សាលាឧទ្ធរណ៍កំពុងរង់ចាំសំណុំរឿងអតីតអ្នកកាសែតអាស៊ីសេរីពីសាលាដំបូង ដើម្បីជម្រះរឿងនៅក្រៅឃុំ
មេធាវីការពារក្តីអតីតអ្នកកាសែតវិទ្យុអាស៊ីសេរីពីរនាក់បានដាក់បណ្តឹងប្រឆាំងនឹងការសម្រេចបន្តឃុំខ្លួនកូនក្ដីពួកគេទៅកាន់សាលាឧទ្ធរណ៍រួចហើយតាំងពីថ្ងៃទី៧ ធ្នូសប្តាហ៍មុន។ ប៉ុន្តែមកដល់ពេលនេះ សាលាឧទ្ធរណ៍មិនទាន់បានបើកការជំនុំជម្រះនៅឡើយទេ។ បើតាមសាលាឧទ្ធរណ៍ នេះដោយសារតែខ្លួនមិនទទួលបានសំណុំរឿងពីសាលាដំបូងរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០២:០៦
គិតមកដល់ពេលនេះ គឺជិត១០ថ្ងៃហើយដែលបណ្តឹងប្រឆាំងនឹងការសម្រេចបន្តឃុំខ្លួនអតីតអ្នកកាសែតអាស៊ីសេរីពីរនាក់របស់ចៅក្រមស៊ើបសួរសាលាដំបូងរាជធានីភ្នំពេញ បានជាប់គាំងនៅសាលាឧទ្ធរណ៍។ ការជាប់គាំងនេះ ដោយសារតែសាលាឧទ្ធរណ៍កំពុងរង់ចាំសំណុំរឿងពួកគេពីសាលាដំបូងរាជធានីភ្នំពេញ។ បើតាមលោកទូច ថាវរិទ្ធ ដែលជាអ្នកនាំពាក្យសាលាឧទ្ធរណ៍ គឺទាល់តែទទួលបានសំណុំរឿងទាំងមូលពីសាលាដំបូងរាជធានីភ្នំពេញសិន ទើបសាលាឧទ្ធរណ៍អាចជំនុំជម្រះលើបណ្តឹងប្រឆាំងនឹងការឃុំខ្លួនបន្តអតីតអ្នកកាសែតវិទ្យុអាស៊ីសេរីបាន។
ជុំវិញរឿងនេះ លោក លី សុផាណា អ្នកពាក្យសាលាដំបូងរាជធានីភ្នំពេញ មិនអាចទាក់ទងសុំការបំភ្លឺបានទេនៅថ្ងៃសៅរ៍នេះ។ សូមបញ្ជាក់ថា ចៅក្រមស៊ើបសួរសាលាដំបូងរាជធានីភ្នំពេញ បានទាត់ចោលសំណើសុំនៅក្រៅឃុំរបស់អតីតអ្នកកាសែតវិទ្យុអាស៊ីសេរីម្តងរួចមកហើយកាលពីកន្លងមក។ បើតាមលោកកែវ វន្នី ដែលជាមេធាវីការពារក្តី គឺចៅក្រមស៊ើបសួរសំអាងថា ដោយសារតែអតីតអ្នកកាសែតទាំងពីរនេះ ជាប់ចោទប្រព្រឹត្តបទល្មើសធ្ងន់ធ្ងរ ទើបមិនអាចឲ្យនៅក្រៅឃុំបាន។ ម្យ៉ាងវិញទៀត ប្រសិនបើអនុញ្ញាតឲ្យពួកគេនៅក្រៅឃុំ គឺបារម្ភខ្លាចពួកគេទៅបំផ្លាញនូវភស្តុតាងនានា និងមិនមកបង្ហាញមុខនៅតុលាការនៅពេលត្រូវការដំណើរការនីតិវិធី។ សម្រាប់មេធាវីការពារក្តី ការសម្រេចនេះគឺជារឿងអយុត្តិធម៌សម្រាប់កូនក្តីរបស់លោក។ លោកមេធាវីអះអាងថា កូនក្តីរបស់លោកមិនទៅប្រព្រឹត្តរឿងបែបនោះទេ ហើយពួកគេក៏មិនអាចរត់ទៅណាបាននោះដែរ។
សូមរំលឹកឡើងវិញថា អតីតអ្នកកាសែតវិទ្យុអាស៊ីសេរីពីរនាក់ គឺលោកអ៊ួន ឈិន និងលោកយាង សុជាមេត្តាត្រូវបានតុលាការក្រុងភ្នំពេញឃុំខ្លួននៅក្នុងពន្ធនាគារក្រោមការប្រកាន់ពីបទប្រគល់ឲ្យរដ្ឋបរទេសនូវព័ត៌មានជាអាទិ៍ដែលអាចធ្វើឲ្យអន្តរាយដល់ការការពារជាតិ តាមក្រមព្រហ្មទណ្ឌរបស់កម្ពុជា។ ជាបទចោទដែលអាចឲ្យពួកគេប្រឈមនឹងការជាប់ពន្ធនាគារពី៧ឆ្នាំ ទៅ ១៥ឆ្នាំ។ សម្រាប់ក្រុមអ្នកកាសែតកម្ពុជាមួយចំនួនដែលតាមដានសំណុំរឿងនេះ ការចោទប្រកាន់នេះគឺធ្ងន់ធ្ងរពេកហើយៗពួកគេបានសុំឲ្យតុលាការទម្លាក់ចោលវិញ។ ចំណែកមេធាវីការពារក្តីយល់ថា វាជារឿងអយុត្តិធម៌សម្រាប់អតីតអ្នកកាសែតទាំងពីរ ព្រោះថាពួកគេមិនបានប្រព្រឹត្តខុសដូចការចោទប្រកាន់នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ