លោកហ៊ុន សែន៖ ការដោះលែងស្ត្រីមានគភ៌និងកូន មិនមែនជាការលើកទឹកចិត្តឲ្យប្រព្រឹត្តបទល្មើសនោះទេ
ប្រមុខរដ្ឋាភិបាលកម្ពុជា លោកនាយករដ្ឋមន្ត្រីហ៊ុនសែន បានថ្លែងបញ្ជាក់ថា ការសម្រេចដោះលែងស្ត្រីដែលមានគភ៌ និងមានកូនតូចនៅក្នុងពន្ធនាគារនៅថ្ងៃនេះ មិនមែនជាការលើកទឹកចិត្តដល់ស្ត្រីផ្សេងទៀតឲ្យប្រព្រឹត្តបទល្មើសនោះទេ តែជាយកចិត្តទុកដាក់ដល់សុខភាពគភ៌ និងកុមារតូចៗរស់នៅក្នុងពន្ធនាគារ។ លោកនាយករដ្ឋមន្ត្រីបានថ្លែងដូច្នេះនៅក្នុងពិធីរំលឹកខួបលើកទី១០៤នៃទិវាសិទ្ធិនារីអន្តរជាតិនៅវិមានសន្តិភាពនៅព្រឹកថ្ងៃទី៨មីនានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
គឺនៅក្នុងពិធីរំលឹកខួបទិវាសិទ្ធិនារីអន្តរជាតិនៅព្រឹកថ្ងៃអាទិត្យទី៨ មីនានេះ ប្រមុខរដ្ឋាភិបាលកម្ពុជា លោកហ៊ុន សែន បានគូសបញ្ជាក់ថា ការដោះលែងស្ត្រីដែលកំពុងមានគភ៌ និងមានកូនចំនួន២២នាក់ចេញពីពន្ធនាគារនៅថ្ងៃទិវាសិទ្ធិនារី៨មីនា គឺជាការយកចិត្តដាក់ជាចម្បងរបស់រដ្ឋាភិបាលចំពោះសុខុមាលភាពកូនៗរបស់ស្ត្រីដែលជាប់ឃុំទាំងនោះ។
លោកហ៊ុន សែន៖ “ យើងក៏សូមបញ្ជាក់ផងដែរថា យើងមិនចង់ឲ្យមាននូវការលើកទឹកចិត្តណាមួយសម្រាប់ស្ត្រីដែលមានកូននិងមានគភ៌ធ្វើសកម្មភាពខុសច្បាប់នោះទេ ហើយការដោះលែងលើកនេះជាកាយវិការមួយដើម្បីបង្ហាញ ដើម្បីបញ្ជាក់ បញ្ហាធំជាងគេនៅទីនេះគឺបញ្ហាកូន ទាំងកូនដែលមិនទាន់កើតក៏ត្រូវការរសជាតិ ត្រូវការអ្វីៗ ត្រូវការសុខុមាលភាពរបស់ម្តាយ ទើបកូននៅក្នុងផ្ទៃនោះដែលគ្នាមិនទាន់ដឹងអីសោះនោះហើយត្រូវទទួលទណ្ឌកម្មនឹងគេដែរនោះ។ ម្យ៉ាងទៀត កូនដែលទោះបីថា កើតហើយអាយុ១ឆ្នាំ ២ឆ្នាំ ៣ឆ្នាំ នៅក្នុងពន្ធនាគារគឺវាជារឿងមួយអកុសលខ្លាំងណាស់។
ជាមួយគ្នានេះ ប្រមុខរដ្ឋាភិបាលកម្ពុជា ក៏បានអំពាវនាវឲ្យក្រសួងពាក់ព័ន្ធផ្សេងៗដូចជាក្រសួងមហាផ្ទៃ ក្រសួងយុត្តិធម៌ និងក្រសួងកិច្ចការនារីស្វែងរកវិធានការដោះស្រាយនៅពេលដែលការដោះលែងស្ត្រីទាំងនេះក្លាយជាឱកាសដល់ឧក្រិដ្ឋជនដែលអាចនឹងប្រើប្រាស់ស្ត្រីដែលមានភគ៌ ប្រព្រឹត្តខុសច្បាប់ ព្រោះអាងថា នឹងមានការដោះលែងវិញនោះ។
សូមបញ្ជាក់ថា នៅថ្ងៃទី៨មីនានេះ រដ្ឋាភិបាលកម្ពុជាតាមរយៈព្រះរាជក្រិត្យព្រះមហាក្សត្រ បានសម្រេចដោះលែងស្ត្រីដែលកំពុងមានគភ៌ និងមានកូនតូចចំនួន២២នាក់ចេញពីពន្ធនាគារនៅទូទាំងប្រទេស។ ក្នុងនោះ មាន៧នាក់នៅក្នុងពន្ធនាគារព្រៃស និងផ្សេងទៀតនៅក្នុងពន្ធនាគារក្នុងខេត្តចំនួន៦ រួមមានខេត្តបាត់ដំបង ព្រះសីហនុ សៀមរាប កោះកុង បន្ទាយមានជ័យ និងខេត្តឧត្តរមានជ័យ។ ក្នុងចំណោមស្ត្រីទាំង២២នាក់នេះ ស្ត្រីដែលកំពុងមានគភ៌ហើយត្រូវដោះលែងនោះមានតែម្នាក់គត់នៅក្នុងខេត្តបន្ទាយមានជ័យ។
សូមជំរាបជូនផងដែរថា ស្ត្រីទាំង២២នាក់នេះ សុទ្ធតែទទួលបានសេចក្តីសម្រេចជាស្ថាពររួចហើយពីតុលាការ ដែលនេះគឺជាលក្ខខណ្ឌស្របតាមច្បាប់ដែលអនុញ្ញាតឲ្យមានការដោះលែងបាន។ ចំណែកស្ត្រីដែលកំពុងមានគភ៌និង មានកូនផ្សេងទៀត តែស្ថិតនៅក្នុងដំណើរការក្តី ឫតុលាការមិនទាន់ចេញសេចក្តីសម្រេចជាស្ថាពរនោះ មិនអាចដោះលែងចេញពីពន្ធនាគារបាននោះទេ។
ទោះជាបីបែបនេះក្តី លោកនាយករដ្ឋមន្ត្រីហ៊ុន សែន បានលើកឡើងថា រដ្ឋាភិបាលនឹងខិតខំបន្ថែមទៀត ដើម្បីធ្វើការដោះលែងស្ត្រីដែលកំពុងមានគភ៌និងមានកូនផ្សេងទៀតចេញពីពន្ធនាគារឲ្យបានមុនពិធីបុណ្យចូលថ្មីប្រពៃណីខ្មែរខាងមុខនេះ។ ក៏ប៉ុន្តែលោកនាយករដ្ឋមន្ត្រី បានសង្កត់ធ្ងន់ថា ស្ត្រីដែលអាចដោះលែងបាននោះ ទាល់តែមានសេចក្តីសម្រេចជាស្ថាពរពីតុលាការជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ