សង្គមស៊ីវិលចំនួន៧៣រួមគ្នាស្នើឱ្យរដ្ឋាភិបាលកម្ពុជាបញ្ឈប់ការយាយីតាមផ្នែកច្បាប់លើមន្ត្រីអតីតបក្សប្រឆាំង
អង្គការសង្គមស៊ីវិលចំនួន៧៣ នៅថ្ងៃទី០១ មិថុនានេះ បានចេញសេចក្តីថ្លែងការណ៍រួមមួយ បង្ហាញពីការព្រួយបារម្ភ អំពីការធ្វើទុក្ខបុកម្នេញតាមផ្លូវតុលាការ លើសមាជិកនៃអតីតគណបក្សសង្គ្រោះជាតិ។ ក្រៅពីព្រួយបារម្ភ អង្គការទាំងនេះក៏បានស្នើដល់រដ្ឋាភិបាលកម្ពុជាឱ្យបញ្ឈប់ការយាយីលើពួកគេ និង ស្តារលទ្ធិប្រជាធិបតេយ្យឡើងវិញ។ ប៉ុន្តែ គណបក្សកាន់អំណាចមិនទទួលយកការព្រួយបារម្ភ និងសំណើនេះបានទេ ដោយអះអាងថា ជាការធ្វើឡើងបែបលម្អៀងខាងនយោបាយ។
ចុះផ្សាយនៅថ្ងៃ៖
ស្តាប់ - ០២:១៩
អង្គការសង្គមស៊ីវិលជាតិ និង អន្តរជាតិចំនួន៧៣ តាមរយៈសេចក្តីថ្លែងការណ៍របស់ខ្លួន បានកត់សម្គាល់ថា នាពេលប៉ុន្មានសប្តាហ៍កន្លងទៅនេះ សមាជិកអតីតគណបក្សសង្គ្រោះជាតិជាច្រើននៅក្នុងខេត្តបាត់ដំបង កំពង់ធំ កណ្តាល កំពង់ស្ពឺ កំពង់ឆ្នាំង និង ខេត្តត្បូងឃ្មុំ បានប្រឈមមុខនឹងវិធានការផ្លូវច្បាប់។ ក្នុងនោះ សកម្មជនអតីតគណបក្សសង្គ្រោះជាតិយ៉ាងហោចណាស់១៤០នាក់ ត្រូវបានតុលាការក្នុងខេត្តមួយចំនួន កោះហៅឱ្យចូលទៅបង្ហាញខ្លួន ឬត្រូវបាននគរបាលមូលដ្ឋានសាកសួរ។ សម្រាប់អង្គការសង្គមស៊ីវិល ភាគច្រើននៃការដីកាកោះហៅពួកគេ គឺពុំមានផ្តល់មូលដ្ឋានផ្លូវច្បាប់ជាក់លាក់ទេ គឺគ្រាន់តែផ្អែកតាមការចោទប្រកាន់មិនច្បាស់លាស់ថា ពួកគេរំលោភសាលដីការបស់តុលាការកំពូល កាលពីខែវិច្ឆិកាឆ្នាំ២០១។
បន្ថែមលើនេះ ក្រុមអង្គការសង្គមស៊ីវិលក៏បានកត់ត្រាផងដែរ ទៅលើការចាប់ខ្លួនសមាជិកអតីតគណបក្សសង្គ្រោះជាតិម្នាក់ក្នុងខេត្តស្វាយរៀងកាលពីខែមករា ការចេញដីកាបង្គាប់ឱ្យនាំខ្លួនអតីតសមាជិកជាន់ខ្ពស់បក្សប្រឆាំង៨រូបពីបទរួមគំនិតក្បត់ជាតិកាលពីខែមីនា និង ការស្លាប់កូនប្រុសរបស់អតីតសមាជិកឃុំប្រឹក្សាឃុំអតីតគណបក្សសង្គ្រោះជាតិនៅក្នុងពន្ធនាគារខេត្តកំពង់ចាម។ ក្រុមអង្គការសង្គមស៊ីវិលបានចាត់ទុកការអនុវត្តច្បាប់លើពួកគេនេះថា ពុំទាន់មានលក្ខណៈត្រឹមត្រូវពេញលេញ។
ការលើកឡើងរបស់ក្រុមអង្គការសង្គមស៊ីវិលនេះ បានធ្វើឱ្យអ្នកនាំពាក្យគណបក្សប្រជាជនកម្ពុជា លោកសុខ ឥសាន ហួសចិត្ត។ ហួសចិត្ត ដោយសារតែលោកគិតថា ពួកគេមានជំហរលម្អៀងខាងនយោបាយ ព្រោះថា រដ្ឋាភិបាលកម្ពុជា មានវិធានការផ្លូវច្បាប់តែលើអ្នកប្រព្រឹត្តខុសតែប៉ុណ្ណោះ មិនដូចអ្វីដែលពួកគេលើកឡើងឡើយ។
ក៏ប៉ុន្តែក្រុមអង្គការសង្គមស៊ីវិលវិញបានចាត់ទុកថា វិធានការរដ្ឋាភិបាលកម្ពុជានេះ គឺជាការរំលោភបំពានសិទ្ធិមនុស្ស និងសេរីភាពជាមូលដ្ឋាន។ ដូច្នេះ ពួកគេស្នើដល់រដ្ឋាភិបាលឱ្យបញ្ឈប់ការយាយីនេះ ហើយចាត់វិធានការជាក់លាក់ ដើម្បីស្តារលំហលទ្ធិប្រជាធិបតេយ្យឡើងវិញ ក៏ដូចជាបង្កឱ្យបរិយាកាសងាយស្រួលដល់ពលរដ្ឋក្នុងការអនុវត្តសិទ្ធិសេរីភាពខាងបញ្ចេញមតិ ការជួបប្រជុំ និងការចូលរួមផ្នែកនយោបាយ។
ឆ្លើយតបនឹងការលើកឡើងនេះ លោកសុខ ឥសាន បានស្នើតបទៅកាន់ក្រុមអង្គការសង្គមស៊ីវិលវិញ ដោយប្រាប់ឱ្យពួកគេទៅណែនាំដល់អតីតសមាជិកគណបក្សសង្គ្រោះជាតិកុំឱ្យមានការប្រព្រឹត្តខុសច្បាប់។ ធ្វើបែបនេះបាន រដ្ឋាភិបាលកម្ពុជានឹងមិនចាត់វិធានការផ្លូវច្បាប់ណាមួយទៅលើពួកគេឡើយ។ នេះបើតាមលោក សុខ ឥសាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ