ប្រមុខរដ្ឋាភិបាលកម្ពុជា-ថៃ លើកឡើងជាថ្មីពីការបង្កើតតំបន់សេដ្ឋកិច្ចពិសេសនៅតំបន់ព្រំដែន
ក្នុងកិច្ចប្រជុំ នៅវិមានរដ្ឋាភិបាលថៃ កាលពីល្ងាចថ្ងៃទី១៩ ខែធ្នូ លោកនាយករដ្ឋមន្ត្រី ហ៊ុន សែន និងលោកឧត្តមសេនីយ៍ ប្រាយុទ្ធ ចាន់អូចារ នាយករដ្ឋមន្ត្រីថៃ បានជួបពិភាក្សាការងារចំនួន ៦ ចំណុច។ ក្នុងនោះ ប្រមុខរដ្ឋាភិបាលទាំងពីរ បានលើកឡើងជាថ្មីទៀត អំពីការបង្កើតតំបន់សេដ្ឋកិច្ចពិសេសនៅតំបន់ព្រំដែន នៅខេត្តកោះកុង នៅប៉ោយប៉ែត ខេត្តបន្ទាយមានជ័យ និងនៅតំបន់ព្រំដែនមួយទៀត។ នាយករដ្ឋមន្ត្រីកម្ពុជា និងថៃ ក៏បានពិភាក្សាពីតំបន់ត្រួតស៊ីគ្នានៅព្រំដែនសមុទ្រ បញ្ហាពលករកម្ពុជាធ្វើការនៅថៃ ព្រមទាំងករណីវត្ថុបុរាណ ដែលថៃទើបចាប់បាន។
ចុះផ្សាយនៅថ្ងៃ៖
ស្តាប់ - ០២:១៤
នៅក្រៅកិច្ចប្រជុំកំពូលមហាអនុតំបន់មេគង្គ លើកទី៥ នៅទីក្រុងបាងកក កាលពីល្ងាចថ្ងៃទី១៩ ខែធ្នូ លោកនាយករដ្ឋមន្ត្រី ហ៊ុន សែន បានជួបពិភាក្សាការងារទ្វេភាគីជាមួយ លោកឧត្តមសេនីយ៍ ប្រាយុទ្ធ ចាន់អូចារ នាយករដ្ឋមន្ត្រីថៃ។
ក្នុងកិច្ចប្រជុំ លោក នាយករដ្ឋមន្ត្រី ហ៊ុន សែន បានលើកឡើងនូវចំណុចសំខាន់ៗ ចំនួន ៦ ចំណុច មានជាអាទិ៍ ស្នើសុំឲ្យមានកិច្ចប្រជុំឲ្យបានឆាប់រវាងក្រុមការងារចម្រុះរបស់ប្រទេសទាំងពីរ ពាក់ព័ន្ធនឹងការបង្កើតតំបន់សេដ្ឋកិច្ចពិសេស នៅតំបន់ព្រំដែន ខេត្តកោះកុង ជាមួយខេត្តត្រាត របស់ថៃ នៅប៉ោយប៉ែតរបស់កម្ពុជា ជាមួយអារញ្ញប្រាថេតរបស់ថៃ និងតំបន់ព្រំដែនផ្សេងៗទៀត។ ក្នុងនោះ លោកនាយករដ្ឋមន្ត្រី ហ៊ុនសែន ក៏បានជំរុញឲ្យមានការពិភាក្សាគ្នាលើតំបន់ត្រួតស៊ីគ្នានៅតំបន់ព្រំដែនសមុទ្រ របស់ប្រទេសទាំងពីរឲ្យបានឆាប់ តាមដែលអាចធ្វើទៅបាន។
ពាក់ព័ន្ធទៅនឹងបញ្ហាពលករកម្ពុជា ដែលកំពុងធ្វើការនៅប្រទេសថៃ លោកនាយករដ្ឋមន្ត្រី ហ៊ុនសែន ក៏បានលើកឡើងថា កម្ពុជាត្រៀមបញ្ជូនមន្ត្រីកម្ពុជាចំនួន ១០ នាក់បន្ថែមទៀត ទៅកាន់ប្រទេសថៃ ដើម្បីផ្តល់នូវលិខិតឆ្លងដែនដល់ពលករកម្ពុជា ដែលមួយចំនួន មិនទាន់មាននៅឡើយ។ មានពលករកម្ពុជាជាង ៦១ ម៉ឺននាក់ កំពុងធ្វើការនៅប្រទេសថៃ សព្វថ្ងៃ។
ពាក់ព័ន្ធនឹងវត្ថុបុរាណកម្ពុជា ដែលបានបាត់បង់ ក៏ត្រូវបាននាយករដ្ឋមន្ត្រី ហ៊ុន សែន ស្នើដល់ភាគីថៃ អនុញ្ញាតឲ្យអ្នកឯកទេសកម្ពុជា មកពិនិត្យមើលវត្ថុបុរាណ ដែលថៃទើបនឹងចាប់បាន។ លោកហ៊ុនសែន ក៏បានស្នើឲ្យភាគីថៃ បន្ធូរបន្ថយនូវលក្ខខណ្ឌដ៏តឹងរឹងមួយចំនួន ទាក់ទិននឹងវត្ថុបុរាណ ដើម្បីឲ្យកម្ពុជា អាចនាំមកវិញ។
ចំពោះការលើកឡើងខាងលើ លោកនាយករដ្ឋមន្ត្រីថៃ ប្រាយុទ្ធ ចាន់អូចារ បានលើកឡើងថា ថៃបានបង្កើតគណៈកម្មការរួចហើយ ដើម្បីនិយាយពីការបង្កើតតំបន់សេដ្ឋកិច្ចពិសេសនៅតាមតំបន់ព្រំដែនកម្ពុជា-ថៃ។ លោកថា ភាគីទាំងពីរនឹងធ្វើការពិភាក្សាគ្នាកាន់តែឆាប់តាមដែលអាចធ្វើទៅបាន ពិសេសពាក់ព័ន្ធនឹងការផ្លាស់ប្តូរទំនិញឆ្លងដែន នៃប្រទេសទាំងពីរ។ អំពីបញ្ហាតំបន់ត្រួតស៊ីគ្នា ក្នុងសមុទ្រនៃប្រទេសទាំងពីរ លោកនាយករដ្ឋមន្ត្រីថៃ ក៏សន្យាថា នឹងជំរុញឲ្យក្រុមការងារថៃ ចាប់ផ្តើមធ្វើការពិភាក្សាជាមួយកម្ពុជាផងដែរ។
អំពីបញ្ហាវត្ថបុរាណ ត្រូវបាននាយករដ្ឋមន្ត្រីថៃ អះអាងថា ប្រសិនជាកម្ពុជា មានភស្តុតាងប្រមាណ ៧០% នោះកម្ពុជា អាចទទួលយកវត្ថុបុរាណទាំងនោះមកវិញ។ ថៃក៏ស្វាគមន៍អ្នកឯកទេសកម្ពុជា ដើម្បីពិនិត្យផ្ទៀងផ្ទាត់វត្ថុបុរាណ ដែលថៃ ចាប់រឹបអូសបានទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ