រដ្ឋមន្ត្រី៖ សេចក្ដីព្រាងច្បាប់ស្ដីពីសិទ្ធិទទួលព័ត៌មាននឹងក្លាយជាឧបករណ៍លែងចោទគ្នាទៅវិញទៅមក
រដ្ឋមន្ត្រីក្រសួងព័ត៌មានរំពឹងថា នៅពេលសេចក្ដីព្រាងច្បាប់ស្ដីពីសិទ្ធិទទួលមានដាក់ឲ្យប្រើប្រាស់ជាផ្លូវការ នឹងលែងមានការចោទគ្នាទៅវិញទៅមកជុំវិញការលាក់បាំងព័ត៌មាននានារវាងរដ្ឋាភិបាល និងអ្នកសារព័ត៌មានក៏ដូចជាអង្គការសង្គមស៊ីវិលជាដើម។ ក្ដីរំពឹងរបស់លោករដ្ឋមន្ត្រីបែបនេះ បានធ្វើឡើងនៅក្នុងកិច្ចពិភាក្សាបញ្ចប់លើសេចក្ដីព្រាងច្បាប់ស្ដីពីសិទ្ធិទទួលបានព័ត៌មាននៅថ្ងៃពុធទី៣១មករានេះ។
ចុះផ្សាយនៅថ្ងៃ៖ កែប្រែថ្ងៃទី៖
លោក ខៀវ កញារិទ្ធិ រដ្ឋមន្ត្រីក្រសួងព័ត៌មានបានកត់សម្គាល់ថា កន្លងមកការរឹតត្បិតព័ត៌មានពីសំណាក់អាជ្ញាធរបានក្លាយជារឿងមិនទុកចិត្តគ្នារវាងអាជ្ញាធរ និងសាធារណៈជនរួមនឹងអ្នកសារព័ត៌មាន។ ដូច្នេះសេចក្ដីព្រាងច្បាប់ស្ដីពីសិទ្ធិទទួលបានព័ត៌មាននេះបានក្លាយជាឧបករណ៍មានទំនុកចិត្តរវាងសាធារណៈជន និងអាជ្ញាធរព្រោះអត្ថប្រយោជន៍នៃច្បាប់នេះ មិនមែនប្រើប្រាស់ចំពោះតែអ្នកសារព័ត៌មានទេ ពោលគឺច្បាប់នេះមានប្រយោជន៍សម្រាប់មនុស្សទូទៅ។ នេះបើតាមលោករដ្ឋមន្ត្រី។
បន្ទាប់ពីឆ្លងកាត់ដំណាក់ពិភាក្សាជាមួយភាគីពាក់ព័ន្ធរួមនឹងម្ចាស់ជំនួយដែលជាដៃគូរអន្តរជាតិអស់រយៈពេលជិតបីឆ្នាំ រហូតមកដល់ដំណាក់កាលបញ្ចប់កិច្ចពិភាក្សាបឋមនៅថ្ងៃពុធទី៣១មករានេះ ច្បាប់ស្ដីពីសិទ្ធិទទួលបានព័ត៌មានត្រូវបានគេជឿជាក់មានលក្ខណៈល្អប្រសើរជាងមុន ។ ហើយក៏ជាផ្នែកមួយជួយកាត់បន្ថយទំនាស់ដែរដោយសារតែកិច្ចពិភាក្សាកន្លងមកចូលរួមពិភាក្សាពីក្រុមអង្គការសង្គមស៊ីវិលធ្វើការងារទាក់ទងប្រព័ន្ធផ្សព្វផ្សាយ។
ការងារបន្ត លោក ខៀវ កញារិទ្ធិ គូសបញ្ជាក់ថា បន្ទាប់ពីបញ្ចប់កិច្ចពិភាក្សាបឋមលើសេចក្ដីព្រាងច្បាប់ស្ដីពីសិទ្ធិទទួលបានព័ត៌មាននេះហើយ លោកកំពុងសសេរសំណើរទៅកាន់ប្រមុខរាជរដ្ឋាភិបាលដើម្បីរៀបចំកិច្ចប្រជុំជាអន្តរក្រសួងជាមុនសិន មុនដាក់បញ្ចូលសេចក្ដីព្រាងច្បាប់នេះទៅក្នុងរបៀបវារៈកិច្ចប្រជុំគណៈរដ្ឋមន្ត្រី ។ បើតាមលោករដ្ឋមន្ត្រីលោកនឹងខិតខំធ្វើយ៉ាងណាឲ្យសេចក្ដីព្រាងច្បាប់នេះលេចចេញជារូបរាងនៅក្នុងឆ្នាំ២០១៨នេះ។
សូមបញ្ជាក់ថា សេចក្ដីព្រាងច្បាប់ស្ដីពីសិទ្ធិទទួលបានព័ត៌មាននេះ មាន៩ជំពូក ៣៩មាត្រា។ ជាការកត់សម្គាល់ ជំពូក៤ស្ដីពីព័ត៌មានសម្ងាត់ ក្នុងចំណោម៩ជំពូកនៃសេចក្ដីព្រាងច្បាប់នេះត្រូវបានអះអាងថា ជាចំណុចមួយសំខាន់ដែលអ្នកសារព័ត៌ចង់ឲ្យមានការបន្ធូរបន្ថយលើចំណុចនេះ។ ប៉ុន្តែយ៉ាងណាក៏ដោយជំពូកស្ដីពីព័ត៌មានសម្ងាត់នេះបានកំណត់ថា ស្ថាប័នសាធារណៈអាចបដិសេធផ្ដល់ព័ត៌មានជូនសាធារណៈជន ប្រសិនបើការបញ្ចេញព័ត៌មាននោះបណ្ដាលឲ្យអន្តរាយដល់វិស័យការពារជាតិ សន្តិសុខសង្គម ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ