នូវែលសេឡង់អំពាវនាវឲ្យអន្តរជាតិឃ្លាំមើលស្ថានភាពបោះឆ្នោតនៅកម្ពុជាដែលគ្មានបក្សប្រឆាំង
ប្រទេសនូវែលសេឡង់នៅថ្ងៃទី១៩ មិថុនាម្សិលមិញ បានធ្វើសេចក្តីថ្លែងការណ៍រួមថ្មីមួយទៀតអំពីស្ថានភាពសិទ្ធិមនុស្សនៅកម្ពុជានៅក្នុងកិច្ចប្រជុំក្រុមប្រឹក្សាសិទ្ធិមនុស្សលើកទី៣៨នៅក្នុងទីក្រុងហ្សឺណែវប្រទេសស្វីស។ សេចក្តីថ្លែងការណ៍ដែលមានកម្រាស់ពីរទំព័រនេះ បានបរិយាយយ៉ាងច្រើនពីបញ្ហាសិទ្ធិមនុស្ស និងការបោះឆ្នោតនៅកម្ពុជា ក្នុងនោះប្រទេសនូវែលសេឡង់បានអំពាវនាវដល់សហគមន៍អន្តរជាតិឲ្យបន្តយកចិត្តទុកដាក់និងឃ្លាំមើលស្ថានភាពបោះឆ្នោតនៅក្នុងប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:៣៦
តាមរយៈសេចក្តីថ្លែងការណ៍រួមទៅកាន់ប្រធានក្រុមប្រឹក្សាសិទ្ធិមនុស្សនៃអង្គការសហប្រជាជាតិ អ្នកតំណាងប្រទេសនូវែលសេឡង់ បានសម្តែងនូវការព្រួយបារម្ភយ៉ាងខ្លាំងក្លាចំពោះស្ថានភាពសិទ្ធិមនុស្សនៅក្នុងប្រទេសកម្ពុជា។ ជាមួយគ្នានេះ អ្នកតំណាងនូវែលសេឡង់ក៏បានធ្វើការកត់សម្គាល់ថា ការបោះឆ្នោតជាតិកម្ពុជានៅថ្ងៃទី២៩ កក្កដាខាងមុខនេះ មិនអាចចាត់ទុកថាជាការបោះឆ្នោតសេរី ពិតប្រាកដ យុត្តិធម៌ និងស្របច្បាប់ឡើយ នៅពេលដែលគ្មានការចូលរួមពីគណបក្សប្រឆាំងធំបំផុតនោះ។ មិនតែប៉ុណ្ណោះ អ្នកតំណាងនូវែលសេឡង់ក៏បានអះអាងដែរថា ការចុះឈ្មោះគណបក្សតូចៗមួយចំនួនមិនអាចចូលមកជំនួសអតីតគណបក្សសង្គ្រោះជាតិដែលទទួលបានការគាំទ្រ៤៤ភាគរយនៅក្នុងការបោះឆ្នោតឃុំ សង្កាត់ក្នុងឆ្នាំ២០១៧បានទេ។
ប្រឈមនឹងបញ្ហានេះ តំណាងនូវែលសេឡង់បានអំពាវនាវឲ្យសហគមន៍អន្តរជាតិបន្តយកចិត្តទុកដាក់ចំពោះស្ថានភាពនៅក្នុងប្រទេសកម្ពុជា ជាពិសេសនៅក្នុងអំឡុងពេលនៃការរៀបចំការបោះឆ្នោត។ បន្ថែមលើនេះ នូវេលសេឡង់ក៏បានជំរុញឲ្យការិយាល័យឧត្តមស្នងការសិទ្ធិមនុស្សឃ្លាំមើលស្ថានភាពទាំងមុន ក្នុងអំឡុងពេល និងក្រោយការបោះឆ្នោត និងធ្វើសេចក្តីរាយការណ៍មកកាន់ក្រុមប្រឹក្សាសិទ្ធិមនុស្សនៅក្នុងសម័យប្រជុំបន្ទាប់។
គួរបញ្ជាក់ថា នេះគឺជាលើកទីពីរហើយដែលប្រទេសនូវែលសេឡង់បានធ្វើសេចក្តីថ្លែងការណ៍រួមទៅកាន់ក្រុមប្រឹក្សាសិទ្ធិមនុស្សអំពីស្ថានភាពនៅក្នុងប្រទេសកម្ពុជា។ កាលពីសម័យប្រជុំលើកទី៣៧ ថ្ងៃទី២១ ខែមីនាកន្លងទៅ ប្រទេសនូវែលសេឡង់ដែលតំណាងឲ្យប្រទេសចំនួន៤៥ក៏ធ្លាប់បានធ្វើសេចក្តីថ្លែងការណ៍រួមបែបនេះដែរដោយសម្តែងពីការព្រួយបារម្ភពាក់ព័ន្ធនឹងស្ថានភាពសិទិ្ធមនុស្ស សិទ្ធិនយោបាយ និងការបោះឆ្នោតនៅកម្ពុជា។ សេចក្តីថ្លែងការណ៍នាពេលនោះ ត្រូវបានតំណាងកម្ពុជាប្រចាំនៅអង្គការសហប្រជាជាតិច្រានចោលដោយអះអាងថា សេចក្តីថ្លែងការណ៍នោះមានចរិតនយោបាយបង្កប់ទៅដោយបំណងអាក្រក់ ដើម្បីរារាំងកិច្ចខិតខំរបស់រដ្ឋាភិបាលកម្ពុជានៅក្នុងការការពារច្បាប់។
ដោយឡែកចំពោះសេចក្តីថ្លែងការណ៍ថ្មីនេះវិញ ក្រៅពីតែបន្តសម្តែងនូវការព្រួយបារម្ភ តំណាងប្រទេសនូវែលសេឡង់ក៏បានអំពាវនាវមកកាន់រដ្ឋាភិបាលកម្ពុជាឲ្យដោះលែងលោកកឹម សុខា និងអ្នកទោសពាក់ព័ន្ធនឹងនយោបាយផ្សេងទៀតជាបន្ទាន់ និងដោយគ្មានលក្ខខណ្ឌ បើកឲ្យដំណើរការអតីតបក្សសង្គ្រោះជាតិឡើងវិញ និងបើកសិទ្ធិធ្វើនយោបាយដល់មន្ត្រីអតីតបក្សនេះ១១៨នាក់។ ក្រៅពីនេះ តំណាងប្រទេសនូវែលសេឡង់ក៏បានអំពាវនាវឲ្យរដ្ឋាភិបាលកម្ពុជាលុបចោលសេចក្តីធ្វើវិសោធនកម្មរដ្ឋធម្មនុញ្ញនិងច្បាប់ផ្សេងៗទៀតដែលប៉ះពាល់ដល់សិទ្ធិមនុស្ស និងសេរីភាពបញ្ចេញមតិ។ លើសពីនេះ តំណាងប្រទេសនូវែលសេឡង់ក៏បានស្នើឲ្យបញ្ឈប់ការយាយីលើសមាជិកបក្សប្រឆាំង អ្នកសារព័ត៌មាន និងសង្គមស៊ីវិលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ