សង្គមស៊ីវិលបារម្ភខ្លាំងឡើងៗពីសន្តិសុខនៅខេត្តព្រះសីហនុ ក្រោយមានការបាញ់សម្លាប់គ្នាជាបន្តបន្ទាប់
នៅព្រឹកថ្ងៃអាទិត្យនេះ មានករណីបាញ់សម្លាប់យ៉ាងសហាវមួយទៀតហើយបានកើតឡើងនៅខេត្តព្រះសីហនុ។ ជនជាតិចិនម្នាក់ត្រូវបានជនជាតិចិនដូចគ្នាបាញ់សម្លាប់ទម្លាក់ពីលើរថយន្តនៅកណ្តាលក្រុងព្រះសីហនុតែម្តង។ នេះ មិនមែនជាករណីថ្មីថ្មោងទេនៅខេត្តព្រះសីហនុ ពោល គឺកន្លងមកក៏ធ្លាប់មានករណីបាញ់សម្លាប់គ្នាបែបនេះកើតឡើងជាបន្តបន្ទាប់ផងដែរ។ ចំណែកកាលពីប៉ុន្មានថ្ងៃមុននេះ អាជ្ញាធរកម្ពុជាបានចាប់ខ្លួនជនដៃដល់ជាជនជាតិចិនម្នាក់ពីករណីប្លន់សម្លាប់កាត់ជាកង់ៗទៅលើជនរងគ្រោះជាជនជាតិចិនដូចគ្នា។ បញ្ហានេះបានធ្វើសង្គមស៊ីវិលនៅកម្ពុជាសម្តែងការព្រួយបារម្ភខ្លាំងឡើងៗពីបញ្ហាសន្តិសុខ និងសុវត្ថិភាពរស់នៅរបស់ពលរដ្ឋនៅទីនោះ។
ចុះផ្សាយនៅថ្ងៃ៖
ស្តាប់ - ០២:២០
លោកព្រាប កុល នាយកប្រតិបត្តិអង្គការតម្លាភាពកម្ពុជា បានលើកឡើងថា បញ្ហាបាញ់សម្លាប់គ្នាយ៉ាងអាណាធិបតេយ្យ និងអសន្តិសុខនៅក្នុងខេត្តព្រះសីហនុនេះ ជារឿងមួយដ៏គួរឱ្យព្រួយបារម្ភ និងមិនមែនជារឿងតូចតាចនោះទេ។ សម្រាប់លោកព្រាប កុល បញ្ហាទាំងនេះ បានធ្វើឱ្យប្រជាពលរដ្ឋកម្ពុជា និង ភ្ញៀវទេសចរផ្សេងទៀតមានការភ័យខ្លាច និង មិនហ៊ានទៅលេងកម្សាន្តនៅខេត្តព្រះសីហនុ។
ចំណែក លោកយង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បអភិវឌ្ឍ និងសន្តិភាពវិញ ក៏យល់ឃើញមិនខុសគ្នានឹងលោកព្រាប កុលដែរ។ លោកអះអាងថា បញ្ហានេះនឹងដល់ប៉ះពាល់ដល់អារម្មណ៍ប្រជាពលរដ្ឋដែលកំពុងរស់នៅក្នុងខេត្តព្រះសីហនុ។ ជាមួយគ្នានេះ វាក៏ជាមេរៀនដ៏អាក្រក់ដល់យុវជនខ្មែរជំនាន់ក្រោយដែលអាចនឹងយកតម្រាប់តាម។ ម្យ៉ាងវិញទៀត លោកគូសបញ្ជាក់ថា បញ្ហានេះក៏នឹងប៉ះពាល់ដល់កិត្តិយសរបស់កម្ពុជានៅលើឆាកអន្តរជាតិផងដែរ។
ទាំងលោកយង់ គឹមអេង និង លោកព្រាប កុល សុទ្ធតែយល់ឃើញដូចគ្នាថា បញ្ហាបាញ់បោះយ៉ាអាណាធិបតេយ្យនៅក្នុងខេត្តព្រះសីហនុនេះ គឺកើតឡើងដោយសារតែការរឹតបន្តឹងរបស់អាជ្ញាធរនៅទីនោះនៅមានកម្រិតនៅឡើយ។ ការលើកឡើងដូច្នេះ ដោយសារតែពួកគេមើលឃើញពីការប្រើប្រាស់អាវុធដោយសេរីពីជនបង្ក។ ដូចគ្នានេះដែរ លោកអំ សំអាត នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូវិញក៏បានសម្តែងនូវការងឿងឆ្ងល់ ថាតើជនជាតិចិនទាំងនោះបានអាវុធពីណាមកប្រើប្រាស់។
ចំពោះការប្រើប្រាស់អាវុធដោយសេរីនេះ អាជ្ញាធរខេត្តព្រះសីហនុកំពុងតែធ្វើការស៊ើបអង្កេត។ នេះបើតាមការបញ្ជាក់ឱ្យដឹងរបស់លោកឃាង ភារម្យ អ្នកនាំពាក្យសាលាខេត្តព្រះសីហនុ។ លោកក៏ទទួលស្គាល់ផងដែរនូវចំណុចខ្វះចន្លោះខ្លះៗ បើទោះបីអាជ្ញាធរខិតខំរឹតបន្តឹងការអនុវត្តច្បាប់យ៉ាងណាក៏ដោយចុះ។
យ៉ាងណាក៏ដោយ ប្រឈមមុខនឹងបញ្ហានេះ តំណាងអង្គការសង្គមស៊ីវិលខាងលើ បានទទូចឱ្យអាជ្ញាធរខេត្តព្រះសីហនុត្រូវតែពង្រឹងវិធានច្បាប់ឱ្យមានប្រសិទ្ធភាពជាងនេះ ដើម្បីរក្សាបាននូវសន្តិសុខ សណ្តាប់ធ្នាប់ និង សុវត្ថិភាពនៅក្នុងខេត្តជាប់សមុទ្ររបស់កម្ពុជាមួយនេះ។ ពួកគេក៏បានទទូចឱ្យអាជ្ញាធរយកចិត្តទុកដាក់ និងត្រួតពិនិត្យឱ្យបានច្បាស់លាស់ពីការស្នាក់នៅ អត្តសញ្ញាណ និង មុខរបររបស់ជនជាតិចិននៅខេត្តព្រះសីហនុ និង មានការប្រុងប្រយ័ត្នខ្ពស់ជានិច្ចចំពោះពួកគេ។
ជាការឆ្លើយតប លោកឃាង ភារម្យ បានអះអាងថា អាជ្ញាធរនឹងបង្កើនកិច្ចខិតខំរបស់ខ្លួន និងរឹងបន្តឹងច្បាប់បន្ថែមទៀត ដើម្បីរក្សាបាននូវសន្តិសុខ សណ្តាប់ធ្នាប់ និងសុវត្ថិភាពនៅក្នុងខេត្តព្រះសីហនុនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ