លោកអ៊ូ ច័ន្ទរ័ត្ន អំពាវនាវកុំឱ្យមានការជេរប្រមាថមន្រ្តីបក្សប្រឆាំងដែលស្នើសុំសិទ្ធិធ្វើនយោបាយឡើងវិញ
អតីតតំណាងរាស្រ្តបក្សប្រឆាំង លោកអ៊ូ ច័ន្ទរ័ត្ន នៅថ្ងៃអាទិត្យនេះ បានអំពាវនាវដល់បណ្តាអ្នកគាំទ្រអតីតគណបក្សសង្រ្គោះជាតិឱ្យឈប់បន្តវប្បធម៌ជេរប្រមាថលើមន្រ្តីដែលស្នើសុំ និងទទួលបានសិទ្ធិធ្វើនយោបាយឡើងវិញ។ ការអំពាវនេះ ធ្វើឡើងក្រោយពីព្រះមហាក្សត្រកម្ពុជាបានសម្រេចផ្តល់សិទ្ធិធ្វើនយោបាយឡើងវិញដល់មន្រ្តីអតីតបក្សប្រឆាំងម្នាក់ទៀតកាលពីម្សិលមិញ។
ចុះផ្សាយនៅថ្ងៃ៖
ស្តាប់ - ០២:២៦
លោកអ៊ូ ច័ន្ទរ័ត្ន អតីតតំណាងរាស្រ្តបក្សប្រឆាំងបានសម្តែងការមិនសូវសប្បាយចិត្តសោះឡើយ នៅពេលដែលអ្នកគាំទ្រអតីតគណបក្សសង្រ្គោះជាតិមួយចំនួន ជាពិសេស អ្នកសម រង្ស៊ី និយមដែលបានជេរប្រមាថដោយប្រើប្រាស់ពាក្យមិនសមរម្យទៅលើមន្រ្តីដែលបានស្នើសុំ និងទទួលបានសិទ្ធិធ្វើនយោបាយឡើងវិញពីសំណាក់ព្រះមហាក្សត្រកម្ពុជា។ សម្រាប់លោកអ៊ូ ច័ន្ទរ័ត្ន នេះគឺជាវប្បធម៌មិនល្អប្រសើរទាល់តែសោះសម្រាប់ប្រទេសជាតិ។ ហេតុដូច្នេះហើយ លោកបានអំពាវនាវឱ្យពួកគេឈប់បន្តវប្បធម៌ជេរប្រមាថបែបនេះតទៅទៀតចំពោះមន្រ្តីអតីតបក្សប្រឆាំងដែលទទួលបានសិទ្ធិធ្វើនយោបាយឡើងវិញ។
ការលើកឡើងរបស់លោកអ៊ូ ច័ន្ទរ័ត្ននៅពេលនេះ គឺបន្ទាប់ពីលោកស៊ីម សុវណ្ណនី ហៅ ស៊ីម វ៉ាន់នី ដែលជាអតីតសមាជិកគណៈកម្មាធិការនាយករបស់អតីតគណបក្សសង្រ្គោះជាតិមួយរូបទៀតត្រូវបានព្រះមហាក្សត្រកម្ពុជាផ្តល់នីតិសម្បទាឱ្យធ្វើនយោបាយឡើងវិញ។ លោកស៊ីម សុវណ្ណនី គឺជាមន្រ្តីអតីតបក្សប្រឆាំងទីបីហើយដែលទទួលបានសិទ្ធិធ្វើនយោបាយឡើងវិញ បន្ទាប់ពីលោកគង់ គាំ អតីតទីប្រឹក្សាជាន់ខ្ពស់ និងលោកគង់ បូរ៉ា ដែលជាអតីតតំណាងរាស្រ្តរបស់អតីតគណបក្សសង្រ្គោះជាតិ។ ប៉ុន្តែអ្វីជាកត់សម្គាល់ គឺក្រោយទទួលបានសិទ្ធិនេះមកវិញ ពួកគេត្រូវបានអ្នកគាំទ្រអតីតប្រឆាំងដែលនិយមខ្លាំងលើលោកសម រង្ស៊ី បានស្តីបន្ទោស និងជេរប្រមាថឥតល្ហែរ។
ការណ៍នេះ ធ្វើឱ្យលោកអតីតតំណាងរាស្រ្តអ៊ូ ច័ន្ទរ័ត្ន ខកចិត្ត។ ខកចិត្ត ដោយសារតែលោកអះអាងថា មន្រ្តី និងអ្នកគាំទ្រអតីតបក្សប្រឆាំងជេរប្រមាថមន្រ្តីខ្លួនឯងខ្លាំងជាងដៃគូរបដិបក្ខរបស់អតីតគណបក្សសង្រ្គោះជាតិទៅទៀត។ តាមលោកអ៊ូ ច័ន្ទរ័ត្ន ការស្នើសុំសិទ្ធិធ្វើនយោបាយឡើងវិញនេះ គឺជាជម្រើសនិងការសម្រេចចិត្តរបស់មន្រ្តីម្នាក់ៗដោយផ្អែកទៅតាមហេតុផលផ្ទាល់ខ្លួន។ ដូចនេះ ពួកគេមិនគួរត្រូវរងនូវការជេរប្រមាថព្រោះតែការសម្រេចចិត្តនេះឡើយ។
ដោយឡែក ចំពោះគណបក្សកាន់អំណាចវិញ ការស្នើសុំសិទ្ធិធ្វើនយោបាយឡើងវិញរបស់មន្រ្តីអតីតបក្សប្រឆាំងនេះប្រៀបបីដូចជាកំពុងរុញលោកសម រង្ស៊ីទៅកាន់តំបន់ឯកកោពីសង្គមនយោបាយកម្ពុជា។ លោកសុខ ឥសាន អ្នកនាំពាក្យគណបក្សកាន់អំណាចលើកឡើងថា អ្វីៗដោយសារតែលោក សម រង្ស៊ីខ្លួនឯងលាឈប់ពីសមាជិក និងប្រធានបក្សដែលមិនចូលក្នុងកញ្ចប់នយោបាយតែមួយជាមួយមន្ត្រីផ្សេងៗទៀត។ សម្រាប់លោកសុខ ឥសាន ឥឡូវនេះហួសពេលហើយសម្រាប់លោកសម រង្ស៊ី ព្រោះអ្នកនៅក្នុងកញ្ចប់១១៨នាក់បានប្រើសិទ្ធិនយោបាយរៀងៗខ្លួន ដើម្បីមានសិទ្ធិធ្វើនយោបាយឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ