ឯកអគ្គរដ្ឋទូតថ្មីអាមេរិកប្តេជ្ញាជួយឱ្យកម្ពុជាមានលទ្ធិប្រជាធិបតេយ្យ និង ឯករាជ្យភាព
ស្ថានទូតអាមេរិកនៅភ្នំពេញកាលពីថ្ងៃសុក្រ បានបញ្ចេញនូវវីដេអូឃ្លីបខ្លីមួយរបស់លោក W.Patrick Murphy ដែលជាឯកអគ្គរដ្ឋទូតអាមេរិកថ្មីប្រចាំកម្ពុជា។ តាមរយៈវីដេអូឃ្លីបនេះ លោក W. Patrick Murphy បានបង្ហាញនូវមោទកភាពចំពោះតំណែងថ្មីនេះ។ លោកថែមទាំងប្តេជ្ញាថា នឹងជួយពង្រឹងទំនាក់ទំនងរវាងអាមេរិកនិងកម្ពុជា ក៏ដូចជាជួយឱ្យកម្ពុជាមានលទ្ធិប្រជាធិបតេយ្យ និងឯករាជ្យភាពផងដែរ។ យ៉ាងណាក៏ដោយ លោកឯកអគ្គរដ្ឋទូតអាមេរិកថ្មីមិនបានបញ្ជាក់ពីកាលបរិច្ឆេទជាក់លាក់នៃការមកកាន់កម្ពុជានៅឡើយទេ ដោយគ្រាន់តែបង្ហើបថានឹងមកដល់កម្ពុជានាពេលឆាប់ៗនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
នៅក្នុងវីដេអូឃ្លីបជិត២នាទី លោក W. Patrick Murphy បានគូសបញ្ជាក់ឱ្យដឹងថា នៅពេលនេះ កម្ពុជានិងអាមេរិក មានកិច្ចសហប្រតិបត្តិការរួមគ្នាក្នុងវិស័យជាច្រើន ដូចជាការអភិវឌ្ឍ ពាណិជ្ជកម្ម សុខភាពសាធារណៈ ការពង្រឹងការអនុវត្តច្បាប់ ការផ្លាស់ប្តូរវប្បធម៌ និង ការផ្លាស់ប្តូរគ្នារវាងប្រជាពលរដ្ឋនៃប្រទេសទាំងពីរ។ ហេតុដូចនេះហើយ ក្នុងនាមជាឯកអគ្គរដ្ឋទូតអាមេរិកថ្មីប្រចាំនៅកម្ពុជា លោកប្តេជ្ញាចិត្តថា នឹងបន្តពង្រឹង ទំនាក់ទំនងនៃប្រទេសទាំងពីរលើវិស័យទាំងនេះ ព្រមទាំងផ្តល់នូវការគាំទ្រ ដើម្បីឱ្យប្រទេសកម្ពុជាមានភាពរឹងមាំ រុងរឿង មានលទ្ធិប្រជាធិបតេយ្យ និង ឯករាជ្យភាព។
ចំណែក រដ្ឋាភិបាលកម្ពុជាវិញក៏មានសុទិដ្ឋិនិយមលើឯកអគ្គរដ្ឋទូតអាមេរិកថ្មីប្រចាំនៅកម្ពុជានេះដែរ ក្នុងការជួយសម្រួលដល់ទំនាក់ទំនាក់ទ្វេភាគីរវាងអាមេរិក និង កម្ពុជា។ ថ្លែងប្រាប់វិទ្យុបារាំងអន្ដរជាតិ RFI នាថ្ងៃសៅរ៍នេះ អ្នកនាំពាក្យរដ្ឋាភិបាលកម្ពុជា លោកផៃ ស៊ីផាន បង្ហាញការជឿជាក់ថា ឯកអគ្គរដ្ឋទូតថ្មីនេះ នឹងយល់ពីការខិតខំប្រឹងប្រែងរបស់រដ្ឋាភិបាល និង ប្រជាជនកម្ពុជា។ លោកអះអាងថា រដ្ឋាភិបាលនឹងខិតខំពន្យល់លោក W. Patrick Murphy ឱ្យទទួលស្គាល់ និងគាំទ្រចំពោះការប្រឹងប្រែងរបស់រដ្ឋាភិបាលកម្ពុជាក្នុងបុព្វហេតុសន្តិភាព និង លទ្ធិប្រជាធិបតេយ្យ។
សូមបញ្ជាក់ថា លោក W. Patrick Murphy ត្រូវបានព្រឹទ្ធសភាអាមេរិកសម្រេចតែងតាំងជាឯកអគ្គរដ្ឋទូតអាមេរិកថ្មីប្រចាំកម្ពុជាតាមសំណើរបស់លោកប្រធានាធិបតីដូណាល់ ត្រាំ កាលពីថ្ងៃទី១ ខែសីហា ឆ្នាំ២០១៩។ លោកត្រូវបានតែងតាំងជំនួសលោក William Heidt ដែលបានចប់អាណត្តិកាលពីខែវិច្ឆិកា ឆ្នាំ២០១៨កន្លងទៅ។ មុនត្រូវបានតែងតាំងជាឯកអគ្គរដ្ឋទូតថ្មីនេះ លោក W. Patrick Murphy គឺជាឧបការរីរងនៃក្រសួងការបរទេសអាមេរិក ទទួលបន្ទុកកិច្ចការអាស៊ីបូព៌ានិងប៉ាស៊ីហ្វិក។ ក្នុងនាមជាអ្នកកាទូត លោកW. Patrick Murphy ក៏ធ្លាប់មកបំពេញបេសកកម្មនៅកម្ពុជាជាច្រើនដងផងដែរ ដើម្បីឈ្វេងយល់ពីប្រវត្តិសាស្ត្រ និង វប្បធម៌របស់ប្រទេសកម្ពុជា។
ក្នុងវ័យ៥៦ឆ្នាំ លោកW. Patrick Murphy ត្រូវបានគេចាត់ទុកថា គឺជាមន្ត្រីអ្នកការទូតជាន់ខ្ពស់អាមេរិកម្នាក់ ដែលមានចំណេះដឹងទាំងខាងផ្នែកកិច្ចការនយោបាយ យោធា សេដ្ឋកិច្ច សិទ្ធិមនុស្ស និងជំនាញខាងការដោះស្រាយទំនាស់។ លោកបានបញ្ចប់ការសិក្សាបរិញ្ញាបត្រជាន់ខ្ពស់ផ្នែករដ្ឋបាល និង ផ្នែកវិទ្យាសាស្ត្រពីមហាវិទ្យាល័យសង្គ្រាមជាតិ និង បរិញ្ញាបត្រពីសាកលវិទ្យាល័យ Vermont។ ក្រៅពីនោះ លោកក៏ធ្លាប់បានសិក្សានៅវិទ្យាស្ថានអឺរ៉ុបនៅទីក្រុងនីស ប្រទេសបារាំងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ