ពលរដ្ឋមានជម្លោះដីធ្លីស្នើទូតបរទេសចូលរួមឃ្លាំមើលសវនាការលើស្ត្រីបឹងកក់
នៅព្រឹកថ្ងៃព្រហស្បតិ៍នេះ ប្រជាពលរដ្ឋដែលមានជម្លោះដីធ្លីនៅក្នុងតំបន់បឹងកក់ បុរីកីឡា និងថ្មគោលជាដើម ប្រមាណជាង១០០នាក់ក្នុងនោះមានទាំងព្រះសង្ឃមួយចំនួនផង បានដង្ហែក្បួនដាក់លិខិតអញ្ជើញទៅកាន់ស្ថានទូតបរទេសចំនួន៩ប្រចាំនៅកម្ពុជា និងរដ្ឋសភាជាតិខ្មែរ ដើម្បីចូលរួមឃ្លាំមើលសវនាការលើស្ត្រីបឹងកក់នៅសាលាឧទ្ធរណ៍។ សាលាឧទ្ធរណ៍នឹងបើកសវនាការជំនុំជម្រះលើស្ត្រីអ្នកភួមិបឹងកក់ចំនួន១០នាក់ និងអតីតព្រះសង្ឃមួយអង្គផងនៅថ្ងៃទី២២ មករា ឆ្នាំ២០១៥ ខាងមុខនេះ។
ចុះផ្សាយនៅថ្ងៃ៖
ស្តាប់ - ០២:៣៩
ព្រោះតែអស់ជំនឿលើប្រព័ន្ធតុលាការនៅកម្ពុជា ក្រុមប្រជាពលរដ្ឋមានជម្លោះដីធ្លីទាំងនោះ បានសម្រេចប្រមូលផ្តុំគ្នាដង្ហែដាក់លិខិតអញ្ជើញទៅកាន់ស្ថានទូតចំនួន៩ប្រចាំនៅកម្ពុជា និងរដ្ឋសភាជាតិ ដើម្បីចូលរួមឃ្លាំមើលសវនាការលើស្ត្រីបឹងកក់ចំនួន១០ រូប និង អតីតព្រះសង្ឃមួយអង្គផង ដែលពេលនេះកំពុងជាប់ឃុំនៅក្នុងពន្ធនាគារព្រៃស។
ក្បួនដង្ហែដាក់លិខិតអញ្ជើញ បានផ្តើមធ្វើមុនគេនៅស្ថានទូតបារាំងក្នុងទីក្រុងភ្នំពេញ។ សម្រាប់ស្ថានទូតបារាំង ក្រៅពីដាក់លិខិតអញ្ជើញ ក្រុមប្រជាពលរដ្ឋមានជម្លោះដីធ្លីក៏បានដាក់កម្រងផ្កា គោរពវិញ្ញាណក្ខន្ធអ្នកកាសែតបារាំងរបស់ទស្សនាវដ្តី Charlie Hebdo ដែលរងការបាញ់ប្រហារពីក្រុមភេរវករអ៊ីស្លាមជ្រុលនិយមកាលពីសប្តាហ៍មុននៅក្នុងទីក្រុងបារីសផងដែរ។
បន្ទាប់ពីស្ថានទូតបារាំង ក្រុមប្រជាពលរដ្ឋបានដង្ហែលិខិតអញ្ជើញទៅដាក់នៅស្ថានទូតអង់គ្លេស អាមេរិក សហភាពអឺរ៉ុប អូស្ត្រាលី ជប៉ុន និងស្ថានទូតចំនួន៣ ទៀតមុននឹងបញ្ចប់នៅរដ្ឋសភាជាតិកម្ពុជា។ អ្នកស្រីប៉ូវ សោភា តំណាងអ្នកភូមិបឹងកក់ បានថ្លែងថា ការដាក់លិខិតអញ្ជើញនេះ ក្រុមប្រជាពលរដ្ឋសង្ឃឹមថា ឯកអគ្គរាជទូត និងរដ្ឋទូតនៃស្ថានទូតទាំងនោះ នឹងចូលរួមឃ្លាំមើលសវនាការលើស្ត្រីបឹងកក់នេះ ដើម្បីបានដឹងថា តើតុលាការនៅស្រុកខ្មែរមានឯករាជ្យ ឫ ស្ថិតក្រោមការបង្គាប់បញ្ជាពីរដ្ឋាភិបាល។ អ្នកស្រីបន្តថា ស្ថានទូតប្រទេសមហាអំណាចដូចជាបារាំងជាដើមដែលជាប្រទេសហត្ថលេខីលើកិច្ចព្រមព្រៀងសន្តិភាពក្រុងបារីស២៣ តុលា អាចដាក់សម្ពាធលើរដ្ឋាភិបាលខ្មែរ ដើម្បីធ្វើយ៉ាងណាឲ្យតុលាការស្រុកខ្មែរមានឯករាជ្យ ដែលអាចផ្តល់យុត្តិធម៌ដល់ស្ត្រីបឹងកក់ដែលកំពុងជាប់ឃុំទាំងនោះបាន។
លោកអំ សំអាត ប្រធានផ្នែកបច្ចេកទេសស៊ើបអង្កេតរបស់អង្គការលីកាដូដែលបានឃ្លាំមើលការដង្ហែដាក់លិខិតអញ្ជើញរបស់ក្រុមប្រជាពលរដ្ឋមានជម្លោះដីធ្លីនេះ យល់ថា ការស្វែងរកអន្តរាគមន៍ពីស្ថានទូតបរទេសរបស់ក្រុមប្រជាពលរដ្ឋនេះ គឺដោយសារពួកគេបាត់បង់ជំនឿលើប្រព័ន្ធតុលាការស្រុកខ្មែរ ហើយពួកគេរំពឹងថា ស្ថានទូតបរទេសទាំងនោះជាពិសេសប្រទេសផ្តល់ជំនួយដល់កម្ពុជា អាចមានឥទ្ធិពលជំរុញឲ្យមានការដោះលែងអ្នកកំពុងឃុំទាំងនោះ។
សូមបញ្ជាក់ថា ស្ត្រីអ្នកភូមិបឹងកក់ដែលកំពុងជាប់ឃុំទាំងនោះ ត្រូវបានតុលាការសាលាដំបូងរាជធានីភ្នំពេញកាលពីអំឡុងខែវិច្ឆិកាឆ្នាំ២០១៤ បានសម្រេចផ្ទន្ទាទោសឲ្យជាប់ពន្ធនាគារក្នុងម្នាក់ៗរយៈពេលមួយឆ្នាំ និងពិន័យជាប្រាក់ចំនួន២ លានរៀល ពីបទធ្វើឲ្យកកស្ទះចរចាចរណ៍ និងប្រឆាំងមន្ត្រីរាជការសាធារណៈ បន្ទាប់ពីពួកគេចេញតវ៉ាបិទផ្លូវនៅមុខសាលារាជធានីភ្នំពេញ រឿងទឹកលិចផ្ទះរបស់ខ្លួន។ ស្ត្រីបឹងកក់ទាំងនោះ និងអតីតព្រះអង្គមួយអង្គផងដែលតែងតែចេញមុខតវ៉ាជារឿយៗ នឹងត្រូវតុលាការសាលាឧទ្ធរណ៍បើកសវនាការជំនុំជម្រះឡើងវិញនៅថ្ងៃទី២២ មករា ខាងមុខនេះ។ យ៉ាងណាក៏ដោយ លោកអំ សំអាត បានសម្តែងសុទុដ្ឋិនិយមថា សាលាឧទ្ធរណ៍នឹងដោះលែងអ្នកទាំងនោះឲ្យមានសេរីភាពឡើងវិញ ដោយសារមិនមានភស្តតាងណាមួយបញ្ជាក់ថា ពួកគេបានប្រព្រឹត្តដូចការចោទប្រកាន់នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ