រដ្ឋាភិបាលខ្មែរលុបចោលលិខិតឆ្លងដែនការទូតរបស់អតីតតំណាងរាស្ត្រ និងមន្ត្រីបក្សសង្គ្រោះជាតិ៥៦រូប
ក្រសួងការបរទេសកម្ពុជា បានសម្រេចលុបចោលលិខិតឆ្លងដែនការទូតរបស់អតីតតំណាងរាស្ត្រ និងអតីតមន្ត្រីបក្សសង្គ្រោះជាតិចំនួន៥៦រូប។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជាចុះថ្ងៃទី២៤ វិច្ឆិកា តែទើបបង្ហាញជាសាធារណៈនៅថ្ងៃនេះ។ យ៉ាងណាក៏ដោយ មន្ត្រីជាន់ខ្ពស់អតីតគណបក្សសង្គ្រោះជាតិ បានអះអាងថា ការលុបចោលនេះគឺអតីតក្រុមតំណាងរាស្ត្រទាំងនោះមិនខ្វល់ខ្វាយទេ ព្រោះថាមិនប៉ះពាល់អ្វីដល់ពួកគេឡើយ។
ចុះផ្សាយនៅថ្ងៃ៖
ស្តាប់ - ០២:២០
អតីតក្រុមតំណាងរាស្ត្រ និងអតីតមន្ត្រីគណបក្សសង្គ្រោះជាតិទាំង៥៦នាក់នេះ មានជាអាទិ៍លោកកឹម សុខា លោកអេង ឆៃអ៊ាង លោកប៉ុល ហំម និងលោកស្រីមួរ សុខហួរ ដែលសុទ្ធសឹងតែជាថ្នាក់ដឹកនាំអតីតគណបក្សសង្គ្រោះជាតិ។ ក្រៅពីនេះ ក៏មានលោកស្រីជូឡុង សូម៉ូរ៉ា ភរិយាលោកសម រង្ស៊ី លោកសុន ឆ័យ លោកយឹម សុវណ្ណ លោកអ៊ូ ច័ន្ទឫទ្ធិ និងលោកយ៉ែម ប៉ុណ្ណឫទ្ធិជាដើម។ ពួកគេទាំងនេះ ត្រូវបានក្រសួងការបរទេសកម្ពុជាលុបលិខិតឆ្លងដែនការទូត បន្ទាប់គណបក្សសង្គ្រោះជាតិរបស់ពួកគេត្រូវបានតុលាការកំពូលរំលាយចោល ហើយពួកគេក៏ស្ថិតក្នុងមន្ត្រី១១៨នាក់ដែលត្រូវតុលាការជាន់ខ្ពស់កម្ពុជាសម្រេចកាត់សិទ្ធិធ្វើនយោបាយរយៈពេល៥ ឆ្នាំផងដែរ។
ចំពោះបញ្ហានេះ កញ្ញាកឹម មនោវិទ្យា ដែលធ្លាប់ជាអគ្គនាយករងផ្នែកកិច្ចការសាធារណៈរបស់អតីតគណបក្សសង្គ្រោះជាតិ បានអះអាងថា មិនប៉ះពាល់អ្វីដល់ក្រុមអតីតមន្ត្រីនៃគណបក្សសង្គ្រោះជាតិទាំង៥៦រូបនោះឡើយ។ មូលហេតុនៃការមិនប៉ះពាល់នេះ បើតាមកញ្ញាកឹម មនោវិទ្យា គឺដោយសារតែពួកគេមានលិខិតឆ្លងដែនក្នុងនាមជាពលរដ្ឋខ្មែរមួយទៀត ដូច្នេះពួកគេអាចធ្វើដំណើរទៅណាមកណាដោយមិនមានការព្រួយបារម្ភអ្វីទេ។
សូមកត់សម្គាល់ថា បន្ទាប់ពីគណបក្សប្រឆាំងដ៏ធំជាងគេនៅកម្ពុជាត្រូវរំលាយក្រោមស្នាដៃតុលាការកំពូលកម្ពុជាកាលពីថ្ងៃទី១៦ វិច្ឆិកា ក្រុមអតីតតំណាងរាស្ត្របក្សនេះស្ទើរតែទាំងអស់បានចេញទៅបរទេសក្នុងគោលបំណងធ្វើយុទ្ធនាការការទូត និងតស៊ូមតិ ដើម្បីទាមទារឲ្យគណបក្សសង្គ្រោះជាតិដំណើរការឡើងវិញ និង ឲ្យមានការដោះលែងលោកកឹម សុខា ផង។
កញ្ញាកឹម មនោវិទ្យា ដែលកំពុងស្ថិតនៅសហអាមេរិក បានបង្ហាញឲ្យដឹងថា សហគមន៍អន្តរជាតិកំពុងតាមដានយកទុកចិត្តចំពោះបញ្ហានៅកម្ពុជា ហើយក្នុងនោះមានខ្លះក៏កំពុងរៀបចំទណ្ឌកម្មសម្រាប់រដ្ឋាភិបាលកម្ពុជា ខណៈសហរដ្ឋអាមេរិកបានប្រកាសកាត់ជំនួយសម្រាប់គណៈកម្មាធិការជាតិរៀបចំការបោះឆ្នោតកម្ពុជារួចទៅហើយ។ បន្ថែមលើនេះ នៅថ្ងៃទី១០ ខែធ្នូខាងមុខនេះ ក្រុមតំណាងរាស្ត្រអតីតគណបក្សសង្គ្រោះជាតិដែលនៅបរទេស និងពលរដ្ឋខ្មែរដែលនៅគាំទ្រអតីតគណបក្សប្រឆាំងក៏នឹងប្រមូលផ្តុំគ្នានៅពីមុខសេតវិមានរបស់លោកប្រធានាធិបតីអាមេរិកដូណាល់ ត្រាំ។ គម្រោងជុំជួបគ្នានេះ គឺធ្វើឡើងក្នុងគោលបំណងបង្ហាញពីការព្រួយបារម្ភ និងជំរុញឲ្យរដ្ឋាភិបាលអាមេរិកាំងចាត់វិធានការទាំងឡាយ ដើម្បីឲ្យរដ្ឋាភិបាលខ្មែរកែប្រែស្ថានភាពនយោបាយនៅក្នុងប្រទេសកម្ពុជាឲ្យវិលទៅរកសភាពដើមឡើងវិញ។ នេះបើតាមការបញ្ជាក់របស់កញ្ញាកឹម មនោវិទ្យាដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ