គណបក្សសង្គ្រោះជាតិមិនទទួលស្គាល់លទ្ធផល តែមិនបោះបង់អាសនៈក្នុងសភាទេ
គណបក្សសង្គ្រោះជាតិបានប្រកាសក្នុងសន្នីសីទកាសែតមួយ កាលពីព្រឹកថ្ងៃទី២៩ កក្កដា នៅស្នាក់ការគណបក្សរបស់ខ្លួន ដោយច្រានចោល នូវលទ្ធផលដែលប្រកាសដោយគណបក្សប្រជាជនកម្ពុជា។ លទ្ធផលបឋម ដែលទទួលបាន គឺគណបក្សប្រជាជនកម្ពុជា ទទួលបាន ៦៨ អាសនៈ និងគណបក្សសង្គ្រោះជាតិ ទទួលបាន៥៥ អាសនៈ ក្នុងអាសនៈសរុបចំនួន ១២៣ នៅក្នុងរដ្ឋសភា នីតិកាលទី៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
បន្ទាប់ពីមានការប្រកាសលទ្ធផលជាបឋម នៃការបោះឆ្នោតកាលពីម្សិលមិញ លោក សម រង្ស៊ីប្រធានគណបក្សសង្គ្រោះជាតិ បានប្រកាស មិនទទួលស្គាល់លទ្ធផលបោះឆ្នោតបឋមនេះឡើយ ដោយលោកយល់ថា មានភាពមិនប្រក្រតីជាច្រើនជុំវិញការបោះឆ្នោត។
លោក សម រសង្ស៊ី បានអះអាងនៅក្នុងសន្និសីទការសែតដដែល កាលពីព្រឹកមិញថា មានឈ្មោះប្រមាណជាង ១លាន ២សែនឈ្មោះ គឺត្រូវបានគេលុបចោលក្នុងបញ្ជីឈ្មោះអ្នកបោះឆ្នោត និងមានឈ្មោះស្ទួនប្រមាណជាង២សែននាក់។ ជាងនេះទៅទៀត លោកបានបន្ថែមថា នៅមានភាពមិនប្រក្រតីផ្សេងទៀត ដោយលោកបាន ពន្យល់ថា ការតវ៉ានេះ មិនមែនជាហេតុផលចង់បានអំណាចក្នុងជួររដ្ឋាភិបាលនោះទេ។
ទាក់ទងនឹងការមិនទទួលស្គាល់លទ្ធផល ប្រធានគណបក្សរូបនេះបានបញ្ជាក់ថា គណបក្សសង្គ្រោះជាតិ នឹងធ្វើលិខិតមួយនៅក្នុងថ្ងៃនេះ ជូនទៅរដ្ឋាភិបាល ដើម្បីស្នើសុំឱ្យមានការពិនិត្យឡើងវិញ តាមចំណុចមួយចំនួន។ ដោយក្នុងនោះ លោក កឹម សុខា អនុប្រធានគណបក្សសង្គ្រោះជាតិ អះអាងថា ជាការមិនទទួលស្គាល់ តែមានផ្ដល់ជាដំណោះស្រាយ ដោយចង់ឱ្យមានបង្កើតជាគណកម្មាធិការចំរុះ ដែលមានដូចជា កម្មាធិការជាតិ អន្តរជាតិ និងភាគីទាំងពីរព្រមទាំង គ.ជ.ប.។
ទោះជាយ៉ាងណា ថ្នាក់ដឹកនាំទាំងពីររបស់គណបក្សសង្គ្រោះជាតិ សង្ឃឹមថានឹងទទួលបាន ចំលើយជាវិជ្ជមាន។ ហើយទន្ទឹមនឹងការមិនទទួលស្គាល់ លទ្ធផលជាបឋមខាងលើនេះ គណបក្សសង្គ្រោះជាតិក៏បានប្រកាសថា នឹងមិនបោះបង់ចោលនូវអាសនៈក្នុងរដ្ឋសភាដែលគណបក្សខ្លួនទទួលបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ