនុញ្ញ។ បើតាម គ.ជ.ប តាមជំពូកនីមួយៗ គ.ជ.ប បានធ្វើការកែសម្រួលខ្លឹមសារមួយចំនួនឲ្យត្រូវតាមច្បាប់ថ្មី និងតាមបរិបទថ្មី ដែលបានជួបប្រទះក្នុងការអនុវត្តកន្លងមក។
លោកស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត បានអះអាងថា គ.ជ.ប នឹងទទួលយកអនុសាសន៍ពីភាគីពាក់ព័ន្ធ ដើម្បីធ្វើយ៉ាងណាឲ្យសេចក្តីព្រាងបទបញ្ជា និងនីតិវិធីនេះ ក្លាយជាបទបញ្ជា និងនីតិវិធី មានលក្ខណៈពេញលេញតាមផ្លូវច្បាប់ និងអនុវត្តទៅគ្មានការប្រទាំងប្រទើសនៅគ្រប់ដំណាក់កាលទាំងអស់នៃការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ